Aapanguli ya mono uumbangi kutya Mike oku na olunyala moFishrot

UUMBANGI wa gandjwa pethimbo lyiihokolola yoboloha yomukuluntuwiliki a kuthwa miilonga pkathimbo gwehangano lyedhina National Fishing Corporation of Namibia (Fishcor), Mike Nghipunya, owu ulike kutya epangelo oli na uumbangi wa kola kutya okwa li a kutha ombinga miipotha ta tamanekelwa moshipotha shoFishrot.

Ndhoka okwa li dha popiwa mOmpangu yoPombanda mEtitatu pethimbo etalululo lyetokolo lyonkambadhala yaNgipunya yokupewa ompito yokwi ifutila mo mongali ya li natango ya ponyo.

Pakutala kuunene womatamaneko ta ga ningilwa Nghipunya, osho wo uumbangi mboka wa li wa gandjwa komukonaakoni gomokomisi tayi kondjitha uulingilingi moshilongo yo-Anti-Corruption Commission, etokolo olya li lya ningwa kumangestrata omupevikuluntu Ingrid Unengu kutya epangelo oli na uumbangi mboka tawu vulu oku mu monitha ondjo, onkene shoka inashi pumbwa okwi idhimbikwa, osho omupanguli Christie Liebenberg a popi ngaaka pethimbo lyetalululo lyetokolo moka Nghipunya a li a hala okupewa oboloha mompangu yopombanda yaVenduka.

Omupanguli omukwawo Claudia Claasen okwa li a tsu kumwe netokolo lya gandjwa kuLiebenberg.

Liebenberg okwa popi kutya uumbangi wa gandjwa komukonaakoni go-ACC Willem Olivier, owu ulike kutya Nghipunya oku na lela oshipotha, nongele okwa monika ondjo, okwa nika oku ka pewa egeelo lya kola oku mu kaleka mondjeedhililo. Pehulilo okwa popi kutya itashi ka kala nande muuwanawa woshigwana nenge muuwanawa welelo lyuuyuuki moshilongo ngele Nghipunya okwa pewa ompito yokuza mo mondholongo.

Liebenberg okwa popi ta ti: “Otwa mbilipalelwa kwaashoka kutya mangestrata ina ninga nande epuko sho a mono kutya epangelo oli na uumbangi wa kola meidhopo [lyaNghipunya] moshimbuluma shoka, sho a li a kutha ombinga nelalakano limwe lyiifuta yoshimaliwa yaa li paveta osho wo uukengeleledhi wopashimaliwa monkambadhala yekotokelo lyoonzo.”

Okwa popi natango kutya omatamaneko ngoka Nghipunya (36) a taalela, pamwe naafekelwa ooyakwawo – minista omukulu gOohi nOonzo dhomefuta Bernhard Esau; omunashipundi omukulu go-Fishcor James Hatuikulipi; ngoka a li nale minista gUuyuuki Sacky Shanghala; oshitenya sha Esau, Tamson Hatuikulipi, osho wo Pius Mwatelulo – oga kwatela mo omatamaneko geyako lyoshimaliwa shepangelo shoomiliyona odhindji osho wo ekotokelo lyopashimaliwa.

“Moshilongo shika shi li muupyakadhi wuulingilingi, uukengelelidhi, nelongithonayi lyoshimaliwa shepangelo noshomoshikondo shopaumwene esiku kehe, kashi shi oshidhigu oku shuuva ko kutya omolwashike oshigwana sha pakaleka omakutsi noshi li ompinge noshipotha shika,” osho Liebenberg a popi ngaaka.

“Moshinima shika, elongithonayi lyoshimaliwa shaakwashigwana osha guma kehe gumwe moNamibia nosha pumbwa okutaliwa ko nuutondwe [ngaashi shi na okukala].”

Okwa popi kutya shoka osha li sha gwana okukwatela komeho ompangu okumona kutya itashi kala muuwanwa womulandu guuyuuki ngele okwa pewa oboloha.

Nghipunya okwa kala mondjeedhililo okuza muFebuluali numvo sho ta fekelwa okukala a kutha ombinga mendjondjo mo lyoshimaliwa shoomiliyona dhi thike po-N$75.6 moshikondo shoohi okupitila megandjo lyoombumbo ya kala taya pewa, sha ningwa pokati kaAuguste 2014 naDesemba 2019, shoka ngashingeyi sha tseyika nawa muuyuni Fishrot.

MuJune Nghipunya okwa li a ningi onkambadhala yokupewa oboloha mOmpangu yaMangestrata gwaVenduka, ashike mangestrata Unengu okwa li a tindi okuyi mu pa.

Nghipunya pamwe naakaleli po ye yopaveta, okwa li ya ningi eindilo opo etokolo ndyoka lyi talululwe mompangu yopombanda yaVenduka, moka aapanguli ya talulula etokolo ndyoka, Claasen naLiebenberg ya li natango ya tindi oku mu pa ompito yokwi ifutila mo.

Nghipunya pamwe naafekelwa yomoshipotha shoka shoFishrot oya tegelelwa ya holoke mompangu yamangestrata gwaVenduka natango momasiku 14 Decemba, opo ya ka pewe oshizemo shomakonaakono ngoka taya ningilwa.

Oohahende Thabang Phatela naMilton Engelbrecht oyo ya li ya kalela po Nghipunya pethimbo lyiihokolola yokupewa oboloha netalululo lyoboloha. Omupevitamaneki-ndjayi Cliff Lutibezi oye a li a kalela po epangelo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.