Aanamibia 22 ye edhililwa moondholongo moSouth Africa

Omupopiliko gwoshikondo shezulonkalo lyoondholongo moSouth Africa, Singabakho Nxumalo oye a gandja uuyelele mboka konzonkundaneki ndjika, nokwa popi kutya mAanamibia mboka ye edhililwa moshilongo shawo, kamu na nande gumwe omukiintu.

Nxumalo okwa gwedha po kutya yaali yomAanamibia mboka ye li moondjedhililo dhaSouth Africa, gumwe okwa tulwa miipandeko sho a adhika niilwitho shaa li paveta omanga mukwawo okwa li a adhika niingangamithi.

Pauyelele mboka a gandja, Nxumalo okwa popi kutya Aanamibia 16 oye edhililwa moondholongo 11 tadhi adhika moshitopolwa shaWestern Cape, omanga yalwe oye edhililwa mondholongo yaModderbee, moGauteng.

Okwa gwedha po kutya Aanamibia yaali oye edhililwa moSt Albans Maximum osho wo moSt Albans Medium B moshitopolwa shaEastern Cape, omanga yaali oya edhililwa mondholongo yaBizzah Makhate CCA moFree Statesho, osho wo mondjeedhililo yaLosperfontein – moLimpopo.

Nxumalo okwa popi kutya kaye wete Aanamibia mboka ye edhililwa moSouth Africa taya vulu okutuminwa koNamibia opo ya longele omageelo gawo kegumbo molwashoka omapangelo gopaali kage na euvathanotsokumwe lyokupitika omulandu ngoka.

South Africa okwi ipyakidhila nokutala omulandu gwaanandholongo mboka kaaye shi yomoshilongo shawo, opo ya tale oonkambadhala dhokutuma aanandholongo ya ka longele omageelo gawo moondjeedhililo dhokiilongo yawo.

Komufalandjayi gwoshikondo shomazulonkalo goondholongo moNamibia, Raphael Hamunyela, okwa popi kutya ompangelo gopaali lyaSouth Africa nolyaNamibia, kage na euvathanotsokumwe lyokugalula Aanamibia mboka ye li moondholongo opo ya longele ko omageelo gawo moNamibia.

“Otu na owala euvathanotsokumwe ndyoka naZambia osho wo Angola. Nongashingeyi otwi ipyakidhila nokumana euvathano ngandyoka naBotswana,” osho Hamunyela a lombwele oThe Namibian ngaaka, uunambo.

Gumwe gomAanamibia mboka ye edhililwa moondholongo koSouth Africa oUrbanus Shaumbwako, ngoka oye gumwe gomAanamibia yatano mboka taya fekelwa moshikumungu sheyako lyomofaalama yomupresitente gwaSouth Africa Cyril Ramaphosa yedhina Phala Phala moka taku hokololwa mwa yakwa oshimaliwa shooUS$4 (shi thike poomiliyona N$60).

Iikundaneki moSouth Africa, petameko lyomwedhi gwa zi ko oya kundaneke kombinga yaangoka a li omukuluntu gwopolisi yomonanguwi osho wo oondholongo moSouth Africa, Arthur Fraser, e eta puuyelele omatamaneko kombonga yAanamibia ya yaka oshimaliwa mofaalama yaRamaphosa muFebuluali 2020 ashike oshinima shoka osha holekwa.

Fraser okwa tumbula kutya Aanamibia mboka taya fekelwa eyako lyoshimaliwa shoka oyo Shaumbwako, Petrus Muhekeni, Erkki Shikongo, Petrus Afrikaner osho wo Immanuel David – ngoka oye taku hokololwa omudhani nkandangala omunene.

Pauyelele wa gandjwa kuFraser, aafekelwa mboka otaku hololwa ya futwa kuRamaphosa opo ya mwenene oshiningwanima shoka.

ENDJONDJELO LYOONDJEMBO MO-SA

Iikundaneki yomoSouth Afica okwa li ya lopota kutya Shaumbwako, ngoka a yambukile kOkalongo moshitopolwa shaMusati, okwa tulwa miipandeko mo2020 pethimbo a li a yanda okupita pomboloka yaCape Town. Shaumbwako otaku hokololwa a adhika noondjembo 12 ndhoka dha shangithwa kohi yedhina lyopolisi yaNamibia.

Numvo, aapolisi yatano oya tulwa miipandeko taya tamanekelwa eyako lyoondjembo 178 dhongushu yoomiliyona N$2,5 nodha kwatela mo oomboma, oondjembo dhoAK-47, oomboma dhopeke, osho wo iikutimulilo.

Aafekelwa mboka yatano oyo Loini Shoondi (56). Kavari Mutuari (34), Fredricks Jacobus, Petrus Vilonel (60), osho wo Laban Hoveka Uaundjua (57).

Omakonakono gopolisi ogu ulike kutya aafekelwa mboka oye shi pondola okuyaka oondjembo osho wo omaliko galwe gopolisi pokati ko2009 naDesemba gwo2021 niilwitho mbyoka oya kala taye yi landitha po nokuniwe uumbanda kutya otashi vulika yi li momake gaalongi yiikulumuna.

Onzonkundaneki ndjika oya tseyithilwa kutya oondjembo dhimwe okwa li dha landithwa po moCape Town pokati ko2019 nomumvo gwa zi ko.

Oondjmbo ndhoka – dhomadhina ngaashi Berettas, Brownings, Walther P38, osho wo CZ75 – otaku hokololwa dha landithwa po koshimaliwa shi li pokati kooN$15 000 nooN$25 000, molukanda talu ithanwa Phillipi moCape Town.

Ashike nando ongaaka, omupopiliko gwopolisi moshilongo, omupevikomufala Kauna Shikwambi okwa lombwele onzonkundaneki ndjika omwedhi gwa zi ko, kutya kaye na nande oshipotha shimwe ya ndhindhilika kombinga yoondjembo dhopolisi dha ndjondjelwa koSouth Africa okuza moNamibia.

Okwa popi kutya yimwe yomoondjembo dhopolisi ndhoka dha yakwa mopolisi okwa li ya adhika naPaulus Mweshininga Tomas (64).

Tomas okwa li a adhika nombistoli osho wo ooholo 50 nokwa tulwa miipandeko nokupatululilwa oshipotha shokukala niilwitho [ondjembo osho wo ooholo] tayi fekelwa ya yakwa, okukala nondjembo omanga ke ena omukandapitikilo osho wo onkambadhala yokuya oveta moshipala.

“Okwa holoka mompangu yamangestrata gwaKahao nokwa tuminwa kompangu yamangestrata gwaVenduka moKatutura opo oshipotha she shi waimine iipotha mbyoka [yeyako lyoondjembo dhopolisi] yi li mompangu, yomoKatutura,” osho Shikwambi a popi ngaaka. Tomas okwa holoka mompangu yamangestrata gwaVenduka moKatutura momasiku 16 Juni 2022 nokwa pewa ompito yokwiifutila mo nooN$1 000.

Oshipotha she oshu undulilwa komasiku 11 Auguste omanga taku ningwa omakonakono ga gwedhwa po.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.