Aambaye ya vulwa okutegelela

OMPUMBWE yevi nenge omahala gokudhikwa omalukalwa mOmbaye onkene yi li shimwe shomomashongo omanene ngoka elelo lyondolopa lya taalela.

Mondolopa ndjoka yokomunkulofuta omu na oombashu dha konda po6 000 tadhi adhika molukanda lwaKuisebmond osho wo molukanda lwoombashu lwa Twaloloka, omanga molukanda lwaNaraville omuna oongalashe dhiihauto noondunda dhu udha aakalimo omo haya zi.

Oometa oonshona okuza molukanda lwaTwaloloka, otapu adhika omukulukadhi noyana yane mboka haya zi motenda, nopopepi notenda yawo otapu adhika aashiinda ye li yane nayo haya zi mootenda. Ayehe mboka ohaya landitha iinima momapandaanda noya li ye ya pehala ndyoka oomwedhi ndatu dha piti.

Meme Martha Simenda (45), ngoka ta tatekula oyana yatano osho wo omutekulu ngoka a valwa kumumwayina ngoka a hula ko nale, okwa popi kutya okwa li a tidhwa mo mombashu moka a kala ha thitha okuza mo2000. Mwene gwombashu ndjoka otaku hokololwa a li e mu tidha mo netompelo ndyoka kutya okwe edhilila mo aantu oyendji unene.

“Okwa li a tameke tango ta nyenyeta omeya. Otwa kala ashike tatu pewa omandini hagamano gomeya [goolita 25]

koshiwike, notu na oku ga longitha okuteleka, okwiiyoga osho wo okuyoga iinima yetu,” osho a popi ngaaka.

Popepi notenda ye, otapu adhika otenda ya meme Hilma Teofelus ngoka a lombwele onzokundaneki ndjika kutya mombashu moka a li ha zi nokwa li ha futu ooN$1 000 komwedhi, okwa li a tidhwa mo kuhekulu.

“Tatekulu okwa lombwele ndje ndi thige po ombashu ye molwashoka anuwa okwa hala e yi landithe po. Okwa li nde mu pula ndi yi lande po ashike okwa lombwele ndje kutya okwa mona nale ngoka teyi landa po,” osho Teofelus a hokolola ngaaka.

Simenda naTeofelus oya popi kutya oya li ya pula okomitiye yelelo lyolukanda lwaTwaloloka opo ya pewe ehala lyokudhika po oombashu dhawo, ashike elelo okwa li lya tindi.

Omunashipundi gwelelo lyokomitiye yolukanda lwoombashu lwaTwaloloka, Olga Birisamub, okwa popi kutya omakemo goomeme mboka yaali inaga thika mo nande momakutsi ge, onkene okwa popi kutya ngiika oya li ya pula ekwatho ndyoka kaantu ya puka.

“Opo ashike ndu uvu omakemo gawo. Oya manguluka okumona ndje opo ndi ya pulakene,” osho a popi ngaaka.

Muule woomwedhi ndatu sho ya kala ya yunga oontanda pehala ndyoka, omayola gwondolopa Trevino Forbes, okwa kala heya talelepo. Oya popi kutya ka kele kokuya pa iikulya nomakumbatha, okwa li wo e ya pe oshimaliwa shokuyambula po oongeshefa dhawo.

Ookilemeta dhi li pundatu okuza molukanda lwaNarravule, iilyo 1 300 yehangano lyokutunga omagumbo gombiliha lyedhina Shackdwellers Federation of Namibia, onkene ya tegelela ye etelwe po oopate. Opu na omahala gomagumbo ge li 68 ngoka ga li ga gandjwa kongundu yaantu mo2009.

Molwashoka oya vulwa okutegelela, oshiwike sha zi ko oya li ya popi kutya oya hala okudhika po oombashu dhawo kuyoyene, nonande inapu opalekwa kelelo.

Omunashipundi gwongundu ndjoka, Juliana van Wyk, okwa popi kutya otashi pula ethimbo e le unene opo ya dhike po omagumbo gawo.

“Aantu yetu oye li pomahala ga thinana. Ooyene yomagumbo moka haya zi oya hala iimaliwa yawo yokuthitha okuza maantu yetu mboka oyendji yomuyo ka kanitha iilonga omanga yamwe oondjambi dha odha shunithwa pevi. Oshihwepo ashike ya dhike po oombashu dhawo pomahala getu nokulongitha iimaliwa mbyoka hatu futu okuthitha – mokutula po omayakulo taga pumbiwa,” osho a popi ngaaka.

MEtitano lya zi ko, aakalimo ye li po200 oya li ya ningi omaindilo gokupewa omahala ge li 12 ngoka ga li taga landithwa po momudhingoloko gwaKuisebmond.

Omahala ngoka oge li oshitopolwa shomahala 81 ngoka ga li taga landithwa momudhingoloko gwaKuisebmond nogwaMeersig.

Omukuluntuwiliki gwelelo lyondolopa ta kwathela, Frans !Gonteb, okwa yelitha kutya omulandu gwelanditho lyomahala ga tumbulwa pombanda okwa li omufupi, omupu nokwa gu li puuyelele.

“Kapwa li nande pu na ngoka ta kalele po mukwawo molwashoka omahala ngoka oge na okukala medhina lyomulandi uule woomvula ntano manga inee li landitha po,” osho a popi ngaaka.

Omahala okwa li ga landithwa po kwaamboka opo taya mono omahala lwoshikando shotango naamboka ya li ye shi ningi [ye na nale omahala] otaye ke ga kuthwa uuna elelo lyondolopa lye ya totha mo pethimbo lyokuninga omakonakono gooyene yomahala.

Omahala ge li 16 ngoka ge li mo

Meersig kage na ooyene, notaga ka landithwa po komasiku twa taalela.

Ondolopa yaMbaye oyi na ehala eshona lyokutungwa omagumbo lya hupa po molwaashoka omahala omanene ngoka ngashingeyi ge li po ogopaumwene, nehala ekwawo ndyoka lyi li po lyedhina Dorob National Park, olyepangelo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.