Aanona yatatu ya holoka mOmpangu

OMUWILIKI gwaanona yOonakulwa aakulu mboka ye li pOmbelewa onene yoSwapo pu Kandjengedi mOshakati, John Malumbu pamwe nayakwawo yaali Nangolo Jafet na Martin Martin, mboka nayamwe yaali ya kwatelwe po kOpolisi ongula yEtiyali lya zi ko, ya holoka mOmpangu ya Mangestrata mOshakati niipotha yedhengo, etukomuntu noku mu ningila omatilitho noshowo okukala iilonga yOpolisi moshipala.

Komanda gwOpolisi mOshitopolwa sha Shana, Komufala gwOpolisi NdahangwapoKashihakumwa, ta lombwele The Namibian, ohela kutya Malumbu okwa patululilwa oshipotha shedhengo, etukano nethiminikotilitho lyom untu, omanga ya kwawo yaali Jafet na Hauvinga, ya patululilwa iipotha yokukala moshipala iilonga yOpolisi. Ayehe yatatu oya holokele mOmpangu ya Mangestrata mOshakati niipotha mbyoka.
Inaya pulwa manga ya popye oshindji niipotha yawo oya undulilwa komeho omolu omakonaakono gOpolisi. Ina ya tumwa kondholongo. Inaya pulwa wo yi ifutile mo, nOmupanguli okwe ya tangela ashike omunwe noku ya kunkilila kutya naya ka galuke meti: 10 Auguste nuumvo 2009, yee ya holoke natango komeho gompangu niipotha yawo mbika.
Aanona yOonakulwa aakulu otaya hokolola kutya omuntu ngoka e ya etela uudhigu omumati gwwomvula 31 Fedy Fillemon, ngoka e ya a kale mokati kawo nonando ina valelwa kombanda.
Sho nee ye mu tidha mo okupendukila mEtiyali lya zi ko, Fillemon nguka okwe ke ya lopota kOpolisi kutya oye mu tuka, taye mu ningile omathiminikotilitho noku mu dhenga noshwo okumuulika ombele. Opolisi oye ya nee nokukwata Malumbu nayakwawo yalwe.
Yamwe oya ka ethwa na Malumbu na Martin Martin and Nangolo Jafet taya patuluklilwa nee iipotha mbyoka ya tumbulwa metetekelo.
Metiyali lya zi ko, Omupehapopiliko gwaanona mbaka Johannes Thomas nedhina lya tseyika nawa Mahoka, yo na Eliaser Amadhila ngoka e li omukwatheli gwe mokukaleka elandulathano mu yo sho ye li pOombelewa dhoSwapo mpoka, oya lombwele Oshifo shika kutya yo hela ya kala na Fillemon ngoka, oya kalaye wete kutya ye inashi pumbiwa a kale mongundu yawo, oshoka ke shi omvalele yomekondjelomanguluko, noya kala aluhe taye
mu lombwele a ze mo mokati kawo, ihe okwa kalaa tinda okuza mo.
Mahoka na Eliaser taya tsikile taya hokolola kutya, oshinima shoka oye shi lombwela wo nOmukuluntu gwoSwapo moshitopolwa sha Shana, Erastus Uutoni nosho Amushanga Omukuluntu gwEwawa lyAanyasha moSwapo Elijas Ngurare noshowo Omukuluntu gwOpolisi moshitopolwa, ashike inaku ningwa sha taya ti ngashi Uutoni aniwa ka li e shi panda nokwa kala ta gamene Fredy kutya na kale moka, naye ogwomongundu ndjoka. Ashike Ngurare, okwa li ngaa i ne shi panda sho omumati ngoka e li moka, ashike ina ninga ko sha.
Aanona taya ti wo kutya omumati nguka aniwa okwa kuthile po iimaliwa yamukwawo gumwe yOondola/N$200 pehala lyawo mpoka, nokonima yoku mu pula okwa zimine noyaandjawo oya futu ko N$150. ‘Tashi ti omuntu ngoka ke li nawa nande na otwa kala katu shi kutya ota kongo shike mokati ketu,’ Mahoka na Eliaser taya ti nokugwedha ko kutya ongulohi yEtiyali lya zi ko oya tokola ye mu tidhe mo mokati kawo nokwa yi nee a ka ya lopote kOpolisi ndjoka ye ya nokukwata po Malumbu nayakwawo mboka.
Mahoka ota ti kutya Fredy nguka oka kala te ya hindi olundji, noya kala ashike ye mu idhidhimikila ngawo, sigo nee ongulohi yEtiyali lya zi ko taya vulwa noku mu lombwela a ze mo mokati kawo, e ya thige nombili yawo Pombelewa yawo yoSwapo mpoka.
Opolisi ongula yEtiyali oye ya nee yi konaakone oshinima shoka. Ya etelela nee Fredy, ngoka sho ye ya m poka, ye (Opolisi) mu pula a ulike mboka ye mu ninga nayi no ye mu kuthila oombele. Fredy aniwa ta ulike po nee Omupopiliko gwOngundu yaanona ndjoka John Malumbu noshowo yalwe ngashi Nangolo Jafet, Junias Hauvinga, Martin Martin na Markus Shikukutu.
Opolisi oya lombwele nee mboka yatano ya londe membamba ya ye kOsasiona yOpolisi kOshakati.Opolisi itaya yi ko naya pulilwe ashike mpoka. Opolisi shoka osho nee ya kala inayi hala noyiithana ndjoka yomambathi (Task Field Force), ndjoka ye ya meendelelo nokuthiminikila oonakukwatwapo mbaka momambamba gOpolisi. Pethimbo nee ndika lyokukwatwa po kwawo, opwa li iinima oyindji, ngashi aniwa okudhengwa noongola, yo
wo aanona nayo aniwa tayi ipopile.
Mahoka na Eliaser otaya ti kutya ngashi omukuluntu gwawo Malumbu okwa li a dhengwa nayi nombulukweya ye ya li ya gwamo nokuli. Eliaser na Mahoka oshowo yalwe, mwa kwatelwa naakadhona, nayo wo oya dhengelwe aniwa noongola kOpolisi ndjoka yomambathi. Markus Shikukutu na Junias Hauvinga, oya ka ethiwa konima esiku ndyoka, ashike Malumbu, Martin Martin na Nangolo Jafet, oko ya kala hoka kOpolisi nokupatululilwa iipotha mbyoka.