Aalongwa ya konda po2 000 taya longitha uundjugo 6

AALONGWA ye vule po2 000 naaloningi posikola yaTobias Hainyeko Project nosho wo poAupa Indongo Primary moWindhoek ohaya longitha ashike uundjugo uhamano.

Aakuluntusikola yoosikola ndhika mbali oya holola okuuvanayi kwawo kombinga yonkalo ndjika, taya ti kayi na uuyogoki.

Oosikola dhika mbali odhe egamathana. Osikola yaTobias Hayinyeko ohayi longitha ootenda 24 okuza muFebuluali omvula ya za ko.

Omamboloka gatatu guundjugo oge li molugumbo lwaFrans Aupa Indongo Primary, kehe limwe li na uundjugo uyali – kamwe koomeme nakamwe kootate.

Job Shipanga, omukuluntusikola poFrans Aupa Indongo Primary, okwa lombwele oshikundaneki shoNampa omwedhi gwa zi ko kutya onkalo oya nayipala noonkondo, itayi vulu we okwiidhidhimikilwa.

“Sho ya tula po ootenda muFebuluali omvula ya zi ko inaya ninga elongekidho lyuundjugo, notu na okulongitha uundjugo mbuka atuhe,” Shipanga ta ti.

Okwa gwedha po kutya uundjugo ohawu thiti molwashoka ohawu longithwa kaantu oyendji noonkondo.

Konima sho uuministeli wa ndopa okutuma omuniilonga gwoku wu pangela, osikola oye wu pangelitha yo yene.

Osikola yopevi yaFrans Aupa Indongo oyi na aalongwa 1 349 naalongwa 46, manga yaTobias Hinyeko yi na aalongwa 780 naalongi 19.

Omukuluntusikola gwaTobias Hainyeko Project School, Brian Ndabeni, okwa lombwele oshikundaneki shoNampa kutya epangelo inali gwanitha po euvaneko lyokugandja uundjugo koshiputudhilo.

Nando ootenda odha tulwa po ashike pakathimbo, Ndabeni ta ti, uuministeli owa li wu uvaneke kutya otawu tula po uundjugo wopakathimbo, ashike inawu shi ninga.

Okwa ti oya kala taya longitha uundjugo wokoFrans Aupa Indongo okuza omumvo gwayi, notaya tsikile noku wu longitha nuumvo.

Okwa holola wo kutya ngiika omukundu nguka ogu li pokupotokononwa molwashoka omatungo gosikola yawo ogi ipyakidhilwa nokutungwa.

Omatungo ngoka taga tungwa oga kwatela mo omala gokulongela 12, gahamano goondondo dhopevi, manga gahamano goondondo dhopomuthika gwoseko.

Oonkambadhala dhokukundathana naGerard Vries, omunambelewa muuministeli welongo, opo a fatulule kutya ekateko oli li peni odha hulile muunyengwi molwashoka ongodhi ye kaya li tayi kuthwa po.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.