Aanona ya valelwa kombanda otaya ka katuka onkatu

AANONA ya valelwa mekondjelomanguluko, mboka ya unga ontanda yawo pOmbelewa yOswapo pu Kandjengedi mOshakati okuza mu Apilili nuumvo, otaya ti kutya oye na edhilaadhilo lyokukakatuka onkatu odhigu ngele nani Swapo nEpangelo ita ye ya yamukula keindilo lyawo lyokupewa iilonga ngashi ya kala noye li taya pula.

Nonande inaya popya sha yela naanaa kutya otaya ka katuka onkatu ya shike, aanona mbaka oya ti kutya otashi vulika ongula yonena taya ka maashinga nokuholola shoka ya hala okuninga ngele itaya yamukulwa nziya keindilo lyawo nokonkalo yawo ye li mo pOmbelewa yOswapo mpoka.Omukuluntu gwawo Thomas Johannes gwoomvula 27 ta ti kutya otaya indile Amushangandjayi gwOswapo me Pendukeni Iivula-ithana noshowo Oministeli yAanyasha nOmaudhano omusamane Willem Konjore yee ye ya mone meendelelo ngashi btashi vulika opo ye ya hokololele uudhigu nuupyakadhi wawo pethimbo ndika. Taya ti kutya otaya gandja ashike ompito kAawiliki yawo mbaka sigo opehulilo lyOmwedhi nguka, nange inapu ningwa sha shomupondo tashi yamukula keindilo lyawo lyokupewa iilonga nena otaya ka katuka onkatu yokwakola. ‘Otwa kala po ngaa nee ethimbo ele mpaka, itatu yamukulwa kaawiliki yetu yoSwapo, twa li ku popya, twa li kuninga omahololomadhilaadhilo getu. Otu li ashike mpaka tatu monene po iihuna. Katu pewa iikulya. Inatu pewa ootenda/oothaila dhukukala nokulala mo ngashi yakwetu komahala gamwe, ngashi kOvenduka nokOtjiwarongo. Aawiliki yOswapo, ngashi unene Omuunganeki gwOswapo mOshitopolwa sha Shana omusamane Erastus Uutoni noshowo Gavena yOshitopolwa sha Shana omusamane Klemens Kashuupulwa, kaye na ko natse. Ngele taye ya mpaka putse otaya ende po ashike ya fa taya ende poombwa. Itaye tu popitha nawa, nenge itaye tu popitha ashike nandenande. kapu na uundjugo wokwiiyogela. Opu na ashike okandjugo kamwe kokuyila kondje, hoka pethimbo ndika kuudha onyata, oshoka ohaka pombwa na ka kapombwa ando nokuli. Omeya pOmbelewa yOswapo mpaka oha ga patwa. Hatu ga pewa ashike ongula nokomatango opuwo. Iikulya katu pewa. Otatu lombwelwa kaanangeshefa yamwe mboka ya kala ya hala oku yu pa iikulya, kutya aniwa noya lombwelwa komusamane Uutoni kutya inaye tu pa iikulya. Otu li lela monkalo ombwinayi na otatu nana nondatu pethimbo ndika. Ashike nande ongawo itatu zi po mpaka manga inatu pewa iilonga,’ Johannes Thomas ta ti ngawo manga yakwawo yamwe ye mu kundukitha nokukoleka shoka ta popi, ta lombwel Oshifo shika oshiwike shika.Aanona mbaka ye li 293 otaya ti kutya oya vulwa okukala monkalo yatya ngeyi, itaya yamukulwa kAawiliki yawo yoSwapo noya tokola nee okuninga po sha sha kwata miiti. Taya ti kutya oye uvitile wo aakwashigwana yamwe nayi sho haya uhala ta ye ya pe ombedhi sho ye li pombelewa yoSwapo mpoka. Taya ti naya shune komagumbo, kaye na sho taya longo pombelewa yoSwapo mpoka. Aanona taya ti aakwashigwana mboka naye ya ethe nombili, yo oye shi sho taya ningi. Taya ti kutya yo oya uvanekelwa iilonga kEpangelo na oyo ye lile po ye yi pewe, ngashi ye yi uvanekelwa naanaa kEpangelo.Aanona otaya nyenyeta wo kutya oya uvithwa nayi omasiku ngaka sho ya kundana kutya momusholondondo gwomadhina gawo ngoka ga shangelwe omvula ya zi ko omadhina gamwe kage mo we, notaya pula nee kUuministeli wAanyasha nOmaudhano kutya omadhina ngoka kage mo we momusholondondo oga ya peni. Aanona mbaka onkee taya pula aanangeshefa ye ya kwathele moku ya pa iikwaniipangitho ngashi , iikulya, oothewa dhokwiikoha nokukoha,omandini gomeya, ootenda, omakumbatha naashoka ngaa ishewe taya vulu okub ya kwathela nasho.