AAILONGI yoshiputudhilolongo shaUnam mOvenduka mboka haya waimine ootundi dhokongulohi osho wo mboka haya zi momuhandjo oya zi mokalungu kombinga yonkalo ya lundalala yokuyugwa iinima yawo kookalyamupombo.
Aailongo mboka haya yi kootundi dhokomatango oya hokolola kutya aluhe ohaya kala muumbanda wokushuna komagumbo uuna ya zimbuka kongulohi, omanga mboka haya zi momihandjo oya popi kutya olundji ohaya yugwa iinima yawo uuna ye li mela lyondjila okuya nenge okuza kendiki lyoositola lyedhina Baines Shopping Centre moPionierspark.
Gumwe gomaailongi mboka ye li momuhandjo, Maurius Shikongo, okwa lombwele onzonkudnaneki ndjika kutya omasiku ga zi ko komatango lwopotundi 19h00 kuume ke okwa li ta zi koBaines oye awike sho a tsakanekwa kookalyamupombo mboka ye mu yugu iinima ye.
Shikongo okwa hokolola kutya kuume ke okwa yi koBaines lwopotundi 18h00, omanga e li mela lyondjila okushuna komuhandjo okwa tsakanekwa kaalumentu yatatu mboka ye mu yugu ongodhi ye yopeke osho wo iilandomwa ye.
“Elago enene oondyoka kutya ina monithwa oshiponga. Oshiningwanima shoka osha ningilwa pokati koBaines nopate ndjoka yu uka komuhandjo gwEmona moUnam. Oshiningwanima ngashoka hapo lwotango tashi ningwa. Omasiku ga piti manga inaa shi ningwa, kakadhona gumwe okw ali a yugwa iinima ye. Oshinima shoka ngashingeyi osha fa owala sha ninga onkalondjigilile,” osho a popi ngaaka.
Okwa popi kutya aalumentu mboka haye ya ponokele ohaya nuka miihwa mbyoka yi li popepi netenda lyomakuthikuthi lwopopepi nomweelo gokuya komuhandjo gwEmona.
“Oshinima hashi uvitha nayi unene ooshoka kutya aailongi ohaya vulu okuyugwa kutya ethimbo lyomutenya. Ohaya kala ya tega aailongi uuna taya zi koBaines. Oshinima lela tashi limbilike. Kapu na ethimbo ele opo mu uve omwiilongi a kwatwonkonga nenge a tsuwa,” osho a hokolola ngaaka.
Okwa popi kutya aailongi olundji ihaya kala megameno nonkene shoka oshe ya tula moshiponga shokuninga iihakanwa yookalyamupombo.
“Oosekuliti ihaya patolola we sigo okomweelo gwomuhandjo gwEmona. Shoka oshe eta omudhongoloko kaagu kale we gu na egameno. Naya andjaganeke oosekuliti negameno nali kale lya kwata miiti,” osho a popi ngaaka.
Shikongo okwa popi kutya aailongi mboka haya zi komalukanda nayo ohaya kala moshiponga.
“Opu na ootundi dhokongulohi, moka aailongi haya piti mo lela okwa toka, naashoka ohashi ya thiminike ya kwate kehe olefa yi li po, omanga yamwe ohaya ende koompadhi okuya komagumbo,” osho Shikongo a popi ngaaka.
Okwa popi kutya otashi kala nawa ngele elelo lyoshiputudhilo olya ningi omalongekidho gombesa yosikola okukala tayi fala aailongi okuza nokuya komagumbo.
‘EYUGO LYOMEENDELELO’
Omwiilongi gulwe, ngoka a tindi edhina lye li tumbulwe, okwa ponokelwa mEtiyali lya zi ko, pomatsakaneno ashike goopate ndatu okuya pomweelo gwomuhandjo gwEmona.
“Osha ningwa miipathi yeho. Oya ziilile ndje konima noya tete ohema yandje naashoka nokuli oshe eta ndi tetwe kegundji. Elago enene, oondyoka kutya oya teya uumbako wandje wokomakutsi noye wu fegula ndje. Okwa li nda tila noonkondo,” osho omwiilongi ngoka gomukiintu a hokolola ngaaka.
Oshiningwanima shoka okwa popi kutya osha ningwa lwopotundi 19h30, konima sho a piti mo notundi ye yokongulohi.
“Kapu na nande egameno. Ootundi nadhi kale hadhi ningwa kuyele opo ku yandwe onkalo yeyugo neponokelo lyaanasikola. Naahingi yootaxi ngashingeyi itaya inekelwa we,” osho a popi ngaaka.
Salom Namukwambi, ngoka hazi momuhandjo gwEmona, okwa tongonona kutya onkalo moka ye li otayi tilitha naailongi ngashingeyi ohaya kala owala muumbanda wokuyugwa.
“Unene ndjila yokuya koBaines oyo ya nika oshiponga. Kashi na nee kutya ethimbo lyomutenya nenge ethimbo lyokongulohi, oshoka uuna wu li ongoye awike, oye na owala okukuponokela,” osho a popi ngaaka.
Namukwambi okwa gwedha po kutya aailongi olundji ohaya yugwa iinima yawo moonkalo ndhoka omwiilongi hayi oye awike kositola, unene tuu okuza lwopo16h00.
“Oshinano okuza pendiki lyoositola kashi shi naanaa oshile, ashike uupyakadhi owo ashike mboka kutya kapu na egameno. Ngele owa hala okulanda iikulya yoye meendelelo, owu na owala oku shi ninga esiku lya landula nenge tamu yi ongundu.’
Ndasilohenda Iyambo, ngoka e na ootundi dhokongulohi, okwa popi kutya oha kala aluhe a pepelelwa uuna eshi pondola okuthika kegumbo okuza koontundi dhokongulohi.
Leena Ndakevondjo, ngoka ha zi momuhandjo gwEmona, okwa popi kutya ngashingeyi oha kala e li muumbanda wokuya koBaines nokwa popi kutya ihayi ko we kolupadhi.
“Oshiputudhilo nashi ninge po sha. Naya andjaganeke oosekuliti dhi kale hadhi patolola, unene tuu pomahala ngoka ga ndhindhilikwa hapu kwatelwa unene aailongi koombotsotso.”
OPATOLOLA
Omupresitente gwolutukalelipo lwaanasikola moUnam Malcolm Kambanzera oshiwike sha zi ko okwa popi kutya ombelewa ye oya yakula omanyenyeto ogendji kombinga yaailongi ya ninga iihakanwa yokuyugwa iinima yawo, nokwa popi kutya oya ninga omathaneko nomalongekidho gokukondjitha onkalo ndjoka.
“Otwa popya noosekuliti ndhoka dho li komweelo gwEmona ya kale haya patolola pomudhingoloko ngoka hapu ningilwa iiningwanima mbyoka olundji, osho wo okukala taya pititha aailongi pomahala ngoka,” osho a popi ngaaka.
Kambanzera okwa gwedha po kutya opolohalama ndjoka taya ka tula po otayi ka kala melongelokumwe lyaailongi, opolisi osho wo ehanganotonateli lyomomudhingoloko gwaPionierspark okukwathela miimbuluma yomayugo momudhingoloko gwopokati komuhandjo gwemona osho wo endiki lyaBaines.
Omunashipundi gwehanganotonateli lyomudhingoloko gwaPionierspark, Erik Strauss okwa popi tati: “Aailongi oyendji ohaya kala owala ye li moongodhi dhawo nongele ohaya nongele shoka shi li momudhingoloko gwawo uuna taya ende, naashoka ohashi kala lela sha nika oshiponga,”
Okwa popi kutya ongehangano lyokukondjitha iimbuluma momudhingoloko gwawo, ohaya patolola aluhe unene tuu kongulohi, nolundji ookalyamupombo mboka ohaya kala ya holama miihwa yi li molwaamba lwopate yopokati koshiputudhilo noBaines nuuna ya nongele tapu ende omwiilongi ohaya nuka mo noku ya yuga iinima yawo.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
