Aapolisi 150 ya tidhwa miilonga muule woomvula ndatu

MINISTA gwiikwameni, omatembu, egameno nepopilo lyoshigwana Albert Kawana okwa popi kutya aapolisi ye li 150 oya lalekwa miilonga pokati ko2020 n2022 sho ya longo iilonga ya puka.

Kawana ndhoka okwe dhi popi momutumba gwopashigwana mEtitatu lya zi ko.

Momukokomoko gwethimbo olyo tuu ndyoka, okwa popi kutya aapolisi ye li 1 708 okwa li ya katukilwa onkatu yelondodho lyokwaaihumbata nawa miilonga, omanga aapolisi ye li 141 oya kuthwa miilonga pakathimbo.

Minista okwa popi kutya mo2020, aapolisi ye li 51 oya tidhwa miilonga, mo2021 aapolisi 50 oya tidhwa miilonga, nomumvo gwa zi ko aapolisi ye li 49 oya lalekwa miilonga.

Kawana okwa popi kutya uuyelele mboka okwe wu pititha moshigwana opo e ekelehi omapopyo ngoka ge li po kutya aapolisi mboka taya pogola kaye na shoka haya ningwa.

“Onda hala owala oku ku kwashilipaleka oshinima shoka. Aantu ohaya tidhwa mo miilonga, haya kuthwa oonkatu dhopombanda, nenge oondjambi dhawo dhi tetwe opo ku kalekwe elandulathano mopolisi,” osho a popi ngaaka.

Kawana okwa popi kutya uuna aapolisi yi ihumbata nayi, ohaya kuthwa miilonga mbala manga ewilikongundu lyomapulapulo inaali tameka nomatamaneko.

Minista okwa popi kutya okuza mo2018 sigo onumvo, opolisi oya ndhindhilika iipotha yi li 2 765 yaakwashigwana taya tindi okwiiyutha komalombwelo nenge yaapolisi ya dhengwa pethimbo ye li miilonga.

Okugwedha kwaashoka, minista okwa popi kutya aapolisi yaakiintu ye li 29 okwa li ya ningilwa omahepeko ga pamba uukwashikekookantu nomakwatonkonga.

Pethimbo ta ti ko sha koshikundathanwa momutumba gwopashigwana, minista gwomaudhano, aagundjuka nomayakulo goshilongo Agnes Tjongarero okwa pula ngele aapolisi mboka haya gandja egameno kaanenentu ohaya futwa tuu olutayima uuna ya longo oowili odhindji.

Tjongarero okwi indile Kawana a tale oshinima shoka shonkalo yiilonga yaapolisi mboka haya longo oowili odhindji.

Oshilyo shongundu yo-Popular Democratic Movement (PDM) Elma Dienda okwa popi kutya aapolisi mboka ya pewa oshinakugwanithwa shokutonatela aanenentu olundji ohaya longo iilonga yawo ya sa ondjala nondjambi yawo onshona noonkondo.

Okwa popi kutya “omizalo” odho owala oshinima oshiwana okukala omupolisi.

“I ipula owala, owa gamena nokutonatela omunenentu omanga wa sa ondjala. Shoka hofutwa oshishona noonkondo, ngoye ishewe oho kala wa kuutumba sigo kwa toko, iho futwa olutayima, kapu na sha, ashike ongoye ngaa wa gamena aantu. Oto longitha oonkondo tadhi zi peni dhoku ya gamena ngele owa sa ondjala?” osho a pula ngaaka.

Dienda okwa popi kutya iimbuluma moshilongo oya vuka, molwashoka aapolisi kaye na oonkondo dhokukondjitha iimbuluma.
“Otaya mono iihuna meimweneneno itaaya nyenyeta molwashoka itaya vulu okuholola omadhiladhilo ye tu fa. Natu ya kondjeleni opo ya kale monkalo yi li hwepo,” osho a popi ngaaka.

Dienda okwi indile Kawana a shilipaleke kutya aapolisi oye na omalukalwa ge li nawa molwashoka okwa ndhindhilike kutya oyendji yomuyo ohaya zi owala moombashu.

Oshilyo shoSwapo momutumba gwopashigwana, Jerry Ekandjo okwa tsu kumwe naashoka Dienda a popi kombinga yaapolisi, nokwa popi kutya aapolisi oyendji unene tuu mboka ye na oondondo dhopevi, ohaya zi koombashu.

Okwa pula wo ngele pamwe omatungo goRamatex ngoka ge li mOvenduka itaga vulu okuningwa nawa opo ga ningwe po omalukalwa gaapolisi.

Ekandjo okwa popi kutya aapolisi oya pumbwa wo okukala ya longekidhilwa iihauto yokuya fala kiilonga nokomagumbo uuna ya zimbuka.

Kawana okwa yamukula tati, aapolisi ihaya futwa olutayima molwashoka ohaya pewa nale oshimaliwa sha gwedhwa po komwedhi shonkalo yiilonga yawo ndjoka ya nika oshiponga.

Okwa popi kutya uuna onkalo yopamahupilo ya hwepopala, onkalo yiilonga yaapolisi osho wo aakalekipo yegameno yalwe, otayi ka hwepopalekwa.

Kombinga yomalukalwa gaapolisi, Kawana okwa popi kutya uuministili we owa mona ehala enene mOvenduka mpoka tapu ka tungwa omagumbo gaapolisi.

Okwa popi kutya opolisi oyi ipyakidhila nale nomalongekidho gokutula molugumbo ehala ndyoka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.