Aahingitekisa omulongo nayahetatu konima yekumba

AAHINGI yoOtekisa 18 oya kwatwapo kopolisi Etiyali. Ekwato lyawo olya landula epiyagano ndyoka lyali moondjila dhaVenduka mOmaandaha nolya tsikile ishewe ongula yEtiyali pondje yo Katutura Multi-purpose Youth Centre.

Evundakano olye etwa kaahingitekisa ta ya nyenyeta shono taya futithwa Oodola 300-00 oshoka oolamba dhootekisa dhawo inadhi patelwa kombanda yoondunda dhootekisa. Shika aahingitekisa nooyene yadho oya ti otashi yonagula iiyenditho yawo.Ehololomadhiladhilo lyoMaandaha olya kalwa kaahingitekisa omayovi gane yamwe pahalo lyawo nayalwe kethiminiko.Omanga metiyali aahingitekisa owala okuza pu ya 6 sigo 200 oyo ya li ya kutha ombinga mehololomadhiladhilo.Omugandjimulombo gwOpolisi yaVenduka Max Hipandwa okwa ti kutya yamwe yomaahingitekisa oya kwatwapo.Ya kwatwa po oshoka oyi ihumbata nayi ngaashi mOmaandaha shono ya imbi aahingitekisa yalwe yaa longe iilonga yawo.Hipandwa okwa indile aahingitekisa ya tegelele oshigongi shomo 17 Auguste 2009 pokati koNABTA nOpolisi yaVenduka manga ina ya ninga ehololomadhiladhilo momapandaanda.Ndele oshafa okwa inekela NABTA okwo kwa eta omainyengo gaahingitekisa metiyali Hipandwa tati. Pahapu dha Joseph Salomo gumwe gwaahingi yakwatwapo kopolisi, elalakano lyawo okugongala mpoka olyali opo ya tameke olweendo yuuka kuMinisteli wIiyenditho, hoka ya li taya fala omukandanyenyeto gwawo.Momushangwa nyenyeto nguka aahingitekisa oya hala pudhikwe ehangano lyawo pondje yoNABTA. Oshoka Nabta anuwa iha kundathana naahingitekisa ngele ta ningi omatokolo ge ya guma.Aahingitekisa otaya ti epangelo nali ya pitike ya totepo ehangano lyaahingitekisa lyiithikamena opo li kale tali kutha ombinga miikundathanwa ya nkene iilonga yootekisa yi na okweenda. Oshitsa oshikwawo otashi ti oolamba dhomangeneta nadhi tsikile nokulongithwa, ye Muni na gandje efatululo kombinga yombapila ombulau,noshowo kokugandja egameno kaahingitekisa. Aahingitekisa oya hala woo omahala ogendji nogaandjuka gokulondekela aafaalelwa, noshowo ekatukilo nkatu lye endelela kootekisa dha na ombapila noshowo kaahingitekisa mboka taa fekelwa ya longithwa uulingilingi. Aahingitekisa oya hala okukala oshitopolwa she potokonono lyomukundu onkene oPolisi yoshilando nayi pulakene nawa omanyenyeto gawo. Salomo ta tsikile ta ti yo oya gongala po Katutura Multi Purpose Youth Centre opo ya thindikilwe kopolisi kUuministeli wIilonga na oya li ya pewa epitikilo kopolisi yaNamibia.Ota ti yo kaya li taya eta nando epiyagano pehala mpoka yali, ta gwedhako tati aapolisi oya longitha oonkondo dhawo inaa shi pumbiwa okuya kwata po. Okwa ti wo nokutya aapolisi anuwa oya umbile okandooha komukugwomahodhi mokati ka wo, shoka sha eta opo omuhingi gumwe a falwe koshipangelo. Shono Salomo a pulwa kutya otaya ka ninga po shike, okwa ti otaya tala ngele o National Society for Human Rights (NSHR) ota yi vulu oku ya kwathela, na otaa ka ninga oshigongi opo ya tokole kutya otaya yi ngiini monakuyiwa.Omugandjimalombwelo gwoshitaasi sho Polisi moVenduka, Robert Sanjahi okwa ti ina mona eindilo lyaahingitekisa mbaka, opo ando ya maashinge okuya kUuministeli wIilonga, na ishewe etokolo lyoNABTA noPolisi ya Venduka okugongala mo17 Auguste 2009, olya li lya gwana oku keelela aahingitekisa mbaka kaaya tsikile nomaashinga yawo.Sanjahi tati oshafa aahingitekisa ya li inaa uvako nawa etokolo lyooMaandaha, ndele nando ongawo opolisi ita yi pitika opo oompango dhoshilongo dhi yonwe. Okwa lombwele The Namibian kutya ke shiwo omolwashike aahingitekisa taaya tamanekelwa tati, ngiika oya tamanekelwa molwa omakuyunguto, neyono lyombili yaayehe mOshilando. Hipandwa na Sanjahi oya ti ka ye shiwo ngele opolisi oya umbile omukugwomahodhi mokati kaahingitekisa. Kombinga ye, Omuperesidende gwoNABTA Magnus Nangombe okwiikaleke kokule noshiningwanima shOmaandaha nEtiyali ta lombwele The Namibian tati oshinima shoMaandaha osha li shi na okukala ashike oonkundathana oohupi kombinga yokupatela oolamba dhootekisa pombanda yoondunda yiihauto mbyoka. Onkene ootekisa ndhoka dha ningi ekondeka odhe shiningi momitse dhadho dhene pwaahena eziminino lya NABTA ngono itaa tsu kumwe nomaihumbato gatya ngaaka.Nangombe okwa ti, ota kwashilipaleke epangelo noshilongo ashihe nokutya NABTA ke na esiku a ninge etokolo lya tya ngaaka.Oshilongo shika ota shi lelwa koompango, no kwa indile aahingitekisa, nooyene yootekisa ya li mekondeka lyOmaandaha opo ya hulithepo omukalo gwatya ngaaka oshoka inagu pumbiwa.Ta ti NABTA ita yambidhidha shoka ya ningi, nongele oonakushininga oya kwatwa naya tseye kutya NABTA ite ya kwatha nando.Okwa ti NABTA oku uvite ombili ke uvathano lyOmaandaha li na sha noshigongi shomo 17 Auguste 2009 mpoka taka gandja omukalo omwaanawa nkene oolamba dhootekisa tadhi patelwa koondundu dhiihauto ngaashi ompango ta yi ti.