Aanona yo Swapo ya tindi okugandjombili

ONGUNDU yaagundjuka yomekondjelomanguluko ya za ko Berg Aukas no ya ningi esiku ya unga ontanda pokapale ketanga poWanaheda oya ti yo ita ya gandja mbili kepangelo molwaashoka yo ya ningi.Ongundu ndjika ota ku hokololwa ya topoka kombinga yoshinima shika, yamwe aashona oya hala okugandjombili omanga oyendji oya ndjika, oonyala mevi kutya ita ye shi ningi aniwa.

Omupopiliko gwawo okwa pula kutya oya ninga shike opo ya gandjombili, Golden Nendongo ta ti.
Ongundu ndjika oya zile ko Berg Aukas omwedhi gwayi, inaa yi tseyithila aawiliki yawo no ya kala tayi thiminike epangelo opo li ya pe iilonga.
Nendongo okwa ti yo itaya ga ndjombili kepangelo ndele ota ya shuna koBerg Aukas.Okwa koleke kutya iilyo yawo itatu oya li ya indile opo ya shange ombapila ta yi gandjombili omolwa shoka ya ningi, ndele oyendji yaambaka oya ti ina shi ningwa.
Nendongo okwa ti edhiladhilo ndika ina li kundathanwa naayehe, noonaku gandja ethaneko ndyoka aniwa oya thigi po yakwawo osoondaha noka ku shiwike kutya oya yi peni oshoka ina ya thika ko natango ko Berg Aukas.
Petameko ehangano lyaanona yomuundjendi nenge Neka olyo lya ningile ethaneko kutya aanona naya ga ndjombili ku holomende, konima sho okabinete ka tile mbaka oya ike koshitayi ya londako mokweenda okuya ko Windhoek, omanga epangelo ta li ya kongele iilonga nomayakulo galwe.
Nendongo okwa ti yo otaya shuna ko Berg Aukas,, na oye na einekelo kutya otaya ka ethelwamo mokamba, oshoka omuwiliki gwokamba, Nestor Shalauda okwa lombwelele Neka kutya mbaka oya manguluka oku galuka.
Okabinete nako oka tile naya shune ko . Nando oya ti kutya ita ya pewa iiyenditho okushuna hoka, ndele otuna ashike okushuna, osho Nendongo a endulula.
Ongundu oya kala ya yunga oontanda pokapale ka John ya Otto Nankudhiu poWanaheda oku za mo 20 ga June nuumvo. Nendongo okwa ti ooyakwawo ye li 80 oya shunine nale ko Berg Aukas, naamboka ya thigala mpoka oye li ashike lwo po 40.Ongundu ndjika oyi ile koWindhoek omwedhi gwayi opo ando yi pulakenwe kepangelo, ndele ominista Yaagundjuka oya tile naya shune ko Berg Aukas oshoka kapwa li we hapu nayo.
Oshilyo oshipithi mu Neka , Benitha Nakaambo okwa ti ehangano lye oli li moonkundathana kombinga yoshinima shika no li na etegameno kutya ota pu ka adhika epotokonono lyeshongo ndika.