Aanuulema yoshipa ye li muumbanda woonkalamwenyo dhawo … iilyo yawo taku hokololwa hayi pumbiwa ok

JOSEPH Ndinomupya, ngoka oye omupresitente gwehangano lyaantu mboka ye na uulema woshipa lyedhina Namibia Albino Association, okwa popi kutya oshigwana shaantu yuunuulema mboka ngashingeyi oshi li muumbanda wokwiinyenga ya manguluka omolwegameno lyoonkalamwenyo dhawo.

Ndhoka Ndinomupya okwe dhi popi mEtine, i ikwatelela koshiningwanima moka aalumentu yaali ya tulwa miipandeko mOvenduka sho ya li taya kambadhala okuya moonkundathana dhokulanda po omafufu, nayilwe okuza kwaamboka ye na uulema woshipa.

Aalumentu mboka oya tulwa miipandeko sho ya li taya kongo nokulanda po omafufu niipanyala yaanuulema yoshipa, notaku hokololwa ya li ya hala ye yi fale koKatima Mulilo yi ka longithwe miinima ya pamba uumpulile.

Mokavidio hoka ka monika koThe Namibian, aafekelwa mboka oya popi taya ti oya tumwa okuza koshitopolwa shaZambezi hoka ku na AaIndia ya hala okulanda iinima yaanuulema yoshipa “koshimaliwa shoomiliyona”.

“Oshiningwanima shoka oshi na sha naantu ye na uulema woshipa moNamibia. Emanguluko lyetu olya ngambekwa noonkondo, molwashoka katu shi kutya moshigwana omu na aantu yangapi ye na omalalakano ngoka,” osho Ndinomupya a popi ngaaka.

Okwa popi kutya oshigwana osha pumbwa okukala sha kotoka, inashi pumbwa nokuli okwiinekela lela ookuume naakwanezimo.

Okwa gwedha po kutya iinima mbyoka hayi ningilwa aanuulema yoshipa ohayi yonagula – unene tuu uuna yi na sha noshimaliwa.

Komanda gwopolisi yoshitopolwa shaKhomas, komufala Ismael Basson uunambo okwa koleke oshiningwanima shoka.

Okwa popi kutya aafekelwa mboka yaali oya holoka mompangu yaMangestrata gwaKatutura mOvenduka mEtiyali noya tindilwa ompito yokwiifutila mo. Oshipotha shawo oshu undulilwa omasiku 26 Juni.

Inspekta omukuluntu Christina van Dunem Dafonsech-Shikongo, ngoka a li poshiningwanima shoka pethimbo aafekelwa ya tulwa miipandkeo, oshiwike shika okwa popi tati: “Oshinima shoka otashi tulitha moshiponga aantu yetu, nonkene osha pumbwa okukondemwa.”

Okwi indile oshigwana shi kwathele opolisi mokukeelela iipumbula yoludhi ndoka.

Ambambi Alweendo, ngoka e na uulema woshipa, okwa popi kutya aanuulema yoshipa ohaya shundulwa moshigwana medhina kutya anuwa ohaya longithwa muumpulile niinima ya pamba uulodhi nonkene aantu ohaya kala ye ya tila.

“Ohatu talika ko twa fa kaatushi aantu yolela, nohatu taliwa ko ongaantu yokulongithwa miinima yuumpulile nuulodhi. Oshinima shoka oshiwinayi lela,” osho a popi ngaaka.

Alweendo okwa popi kutya oshigwana osha pumbwa lela elongo kombinga yuulema woshipa noya pumbwa oku uvithwa ko kutya kashi shi ethingo.

“Aantu aluhe ohaya popi owala iinima mokwaana ontseyo, nenge sho ye wete kutya oya yooloka kwaashoka tu li,” osho a popi ngaaka.

Alweendo okwa popi kutya aanuulema yoshipa inaya pumbwa okuteywa omukumo kwaamboka taye ya shundula.

“Owu na ashike okushekwa, kutya nee owu ninge po sha. Ashike oshinima sha simana noonkondo ooshoka kutya kala nonkalamwenyo yoye. Osho ndi li, itandi vulu oku shi lundulula,” osho a popi ngaaka.

Monica Johannes* yina yokanona hoka ke na uulema woshipa, okwa popi kutya oku na uumbanda kombinga yomwana omolwoshinima shoka shaantu taya kongo iitopolwa yaanuulema yoshipa, nokwa popi kutya otashi vulu okuguma omadhiladhilo gomwana.

Omunambelewa mehanganokalelipo lyaanuulema lyedhina National Federation of People with Disabilities in Namibia, Elizabeth Namwandi, okwa popi kutya otashi halutha oku uva iiningwanima yoludhi ndoka tayi ningwa moshilongo.

“Iinima mbyoka okwa li ashike hatu yi lesha miilongo ngaashi moKenya nenge moTanzania. Ashike nani inatu manguluka we, notuli nani moshiponga kombinga yiinima oyindji, ngaashi omahepeko gopamilalo osho wo oku ulwa nayi omolwiipa yetu,” osho a popi ngaaka.

Walde Kambabi, omupevipresitente gwehangano lyaanuulema yoshipa lyedhina Namibia Albino Association, ngoka a popi peha lya nakuningwa oshihakanwa moshiningwanima sha ningilwa aantu mboka oshiwike shika, okwa hokolola kutya aafekelwa oya dhengele nakuningilwa oshihakanwa, noye mu lombwele ehokololo kombinga yongeshefa ndjoka noya popi kutya oya hala okuninga ongeshefa naye.

Okwa zimine, nokuza mpoka okwa dhengele opolisi ndjoka ya longo meholamo sigo ya kwata po aafekelwa mboka.

Kambabi okwa popi kutya aafekelwa oya li taya pula oo nakuninga oshihakanwa ya ye naye koshitopolwa sha Zambezi opo a ka pewe ofuto ye kombinga yongeshefa ndjoka.

*Edhina halyo lye lyoshili.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.