Aanona taya tembudhilwa koosikola dhepangelo okuza kwaandhoka dhopaumwene

AAVALI yamwe mboka ya kala naanona ye li moosikola dhopaumwene otaya lundululile aanona yawo koosikola dhepangelo, omolwonkalo yoshimaliwa tayi kanda omapunya she etithwa keliko ndyoka tali shongola omolwombuto yocorona.

Aavali oyendji oye wete iifuta yi li pombanda noonkondo nonkene oya tembudhile aanona yawo koosikola dhepangelo ndhoka hadhi gandja elongo lyoshali.

Onkalo ndjoka yaavali oyendji ya tembudhile aanona yawo koosikola dhepangelo oye etitha yomahala ga pwa po moosikola odhindji monooli yoshilongo.

Uuminstili wElongo, Uunkulungu nOmithigululwakalo owa koneke ompumbwe yomahala unene mondondo yotango nontihetatu.

Aavali mboka ya yi moonkundathana noThe Namibian oya popi kutya okukongela aanona omahala moosikola dhepangelo oshi na ombunda, noyi indile aakuluntuwiliki yelongo ya longe nuudhiginini okumonena aanasikola omahala moosikola. Oya popi kutya onkalo moshilongo itayi shi pitike we ya tsikile nokufala aanona yawo koosikola dhopaumwene ndhoka hadhi futwa ondilo.

Gumwe gomaavali ye li molukongo lwomahala gaanona yawo, Anna Shikongo, okwa popi kutya oha meneka ongula kehe a ka kongele omwana osikola momudhingoloko gwaShakati.

Okwa popi kutya omvula ya zi ko okwa kanitha iilonga onkene shoka oshe mu thiminike a tembudhe ko omwana kosikola yopaumwene.

“Okwa li nda lalekwa miilonga omumvo gwa zi ko, nonkene ngashingeyi tandi vulu we okufuta osikola yomumwandje kosikola yopaumwene. Ombuto yocorona oye etelela omaupyakadhi ogendji nuuhupilo ngashingeyi owa gumwa lela. Iinima kayi li we ngaashi ya li. Aluhe ohandi meneka oku ka kongela omumwandje osikola ashike a pehe otandi lombwelwa ashike kutya kapu na omahala onkene oosikola itadhi taamba we,” osho a popi ngaaka.

Omuvali gulwe, Magano Jeremia, naye okwa tsu kumwe naandhoka Shikongo a popi.

“Katu na we iilonga yokolela onkene itatu vulu we oofuto dhosikola dhi li pombanda. Oosikola ngashingeyi odha ninga ondilo. Otushi kutya oosikola odhu udha shili, ashike naye tu sile ngaa ohenda, opo aanona yetu nayo ya pewe ompito yosikola,” osho a popi ngaaka.

Omukuluntuwiliki gwelongo moshitoplwa shaMusati, Benny Eiseb, okwa koleke kutya oosikola odhindji moshitopolwa shawo kadhi na we omahala gokutaamba aanona.

“Oosikola dhetu odhu udha nale. Otwa koneke aavali taya tembudhile aanona yawo koosikola dhepangelo numvo, naashoka osho unene tashi eta ompumbwe yomahala moosikola dhepangelo. Katu na naanaa shoka tatu vulu okuninga po opo tu kwathele aavali mboka.”

Okwiindile aavali mboka ye na aanona inaa ya mona oosikola ya tume omadhina gawo koombelewa dhiikandjolongo opo ombelewa yelongo moshitopolwa yi ninge onkambadhala yokutala poosikola mpoka tapu monika omahala.

“Opo tatu ka kuutumba tse tu kundathane kombinga yonkalo yomataambo moosikola. Otatu vulu owala okumonena aanona ayehe omahala moosikola pehulilo lyoshiwike shika. Aavali naya kale ashike ya ngungumana.”

OMAHALA MOSHIKOTO

Pokati mpoka, Aletta Eises, omukuluntuwiliki gwelongo moshitopolwa shaShikoto, okwa tseyitha kutya moosikola dhomoshitopolwa shawo omu na omahala ge li 765 mondondo 10.

Eises okwa popi kutya okwa li ya yakula omaindilo ge li 4 573 gaanona mboka yu uka mondondo 10, moka osekundo yaNehale kwa li ya yakula omaindilo ge li 759, mondondo ndjoka.

“Oopelesenda 98 dhaanasikola yomosekundo yaNehale ohaya zi momuhandjo, noye li moondondo dha yooloka,” osho a popi ngaaka. Okwa popi kutay onkalo yomuhandjo onkene yi li eshongo moshitopolwa shawo molwashoka omu na owala oosikola dhi li 10 ndhoka dhi na omihandjo nodhi na aanona ye li 4 380.

Eises okwa gwedha po kutya moshitopolwa shawo omu na omihandjo dhopondje yosikola ndhoka dhi na ashike aanasikola ye li 65.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.