Aanona yomekondjo ta ya lundululwa po poombelewa dhoSwapo

OKABINETE oka lombwele Uuministeli Wiimaliwa wu gandje oodola oomiliona 2 opo dhi longithwe okwiinyengitha aanona yomekondjo ya ze po mpoka ya unga oontanda dhawo.

Aanona mbaka otaya inyengithwa omanga omalongekidho taga ningwa opo ya pewe iilonga noshowo oompito dhelongo.Etokolo ndika olya tseyithwa kUuministeli wOmauyelele metiyali. Ota ku tiwa einyengitho lyaanona mbaka ye na, oontanda pombelewa yoSwapo moVenduka nOshakati olya ziminwa koKabinete muMai nuumvo.Okabinete oka gandja elombwelo kUuministeli Wiimaliwa mo 15 ga Septemba opo wu gandje oodola oomiliona mbali dhi longithwe moshinima shika, tashi pitile mo National Youth Service, omanga iilonga noshowo elongo lyaanona ,mbaka ta li longekidhwa.Okwa tseyithwa wo kutya ehala lyopo Berg Aukas pondje ya Grootfontein olyo lya tokolwa li ninge olukalwa lwopakathimbo lwaanona mbaka. Omahala gamwe ngoka ga li taga vulu okulongithwa ongaashi Okatope mOshikoto, Plessisplaas mOmaheke ndele ngaka okwa monika kaa ge li nawa oshoka ka gena omahala gokulala, gokuteleka noshowo uundjugo.Amushanga ta kalele mUuministeli Waagundjuka, Peingodjabi Shipo okwa ti einyengitho oshinima ta shi ningwa molwa ompumbwe ndele elalakano ka li shi okufala aantu mbaka hoka oko ya kalele.Aahololi madhiladhilo mbaka ye li 200 moVenduka no ma 400 pOshakati oya yungu oontanda dhawo poombelewa dhoSwapo oku za muApilili nuumvo.Sho ye ya poombelewa mpoka oya tile, opo ta ya kala mpoka sigo ya pewa iilonga, no ya ti, ita ya ka hogolola ngele ina ya pewa iilonga.Ehololomadhiladhilo lyawo ndyoka lya tamekele poombelewa dhUuministeli wOonakulwa Aakulu ngashingeyi ota li gwanitha omvula yimwe.Shipoh okwa ti shoka sha halika osho ando aanona mbaka ya shune komagumbo gawo, noku imanga kumwe nomazimo gawo.Eimango kumwe nomazimo gawo ota li kala muuwanawa wa wo, oshoka yamwe yomuyo aasimba na yamwe oye na aanona aashona, yamwe ishewe ota ya alukwa.Okwa ti mboka ya hala oku shuna komagumbo ota ya ka kwathelwa, niimaliwa mbika ota yi ka longithwa oku ya palutha ndele ha ku ya zaleka, ayehe mboka ye li komagumbo naamboka ye li koBerg Aukas.Oyendji yomaanona mbaka oya tile ka yena aakwawo hoka ta ya vulu okushuna, no ka ye na mpoka ta ya vulu okuya.Okwa ti Uuministeli otau ka kundathana nomunona kehe opo pu talike kutya oshike ta shi ningwa po.Sho oThe Namibian ya pula omupopiliko gwaanona mbaka kombinga yoshinima shika, Salom Shinedima ngoka eli nongundu ye poombelewa dhoSwapo moVenduka okwa ti ina ya pewa natango etseyitho pambelewa ndele oshinima oye shi uvite ashike tashi popiwa.Okwa ti oyu uvu woo kutya opuna oomiliona mbali dha popiwa moonkundana.Shipoh sho a pulwa kutya aanona mbaka otaya kala noku ninga shike koBerg Aukas hoka ta ya falwa, okwa ti otaya kala no ku teta iihwa kohi yUuministeli wUunamapya, ota ya ka tulwa mootundi opo ya hwepopeke iitsa yawo ya vule okutaambwa momanongelo galwe.Otaya kala yiipyakidhilithwa niinima yaagundjuka.Shipoh okwa ti oompito dhimwe dhiilonga odha holoka po nale ndele sha simana osho eidhidhimiko, molwaasho oompumbwe dhaanona ayehe 10 106 odha pumbwa oku monenwa eyamukulo.Ngashingeyi aanona 29 oya mono iilonga yokuyakula mUuministeli wOmudhingoloko.Opu na woo yatano mboka ya pewa iilonga mUuministeli wOomina, yatano oya pewa iilonga mOmbelewa yOmuperesidende ndele yaali ayeke ya vulu okutameka iilonga mbyoka.Aanona 1 044 oya dheulwa ongiilyo yetanga lyegameno.Oshikondo shaagundjuka otashi hogolola aagundjuka 100, omanga Uuministeli wepopilo lyoshigwana na Nampower taya gandja iimaliwa yokwiilongitha kaanongekwa kumwe ye li omulongo.Mu Maalitsa nuumvo oka ngundulongekidho oka li ka londodha epangelo kutya na li ilongekidhe oku longitha pokati koodola oomiliona 280 sigo 300 oku yamukula oompumbwe dhaanona mbaka dhelongo,eputudho niilonga.Ka pe shiwike kutya epangelo olya longitha iimaliwa yi thike peni sha pitile mOoministeli odhindj kombinga yoku gandja iilonga kaanona mbaka sigo oompaka.