Omudhimba gwe ogwi itsuwika kaakwanezimo pethimbo ya li yi ipyakidhila noku mu konga sha landula sho a kana konima yoshiwike.
Hekulu, Diaz Dimbare, ngoka wo a li oshitopolwa shaamboka ya li molukongo, okwa popi kutya ekano lyaThikundeko otali tilitha.
“Megumbo okwa li e ya mo kongulohi sho a li a zi mo nookuume ke. Okwa li uulalelo, naantu ayehe megumbo oya ka lala. Okuza mpoka, katu shi we shoka sha ningwa po,” osho Dimbare a popi ngaaka.
Olukongo lwaFelix olwa tamekwa sho ya kwatwa komalimbililo sho inaa galukila we kegumbo. Dimbare okwa hokolola kutya nakusa okwa li a monika lwa hugunina pondingosho yedhina Ndinoveshi Bar tayi adhika ashike popepi negumbo lyaandjawo.
Pehala mpoka omudhimba gwe gwi itsuwika, otaku hokololwa pwa li pwa kongwa ngohela ndele kapwa li pwa monika sha, ashike esiku lya landula sho pwa ka taliwa natango, olutu lwe opo lwa adhika lwa kaama kombanda yomeya momulonga.
Otaku hokololwa kutya pehala mpoka a adhika, kali li kokule naampoka pwa li pwi itsuwika omudhimba gwaMukuve Frederick Kanyanga (22), omumvo gwa zi ko.
Kanyanga okwa li omwiilongi koshiputudhilolongo shaUnam.
Dimbare okwa hokolola kutya oshiningwanima shaKanyanga ngoka a li a adhika popepi nomulonga, osho she ya thiminike okudhenga omuthindo golukongo popepi nomulonga.
“Katu shi shoka she ende po, ngele pamwe [aafekelwa] oye mu umbile momulonga ongulohi ndjoka nenge pamwe osha ningwa ethimbo lyomutenya,” osho Dimbare a popi ngaaka.
Pauyelele wa zi komupopiliko gwopolisi, inspekta omukuluntu Elifas Kuwinga, omunasikola ngoka okwa dhipagwa noshilwitho inaashi tseyika nolutu lwe olwu umbilwa momulonga nelalakano lyokukanitha iinkonti nokuya moshipala omakonakono goveta.
“Omudhimba ogwa adhika kaagu na iilyolutu oyindji,” osho a popi ngaaka.
Omakonakono gopolisi otaga pula komeho.
Omumvo gwa zi ko muJuni, omudhimba gwaKanyanga ogwi itsuwika popepi nomudhingoloko ngoka mwa adhika nakusa Thikundeko oshiwike sha zi ko, naanamukunda pethimbo ndyoka oya holola okwaauvanawa konkalo yaantu taya kana momikunda dhopomudhingoloko ngoka noye shi kwatakanitha nuumpulile.
Pethimbo ndyoka, omunashipundi gwoshitopolwa shaKavango Uuzilo, Damian Maghambayi okwa pititha omukanda tati: “Eso tali limbilike lyaMukuve otali tilitha nolye eta uumbanda moshikandjohogololo shaMukwe.
Iiningwanima ya faathana naashoka yomidhimba tadhi itsuwika oya ndhindhilikwa momudhingoloko ngoka.”
Maghambayi okwa li wo a gwedha po nokunkunkilila oshigwana shi kale sha lungama kombinga yaamboka ye li momidhingoloko dhawo.
TA LILWA KOSHIGWANA
Felix oye awike a li omumati maamwayinathana – yomusamane Basilius Thikundeko, ngoka omuhingi gwembakumbaku moshikunino shedhina Shadikongoro Green Scheme, osho wo meme Kristine Madyenge, ngoka ihaa longo.
“Sho [Felix] a valwa okwa li twa nyanyukwa noonkondo molwashoka otwa mona omukwati gwomafuma.
Okwa li tu wete kutya ota ka kala omukwathi gwetu uuna a koko nokukala ta sile oshimpwiyu aamwayina ye,” osho meme Madyenge a popi ngaaka.
Okwa tongonona omwana tati okwa li ehole omaudhano, iidhano yopamuthigululwakalo nokwa li wo omunamashendjo.
Nakusa Felix okwa li wo omudhanitanga a simanekwa momukunda nokwa li nokuli ha dhanene osipana yedhina Shadjunu Shamarawo United.
Omudheuli gwawo, Stanislaus Thiyemo okwa popi kutya ezepo lya Feliz olya thiga omwaka omunene mosipana yawo yetanga.
“Okwa li lela omudhanitanga, onkulungu. Okwa li a hogololwa nokutothwa mo ongomudhanitanga gwaamboka ye li kohi yomimvo 20 moshikandjohogololo shaMukwe. Felix okwa li a tegelelwa a kuthe ombinga muudhano mboka wa li ko mOlyomakaya, momukunda Omayara,” osho Thiyemo, a popi ngaaka.
Aavali ayehe yaFelix, okwa li ye mu yambidhidha moshipewa she shuunkulungu wokudhana etanga noya kala aluhe ye mu mangulukila a ka dhane etanga ndyoka ehole.
“Okwa li hatu yi tu ka tale sho ta dhana molwashoka otwa kala tu uvite kutya otu na oku mu yambidhidha opo e shi pondole,” osho Thikundeko a popi ngaaka.
Omulongi gwaFelix posikola yedhina Diyana Combined School, Lydia Mayavero, okwe mu tongonona ongokanona kali okanandjungu nokwa li aluhe omunyanyukwi.
“Okwa li ha kala a mangulukila kehe gumwe. Okwa li ha popi, ishewe kali ha faula ootundi, nuuna sha holoka okwa li ha gandja etompelo lyu uvitike. Okwa li ha yuulukiwa mbala uuna kosikola inee ya ko molwashoka aluhe okwa li ha kala nomahokololo,” osho Mayavero a popi ngaaka.
Felix okwa li mondondo ontihetatu.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
