Yi ilongekidhila omainyolitho ga gwedhwa po

Omolu omahogololo, gOpaupresidende nogOshigongi shOpashigwana ngoka taga ka kala ko okuza meti 27 sigo 28 Novemba nuumvo, Okommissi yOmahogololo oyi li ta yi longo noonkondo opo kehe ngoka e na uuthemba wokuhogolola a kale a shangwa noku na okakalata komahogolo.

Omaishangitho ga gwedhwa po otaga tameke meti 17 Septemba notaga kala ko sigo ometi 30 Septemba 2009 oshilongo ashihe.Oshiwike sha zi ko, Okommissi yOmahogololo oya li ya ningila aawiliki yOmainyolitho ga gwedhwa po mIikandjohogololo yomiitopolwa, Oshana, Ohangwena, Omusati nOshikoto, oshigongiilonga shomapukululo pOniipa moShikoto oya pewa omauyelele nkene ye na oku ka enditha omaishangitho ga gwedhwa po mIikandjohogololo nomIitopolwa yawo.Aawiliki yOmaishangitho ga gwedhwa po ye li 43 yomIikandjohogololo yomIitopolwa ya tumbulwa metetekelo, oshowo Aawiliki yomIitopolwa yane naapeha yawo yahetatu, oya li ya kutha ombinga moshigongiilonga shika shopOniipa oshiwike sha zi ko.