Aafuli yevi ya hala oondjindikila dha kuthwa po

Konima yomwedhi gumwe sho uuministeli womidhingoloko wi indike evi lyaa fulwe momalambo gaali muumbangalantu waNamibia, aalandithi yevi shaa li paveta oya lulilwa nale noya hala oondjindikila dhi kuthwe po moompadhi oontalala.AANANGESHEFA mboka haa landitha evi shaa li paveta miitopolwa yokuumbangalantu woshilongo [Namibia] otaa pula uuministeli womidhingoloko wu ya pitike ya tameke okufula evi momalambo ngoka wi indika, nenge wu ya pe epitikilo ya ka fule palwe.

Momukandanyenyeto ngoka ya gandja kombelewa yomunashipundi gwehangano lyaanangeshefa moNamibia, NCCI, koshitopolwa shokuumbangalantu woshilongo, Tomas Koneka Iindji, oshiwike sha zi ko, aanangeshefa otaa nyenyeta kutya inaa nyanyukilwa etokolo lyominista yomidhingoloko lyokukaleka omukandapitiko gwokufula evi pIiheke yaNakele nopOnanime lyomwedhi gwa zi ko.

Iindji okwa koleka konzonkundana ndjika kutya okwa yakula omukandakemo gwa shayinwa kaanangeshefa 60.

Omupopiliko gwuuministeli womidhingoloko, Romeo Muyunda, okwa lombwelele onzonkundana ndjika uunambo kutya omukandanyenyeto ogwa pewa ominista yomidhingoloko, Pohamba Shifeta.

Kakele kaashoka, Muyunda okwa popile mEtine lya zi ko kutya minista ota ka popitha aanangeshefa mEtitano [12 Apilili] mosaala yomauliko giipindi mOngwediva.

Kaanangeshefa, ongeshefa yokwiikuthila evi oyi na oshimaliwa, onkene oohandimwe nomahangano gotunga ohaga mono omamiliyona ogendji okupitila melanditho lyevi shaa li paveta.

Nando ongaaka, iilonga yawo oya kenyananwa kaakalimo yomidhingoloko moka haa ikuthile evi.

“Otatu pula opo omalambo ngaka gaali ga patululwe moompadhi oontalala. Iilonga yaatungi oya yiwa moshipala, molwashoka oya li yi ipyakidhila nokutunga omagumbo goshikonga shepangelo shokutunga omagumbo miitopolwa yokoNooli, ihe ngashingeyi oya thikama manga,” aanangeshefa taa tompo.

Aanangeshefa otaa nyenyeta wo kutya opu na aakwiilongo ya pewa ootendela dhokutunga omagumbo noondjila, ihe inaa indikwa ya fule evi momalambo ngoka ya tsa po.

“Ekaleko lyokufula evi momalambo gaali kominista yomidhingoloko otali yi moshipala ehumokomeho moondoolopa dhomoNooli, Oshakati, Ongwediva, Ondangwa nOshikuku,” ongundu yaanangeshefa tayi tompo, tayi gwedha po kutya shika osha tula pomutenya aaniilonga 1 500 mboka ya kanitha iilonga.

Aanangeshefa oya ti oya loloka okwiithanwa aayikuthili yevi, molwashoka yo ohaa gandja ashike evi komahangano ngoka taga tungu omagumbo kohi yoshikonga shepangelo shokutungila aakwashigwana omagumbo.

Paveta yomidhingoloko, kaku na omuntu a pitikwa a fule evi manga ina pewa onzapo yoku shi ninga, ndjoka hayi gandjwa konima ngele uuministeli owa mana okuninga omakonakono.

Onzapo otayi gandjwa ashike ngele oyendji yomaakalimo yomomudhingoloko moka kaa li ompinge niilonga yokufula evi momudhingoloko gwawo.

Okuza omvula ya zi ko, onzonkundana ndjika oya kala tayi endaenda nomahala moka hamu fulwa evi.

Aantu oyendji mboka haa fulu evi kaa na oonzapo dhoku shi ninga.

Yamwe yomuyo oya fula sigo omomayendo, manga omagumbo gayamwe ga hanagulwa po opo pomahala mpoka pu fulwe omalambo gokukutha evi.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.