Yondondo 10 ota ya tonatelwa

MINISTA yElongo Abraham Iyambo okwa ti aalongwa mboka ya pitikwa yeendulule ondondo ndjika ota ya ka talelwa ethimbo alihe opo pu konekwe ngele mbaka oyiitulamo tuu shili miilonga yawo nenge ahawe.

Iyambo okwe ya londodha kutya ita ya ka longa nuupu. Oshoka naakuluntu yawo oyena okwiithanwa ngele yo itaya longo nawa. Ota ya kala woo ta ya talwa ngele ohaya yi tuu shili kootundi ngaashi shina okukala nenge ahawe. Okwa dhimbulutha aalongwa mbaka kutya ngele oya longitha na yi ompito ndjika itapa kala we ompito ontintatu.Iyambo okwa popi ndhika pethimbo ta egulula oongulu dhenongelo poprima sikola ya Control mOngwediva Omaandaha. Okwa ti ota ka pula omuwiliki gwelongo moshitopolwa a longekidhe oshigongi naakuluntu sikola aakulu naalongi a tale ngele ota ya vulu okukwatha uuministeli we melalakano lyoku hwepopeka elongo.