Aaniilonga yaKati FM ye li moshipyu

Aafekelwa mboka otaku hokololwa ya kala taya longitha okakalata komahooli kiilonga okulanditha omahooli kaaniihauto monooli.

Simon Kondjashili, ngoka a tseyika nawa Mapeni Protocol, nomuniilonga gokomashina Pekka Nghikembua otaku hokololwa ya kuthwa miilonga pakathimbo omanga taya ningilwa omakonakono.

Sho a kwatathanwa naye konzonkundaneki ndjika, Kondjashili okwa popi kutya omatamaneko ngoka ta ningilwa kombinga yelongithonayi lyokakalata komahooli kiilonga, kega shi.

“Oshinima shoka ngame inandi shi uva, opo tandi shi uvu kungoye,” osho Kondjashili a popi ngaaka, nokwa popi kutya mongashingeyi okuli mefudho.

“Iihauto yoNBC ohayi longitha omahooli godiesel omanga shandje ohashi nu omahooli gopetrol,” osho Kondjashili a popi ngaaka.

Aaniilonga yamwe yoNBC oya popi kutya otashi vulika Nghikembua ke ena olunyala melongithonayi lyokakalata komahooli kiilonga, ashike nando ongaaka, ayehe Nghikembua naKondjashili otaku hokololwa ya kala ya kuthwa miilonga okuza muMei numvo.

Omatamaneko ngoka oge ya puuyelele sho taku hokololwa sha dhimbululwa kutya aaniilonga mboka yaali oya kala haya kutha okakalata kiilonga komahooli nokukala ya fa taya ka nwetha iihauto yiilonga – oToyota Etios, obbakie yoNissan, Isuzu osho wo ombesa yoVW – omanga iihauto mbyoka paushili yi li momutumba, pehala lyiilonga.

Oshiningwanima shoka otaku hokololwa sha ningwa pokati kaFebuluali naMei numvo.

“Mesiku limwe, otaku hokololwa okakalata ka longithwa okunwethwa omahooli gooN$1 600 mu yimwe yomiihauto yehangano, ashike oshihauto shoka taku popiwa sha nwethwa omahooli ngoka, osha li notenga ya pwa,” osho onzonkundaneki ya popi ngaaka.

Nghikembua otaku hokololwa a kala ha kala nokakalata kiilonga komahooli, nomathimbo gamwe okwa li he ka thigi mombelewa nonkene otaku fekelwa kutya opu na yamwe mboka ya kala haye ka yaka mo mombelewa ye noku ke ka longitha okunwetha iihauto yopaumwene.

Otaku hokololwa kutya Kondjashili okwa li a holoka miihokolola yomaihumbatonayi gomiilonga pehulilo lyomwedhi gwa zi ko komeho gomuniilonga gwoNBC, Werner Tjihuiko.

Sho a pulwa konzonkundaneki ndjika, omukuluntu gwoKati FM, meme Suoma Negumbo okwa lombwele oThe Namibian yi pule uuyelele kombinga yoshinima shoka, omukuluntu gwiipambele yomakwatathano moNBC, Umbi Karuaihe-Up.

Karuaihe-Upi okwa popi kutya oshipotha shoka oshiipambele yomeni lyehangano niihokolola kombinga yoshinima shoka oya ningwa omasiku ga zi ko sho pwa nongwa omakonakono.

“Oshinima shoka otashi ungaungiwa nasho okupitila momilandu dhomaihumbato gaaniilonga yoNBC,” osho a popi ngaaka.

Okwa koleke wo kutya Kondjashili, ngoka ha wilike oopolohalama dha yooloka moradio ndjoka yOshiwambo opamwe naNghikembua oya kutha miilonga pakathimbo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.