Aaniilonga mboka taya yala olutenda ya geela eteyo lyeuvathano

A ANIILONGA ayehe kumwe ye li 73 lwaampoka mboka haya longo kolutenda, taya yala olutenda, oye li ya geela aahona yawo yOkampani yOkutunga Oondjila nyedhina Grinaker noonkondo sho aniwa ya teya euvathano lyiilonga lyoomwedhi omugoyi okuza mu Septemba omvula ya zi ko.

Aaniilonga mbaka otaya ti kutya meti 19 Septemba omvula ya zi ko, oya shaina euvathano naahona yawo kutya otaya tameke niilonga yokuyala olutenda ndoka talu zi kOshomeya lwa thinda kOshikango okupitila mOndangwa, neuvathano oli li ngeyi kutya olyOomwedhi omugoyi okuza meti 19 Septemba omvula ya zi ko. Aaniilonga mbaka taya yelitha taya ti kutya oshiwike sha zi ko, oya mono oombapila tadhi ti kutya iilonga yawo mbyoka otayi hulu po meti 12 Apilili 2006 na oye na okushaina oombapila ndhoka kutya meti 12 Apilili nuumvo otayi ihulu mo miilonga. Oshinima shoka oshe ya geyitha noonkondo, noye wete kutya kashi li pauyuki nandenande. “Tse itatu vulu okukengelelwa ngawo notwa hala Epangelo li ye mo moshinima shika meendelelo ngashi tashi vulika, “Omupopiliko gwaaniilonga yongundu ndjika polutenda mpoka tate Pinehas Iitha ta ti ngawo nokugwedha ko kutya aagandji yiilonga yawo mboka otaya longo pondje yOveta lela. Ta ti kutya mOombapila dheuvathano omwa shangwa lela kutya okontraka yawo ndjoka otayi hulu konima yoomwedhi omugoyi okuza meti 19 Septemba 2005, na kashi li pauyuki nande ya lombwelwe pethimbo ndika, ku na natango Oomwedhin ndatu kutya iilonga oya hula po, omanga tashi vulika ya pewa oshimaliwa shawo (shaaniilonga) kEpangelo shOomwedhi ndhoka omugoyi. “Shoka shoomwedhi ndatu dha hupa ko otashi ningi po sha lye? Tate Eitha a hala okushiwa. Ta ti kutya oya kondja naahona yawo mboka noku ithana Aanambelewa yUuministeli wAaniilonga okuzilila mOndangwa, ashike nande ongawo inashi pondoka. Taye ya taya ningi oonkundathana nAanambelewa yokOkommissi yAaniilonga mOshakati meti 11 Apilili nuumvo, ashike nasho inashi kwatha sha. Oya lombwelwa ashike aniwa kutya naya tale nkene taya kandula po uupyakadhi wawo mboka naagandjiyiilonga yawo mboka. Kepulo, Omunambelewa mu Grinaker ngoka e na sha naaniilonga John Lamahalape, okwa ti kutya ye ke na naanaa oshindji okutya ko sha koshinima shoka, molwashoka otashi vulika pu na yamwe kaye uviteko shoka shi li meuvathano ndika, noya tegelela ashike ngoka ta vulu okuya fatululila mo nawa oshikalimo sheuvathano ndjoka.