Aalikoli yomagungu ya londodhwa kopolisi

OKUZA iiwike ya piti aakwashigwana oyendji unene tuu mboka kaaye na iilonga oya mbombolokele pomahala ga yooloka oku ka likola omagungu osho wo omaankowa ngoka ge holike koyendji.

Aalikoli oya popi kutya omagungu ngoka ge li ko numvo oge ya pa ompito ombwanawa yokwiimonena sha shomoondjato okutala kutya onkalo ngashingeyi paliko otayi kanda omapunya noyendji oya kanitha nokuli iiyemo omolwetukuko lyombuto yocorona.

Ashike nonande okwa li ye wete ya ninga elago lyompito yokwiimonena sha, onkene ya taalelwa komashongo pethimbo ndika lyokulikola oshoka otaya londodhwa opo ya yande okuya momahala gaantu gopaumwene moofaalama osho wo pomahala galwe mpoka tapu adhika omagungu nomaankowa.

“Otwa kala nokuyakula omanyenyeto okuza kooyene yoofaalama dhomomudhingoloko gwOutjo okuza momasiku 24 Maalitsa kombinga yaalikoli yomagungu mboka taya thawele momahala gaantu pwaana epitikilo,” osho Paavo Iyambo, omukwatakanithi gwomakonakomno giimbuluma mopolisi yoshitopolwa sha Kunene a popi ngaaka.

Iyambo okwa popi kutya ooyene yoofaalama oya kala haya gandja ompito kaakwashigwana ya likole omagungu moofaalama dhawo ashike oya ndhindhilike kutya ohaya thigi ya yonagula nokuyaka mo iinima yawo.

“Onkene ooyene yoofaalama inaya hala we okupitikila aalikoli moofaalama dhawo noya pula nokuli opolisi yi ya kwathele moshinima shoka,” osho Iyambo a popi ngaaka.

Okwa gwedha po tati: “Ongaatuli miilonga yooveta, otatu londodha oshigwana shi yande okuya momahala gaantu oshoka ngele oya kwatwa nena oshayela oveta otayi ka longa nayo.”

Omupopiliko gUuministili wOmidhingoloko, Omakuti nOmatalelopo, Romeo Muyunda, okwa popi kutya uupyakadhi waamboka taya taaguluka nokuya momahala goofalama dhaantu pwaana epitikilo kashi shi nande oshinakugwanithwa shawo oku ya ganda.

“Uuministili owu na sha ashike naamboka taya taaguluka okuya ya ka likole omagungu moshikunino shiinamwenyo shEtosha. Otwa kwatwa ko nale omagungu kaantu yamwe mboka ya li ya adhika taya likola omagungu mEtosha shaa li papitikilo. Iikumungu yaamboka taya gwayele momahala goofaalama dhaantu oyi na oku ungaungiwa kelongelokumwe lyooyene yoofalama nopolisi,” osho Muyunda a popi ngaaka.

Pehulilo lyomwedhi gwa zi ko, onzonkundaneki ndjoka oya kundaneke kombinga yongundu yaakwashigwana mboka ya li yuunga ontanda popepi nEtosha moshitopolwa shaShikoto, ya kuthwa omagungu gawo kaanambelewa yetonatelo lyuushitwe.

Ongundu ndjoka otaku hokololwa ya li ya yunga ontanda mOnadhi popepi nomukunda Onanke momudhingoloko gwEtosha.

Ongundu ndjoka onene okwa li ya thikama po maakwashigwana ya za kiitopolwa ya yooloka ngaashi koshitopolwa shaShana, shaMusati osho wo sha Hangwena.

Muyunda pethimbo ndyoka okwa popi kutya mboka ya kuthwa omagungu oomboka ya adhika taya likola mEtosha osho wo popepi nolugumbo lwoshikunino shoka shiinamwenyo.

Muyunda pethimbo ndyoka okwa gwedha po tati: “Kapu na nande gumwe ta pewa epitikilo lyokulikola omagungu mEtosha. Otatu kalekepo nokugamenena po iinamwenyo kehe naashihe tashi adhika meni lyoshikunino shiinamwenyo.”

Aakwashigwana yamwe mboka ya ka likola omagungu nomaankowa moshitopolwa shaKunene, oya lombwele onzonkundaneki ndjika kutya oya yunga oontanda momudhingoloko gwa Kamanjab noya kala ko uule woshiwike.

Petrina Toivo ngoka a za moKandjengedhi moshitopolwa shaShana okwa holola okwaauvanawa kombinga yooyene yoofalama mboka taye ya tidhagula nokwa popi kutya enenedhiladhilo netompelo lyokukalikola omagungu okwiimomena iiyemo yokwiikwatha.

“Katu shi kutya ooyene yoofaalama ohaya kala taye tu tidhile shike uuna ye tu mono, ishewe nando ongaaka omagungu ngoka ihaye ga likola ko komiti. Eeno, otu uvite ko ngaa kutya otashi vulika pu na aantu yamwe taya longitha ompito yokulikola omagungu nonande paukwashili oye endela omalalakano gawo gi ili, ashike haatu he twe endela shoka. Tse yamwe otatu longo ashike nuudhiginini nelalakano lyokwiimonena shomboloto. Ompito yokulikola omagungu ihayi monika omumvo kehe,” osho Toivo a popi ngaaka.

Omulikoli gulwe gwomagungu, Olavi Killian, naye ina mbilipalekwa kwaashoka taya ihumbatelwa kooyene yoofaalama nokuwete kaaye na ohenda oku uva ko kutya otaya kongo uuhupilo mokulikola omagungu.

“Aantu otaya tidhagulwa kooyene yoofaalama ashike aantu yamwe oya ndjika oondjala mevi. Ohaya inyenge ashike uuna opolisi yi ithanwa. Ngame onde shi pondola okulikola oshako yookilo 50, ashike yalwe oya zi ko oonyala dhowala.

Yamwe oya li ya ka likola kokule lwokEtosha, hoka kwa nika oshiponga molwashoka oto vulu okutsakanena momuthitu niilikama.

Komahala gamwe kaku na omeya gokunwa nomidhingoloko ohadhi kala dhu udha aantu oyendji pehala limwe,” osho Killian a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.