Aanandholongo yaali ya kwatwa taya dhenge aantu ‘mokatoo’

AANANDHOLONGO yaali ye li mondjeedhililo yaVenduka otaku hokololwa ya longitha ekwashilipaleko lyiifuta lyopaineya okulanda oshihauto, nolwanima oye shi landitha po kooN$33 000.

Omupevikomufalandjayi gwoshikondo shoondholongo moshilongo, Johannes Konjore, okwa koleke uukengeleledhi mboka nokwapopi kutya oshihauto tashi popiwa sho-Chevrolet Corsa, osha yakwa okupitila mokatoo hoka ka dhanwa okupitila pangodhi ndjoka aanandholongo ya pititha nokukala nayo mondholongo.

Mwene gwoshihauto shoka, ngoka e shiwike konzonkundaneki ndjika, okwa popi kutya okwa li a tula iipindi koFacebook a hala okulanditha po oshihauto she, nokwa li sha monika kaantu yaali ye shi hala [aanandholongo], noya kwatathana naye noku mu lombwela kutya oye li moKeetmanshoop noye na ohokwe yoku shi landa po meendelelo.

Okuza mpoka oye mu lombwele a fale oshihauto kohondakadhona yahekulu [gwaanandholongo mboka]. Mwene gwoshihauto okwa lombwelwa kutya anuwa hekulu ngoka omusita.

Mwene gwoshihauto shoka okwa hokololele oThe Namibian kutya aanandholongo mboka oye mu tumine omukanda gwiifundja gwiineya ngoka tagu ulike ekwashilipaleko kutya oshimaliwa shokulanda po oshihauto shoka, osha futwa nale. Nonande oshimaliwa shoka kasha li nande sha lopota komayalulo gombaanga ga mwene gwoshihauto, ookalyamupombo mboka yaanandholongo oye mu lombwele kutya molwashoka otashi tumwa okuza kombaanga ya yooloka kwaandjoka ha longitha otashi vulika shi pule oowili nenge omasiku opo shi lopote kuye.

Okuza mpoka [aanandholongo mboka] oya tumu ‘omupangeli gwiihauto’ iile ko oshihauto shoka opo e ke shi ‘tunte mo’ molwashoka okwa li tashi monika sha pumbwa okwoopalekwa kashona.

Ashike nani pethimbo ndyoka a gandja oshihauto shoka, aanandholongo oya tameka nale nokushingitha komalungula unene tuu koFacebook taya landitha po oshihauto osho tuu shoka.

Momasiku 3 Desemba mwene gwoshihauto okwa kwatwa komalimbililo goshimaliwa inaashi thika natango komayalulo gombaanga ye, onkene okwa ningi onkambadhala yokuya kombaanga a ka pule kutya oshimaliwa shoka osha hulile peni. Tango okwa lombwelwa kombaanga kutya otashi vulika omakwatathano gomakuthikuthi gombaanga ogo taga shongolola, onkene ohashi vulu okupula olule opo shi lopote.

Ashike lwanima sho u ulukile ombaanga omukanda gwiifuta ngoka a pewa kookalyamupombo yomondholongo tagu ulike kutya oshimaliwa osha futwa nale, okwa lombwelwa kombaanga kutya itashi tsu kumwe nuuyelele womombaanga onkene kapu na uushili miifuta mbyoka.

Okuza mpoka okwa yi kegumbo ‘lyomusita’ a ka tale ko oshihauto she oshoka okwa mona kutya okwa kengelelwa, ashike okwa lombwelwa kutya oshihauto oshaya ‘nomupangeli’.

Pokati mpoka, omupolisi gwomoRundu ngoka a tindi edhina lye li tumbulwe moshifonkundaneki, mOmaandaha gomasiku 6 Desemba, okwi itsu oshihauto shoka tashi landithwa nokwa holola ohokwe nokwe shi landa po mbala kooN$33 000.

Konima sho a pewa oshihauto she, okwa lombwelwa kutya omikanda dhoshihauto shoka ote ke dhi tuminwa lwanima notadhi zi kOtavi.

Ashike oodokumente dhoshihauto shoka inadhi tumwa we nonande oya kala ya tegelela, okuza mpoka mumwayinagona gwomupolisi ngoka oye a li a tumidhwa melando lyoshihauto shoka mOvenduka, okwa tokola opo oshinima shoka e shi fale momake gopolisi yoshilandopangelo, naashoka okwa li she eta gumwe gomaanandholongo mboka yaali a galule oshimaliwa shoka sha futwa ohauto ndjoka.

“Oshihauto shoka osha yakwa okuza komuntu gulwe okupitila pamukanda gwiineya gwekwashilipaleko lyiifuta, nosha landithwa po, oshiwike osho tuu shoka,” osho omumwayinagona gwomupolisi, a popi ngaaka.

MEtitatu lya zi ko elelo lyondholongo moshilongo, olya tseyithilwa oshiningwanima shoka konima sho aanandholongo mboka yaali ya yi molugodhi shi na sha noshimaliwa shokatoo hoka ya dhana. Oonakuninga oshihakanwa shokatoo hoka ayehe oya galulilwa ayihe mbyoka ya li ya kanitha.

“Elago enene, oshimaliwa ashihe osha galulwa. Gumwe gwomaanandholongo mboka okwa li i iyamba nokufuta oshimaliwa shoka,” osho mumwayinagona gwomupolisi a popi ngaaka.

Mwene gwoshihauto okwa popi kutya okwa nyanyukwa okukala a mona oshihauto she. “Otandi pandula omupolisi Armas,” osho a popi ngaaka.

Omupoliko gwopolisi yoshilandopangelo, Cillie Kapolo, okwa popi kutya oshiningwanima shoka oye shi uva, ashike ita vulu okugandja uuyelele womuule.

“Iiningwanima yi li ngaaka ohayi vulu okuningwa, ashike shoka oshi li kohi yomakonakono,” osho a popi ngaaka. Konjore ota indile oshigwana shi hulithe po epititho lyoongodhi okuya moondholongo. “Ohashi eta uupyakadhi lela momandiki goondholongo. Muka, otu na uumbangi waashoka haya vulu okuninga uuna ye na oongodhi,” osho a popi ngaaka.

Konjore okwa popi kutya aanandholongo okwa li yi itsu pethimbo ya li taya kondjele oshimaliwa ashike ayehe oye li monkalo yi li nawa noya kuthwa mo muyakwawo. Okwa popi kutya omakonakono moshiningwanima shoka otaga pula komeho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.