Aanona ya valelwa kombanda yatano ya kwatwa po kOpolisi

OMUWILIKI gwaanona yOonakulwa aakulu mboka ye li pOmbelewa onene yoSwapo pu Kandjengedi mOshakati, pamwe naakwathelei ye muuwiliki ye li yane, ya kwatwa po kOpolisi ongula yEtiyali lyoshiwike shika, konima sho omumati gumwe ngoka a kala mokati kawo nonande ina valelwa muupongekwa kwali, e ya lopota aniwa kutya ohaye mu popile muuwinayi noku mu kuthila ombele.

Omupehapopiliko gwawo Johannes Thomas nedhina lya tseyika nawa Mahoka, yo na Eliaser Amadhila ngoka e li omukwatheli gwe mokukaleka elandulathano mu yo sho ye li pOombelewa dhOswapo mpoka, taya hokololele The Namibian kutya sho ya kala poombelewa dhOswapo pu Kandjengedi mpoka, mokati kawo omwa kala omumati gwoomvula omilongondatu nayimwe (31) gwedhina Fredy Fillemon, ngoka aniwa paukuuva, a li shi li kombanda, ashike nee hako a valelwa, okwe ya ko a valwa nale. Oya kala nee ye wete kutya ye inashi pumbiwa ka kale mongundu yawo, oshoka ke shi omvalele yomekondjelomanguluko, noya kala aluhe taye mu lombwele a ze mo mokati kawo, ihe okwa kalaa tinda okuza mo. Mahoka na Eliaser taya tsikile taya hokolola kutya, oshinima shoka oye shi lombwela wo nOmukuluntu gwoSwapo moshitopowla sha Shana omusmaane Erastus Uutoni nosho Amushanga Omukuluntu gwEwawa lyAanyasha moSwapo Elijah Ngurare noshowo Omukuluntu gwOpolisi moshitopolwa.Uutoni aniwa ka li e shi panda nokwa kala ta gamene Fredy kutya na kale moka, naye ogwomongundu ndjoka. Ashike Ngurare, okwa li ngaa i ne shi panda sho omumati ngoka e li moka, ashike ina ninga ko sha. Omumati nguka aniwa okwa kuthile po iimaliwa yamukwawo gumwe yOondola/N$200 pehala lyawo mpoka, nokonima yoku mu pula okwa zimine noyaandjawo oya futu ko N$150. ‘Tashi ti omuntu ngoka ke li nawa nande nan kutu shi shoka ta kongo mokati ketu, oshoka ohe tu hindi wo olundji,’ Mahoka ta ti nokugwedha po nee kutya ongulohi nee yokupendukila mEtiyali lya zi ko, oya tokola ya lombwele Fredy nguka kutya na ze mo mokati kayo oshoka ke shi omunona a valelwa mekondjelomanguluko ngashi yo. Sho nee Frdey a kala ta thiminikwa ngawo okwa zi mo mehala moka, nokwa yi kOpolisi nokukalopota kutya aanona yakwawo mboka otaye mu tidhaatidha mommehala moka nomoku u tidhaatidha oye mu ningila omatilitho, ye mu tuka noku mu kuthila oombele. Opolisi ongula yEtiyali oye ya nee yi konaakone oshinima shoka. Ya etelela nee Fredy, ngoka sho ye ya m poka, ye (Opolisi) mu pula a ulike mboka ye mu ninga nayi no ye mu kuthila oombele. Fredy aniwa ta ulike po nee Omupopiliko gwOngundu yaanona ndjoka John Malumbu noshowo yalwe ngashi Nangolo Jafet, Junias Hauvinga, Martin Martin na Markus Shikukutu. Opolisi oya lombwele nee mboka yatano ya londe membamba ya ye kOsasiona yOpolisi kOshakati. Ongundu yaanona mpoka, oya tindi oshinima shoka nokutya yakwawo mboka kOsasiona yopolisi itaya yi ko naya pulilwe ashike mpoka. Opolisi shoka osho nee ya kala inayi hala noyiithana ndjoka yomambathi (Task Field Force), ndjoka ye ya meendelelo nokuthiminikila oonakukwatwapo mbaka momambamba gOpolisi. Pethimbo nee ndika lyokukwatwa po kwawo, opwa li iinima oyindji, ngashi aniwa okudhengwa noongola, yo wo aanona nayo aniwa tayi ipopile.Mahoka na Eliaser otaya ti kutya ngashi omukulunytu gwawo Malumbu okwa ya a dhengwa nayi nombulukweya ye ya li ya gwamo nokuli, Eliaser na Mahoka oshowo yalwe, mwa kwatelwa naakadhona, nayo wo oya dhengelwe aniwa noongola kOpolisi ndjoka yomambathi. Martin Martin na Markus Shikukutu, oya ka ethiwa konima esiku ndyoka, ashike Malumbu, Jafet na Hauvinga, oko ya kala hoka kOpolisi, na kaya li ya galuka pethimbo Oshifo shika sha li pu yo omutenya gwEtiyali lya zi ko. ‘Tse omulumentu ngoka inatu mu ningila uuwinayi washa, otwe mu pula ashike nombili a ze mo mokati ketu oshoka ke shi gwa mo. Ina valelwa kombanda mekondjelomanguluko ngashi tse,’ taya ti ngawo.’Ano omolwashike tu na okuningwa nayi nokudhengwa kOpolisi. Tatu umbwa nooholo dholwithi lwomahodhi nosho tuu noondjembo. Otwa ninga shike ano? Tse otu li pOombedlewa dhOswapo, pu meme, pu tate gwetu, twa pumbwa iilonga notu na uuthemba okukala mpaka nokupula omauthemba getu ku meme gwetu. Omolwashike ano tatu hindilwa pehala lya tate, meme gwetu Swapo? Aanona yoonakulwa aakulu mbaka taya pula ngawo. Taya gandja enyenyeto lyawo kutya oya koneka kutya Aapolisi mboka ha ye ya dhenge, ano haya tumwa komukuluntu gwOpolisi mOshitopolwa ku yo, ye ya dhenge, oyo mboka unene ya kala moshilongo. Ya kala mEtanga lyOmukolonyek South Africka. Taya ti mboka haya ithanwa Omakakunya kwali.’Omolwashike ano hatu tuminwa omakakunya, ogo ge ye ge tu dhenge? Esiku twa umbwa olwithi lwomahodhi pontopa ya Kandjegedi, okAapolisi ngaa mboka ya kala meni lyoshilongo, yomakakunya, naangoka a li te ya wilike ogwoshilumbu a kala meni lhyoshilongo pethimbo lyekondjelomanguluko. Mboka shewe ye tu dhenga nena, oyo ngaa mboka tuu ya kala meni lyoshilongo nale. Haye ya kutse kaye na euvathano, molwashoka kombanda kaye shi ko. Kaye shi ekondjelomanguluko, noya kala ye li ompinge nalyo. Ngashingeyi oyo nee taya longithwa kOotate nokoomeme, ano kAakuluntu yOpolisi nokEpangelo, mboka ya kala natse kombanda, yee ye tu tuke ye tu dhenge noku tu monitha iihuna ngeyi. Ngele owa ti kutya ngaye OmukwaSwapo, ohe kupula kutya, Swapo oshike. Omolwashike mboka twa kala nayo kombanda, oyo ihaye ya kutse miinima ngaashi mbika, molwashoka oyo ye uvite ko omaudhigu getu, shi vulithe pwaambaka ya kala meni lyoshilongo? Aanona pula nokutya ngawo, yo taya gwedha po taya ti kutya nOmunambelewa Omukuluntu gwOmbelewa yOswapo pu Kandjengedi mpoka, tate Kakonda, ke na nayo, oshoka na ye okwa gama kwaamboka taye ya dhenge nokukembadhala oku ya tidha po pombelewa yOswapo mpoka. Tse itatu zi po mpaka. Otwe ya ku meme gwetu Swapo e tu pe iilonga nosikola,’taya ti ngawo neyeme nokwiindila kOpolisi yi ethe yakwawo mboka ya kwatwa nokuyeleka wo omadhina gawo. Taya indile kEpangelo li endelele oku ya pa iiloonga noku ya kutha po mpoka manga inaya monithilwa po iiponga nokudhipagelwa po

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.