Aashakati yamwe ya tameka okutembuka molwomeya

Okuza ongulohi ya zi ko, Elelo lya Shakati, olya kala tali tutu mo aantu yamwe momagumbo gawo noku ya fala kehala li li wokOfaabulika yOnyama mOshakati, hoka oko ngaa kwa li kwa tembudhilwa aantu oyendji omvula ya zi ko.

Mokupopya noonakutembudhwa mbaka, unene na meme Lovisa Erasmus na meme Maria Shikesho na meme Elina Abed, otaya ti kutya Muni gwa Shakati ote ya kwathele shili, ashike nee hasho sha li shi na okukala ngeyi. Taya ti kutya Elelo lya Shakati olya ningile omauvaneko ge li nawa omvula ya zi ko kutya aantu mboka haya kala ya gumwa kefundja, otaya katembudhwa po pomahala gawo ndele taya ka tulwa kehala lya longekidhwa nawa, unene tuu mpoka ya tembukila natango nuumvo lwopofaabulika yonyama mpoka. Oonakutembudhwa otaya nyenyeta wo kutya Elelo lya Shakati inali ya endelela po li ya kuthe momaya nziya molwashoka oya kala mo uule woshiwike yaa na ekwatho lyasha, ya li kupopya kElelo, olya mwena ashike kwali sigo nee tali tukuluka ongulohi yEtiyali lya zi ko nongula onene yohela nokututa mo aantu momeya. Aakalimo yamwe oya fa ye uvite kutya yo kOotenda hoka itaya ka za ko we, ya shune momalukanda moka ya kala, oshoka aluhe ngele omvula ye ya, ohaya monene m o iihuna nayi. ‘Otwa vulwa okuuhala tatu tembauka, tatu tembagulwa, notu wete kutya oyendji nuumvo, kehala huka twa tulilwa ootenda itatu ka za ko we nuupu. Elelo lya Shakati nali thikame ashike li tu pe oonomola tu tunge po omagumbo getu opuwo. Oshinima shika shokuuhala tatu tembagulwa, kashi shi oshiwanawa na osha pumbwa okumona ehulilo, ‘yamwe taya ti ngawo neyeme. Mokumonathana nOmupopiliko gwElelo lyOndoolopa ya Shakati, mee Anna Ingwafa okwa koleka ko The Namibian kutya oyiipyakidhila shili nokutembudha aakalimo yamwe yomomalukanda ga tumbulwa metetekelo notaya tsikile ngeyi sigo ayehe ya pumbwa ekwatho ndika taye li mono, ngashi ngaa omvula ya zi ko. Meme Ingwafa ta ti kutya oye na ngaa ootenda dhawo dhonale dha gwana hwepo notashi vulika ya ka mone wo dhimwe okuza kElelo lya Shana nokaasihenda yalwe. Ta ti kehala hoka taya yi li li lwokOfaabulika yOnyama mOshakati oya tula ko nale uundjugo nomeya noye li natango taya tsikile nokoopaleka ko. Efundja lyolyene natango inali ya mo mOshakati ngashi omvula ya zi ko, ashike Gavena ya Shana okwa uvika a ti kutya aakalimo naya langele komauta, oshoka olya fa tali zi hoka lya thinda mOshakati sha Nangombe nosho tuu momudhingoloko. Oshifo shika osha li sha katalela po kOshitopolwa sha Musati, momikunda ngashi Onghili, Ouholondema, Omambuumbuu, Ouhawala okupiytila kondjila ya Kalongo Omaandaha ga zi ko nosha mono kutya kOshitopolwa hoka oku na omeya gomvula nogefundja, shi li mumwe moka. Omeya ngoka moga thinda kOshakati nosho tuu nange oga thiki ko nena otashi ka kala iihuna yowala nee.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.