Yatatu ya tindilwa ombooloha

AAFEKELWA yatatu oya holoka mOmpangu ya Mengestrata pOmaruru mEtiyali, shi na sha nedhipago lyaakulupe yaali – Jannie (80) na Toets (75) Kruger pofaalama yawo yedhina Parry pOmaruru momasiku 12 ga Maalitsa nuumvo.

Aalumentu mbaka: Ebson Tumbireeko (28), Raphael Kahinatjo (45) nna Gabriel Elazeua (32), oya lopotelwa oshipotha shedhipago neyugo. Molwashoka kaya li ye na omunavetakalelipo, aafekelwa mbaka inaya pulwa ya lombwele Ompangu ngele oye na ondjo nenge kaye na ondjo na shika otaye shi ninga ashike uuna ya mono Omunavetakalipo.
Oshipotha shawo oshuundulilwa komasiku 20 ga Juli, opo natango ku ningwe omakonakono nosho wo ya mone Omunavetakalelipo. Aalumentu mbaka oya li ya kwatwa po mehuliloshiwike, sho aniwa ya li ye shi zimine kutya oye na mo sha medhipago lyaakulupe mbaka.
Shika oya li aniwa ye shi zimine komeho ga Mengestrata pOmaruru, Omukuluntu gwOpolisi moshitopolwa sha Erongo Komufala, Festus Shilongo, osho a lombwele The Namibian ngaaka.
Ondjembo yaakulupe mbaka na yimwe ndjoka oyo aniwa ya li ya longithwa mokuya dhipaga, odha li dha adhika na yaali yomaafekelwa m baka, Shilongo osho a popi.
Molwashoka eholoko mOmpangu lyaalumentu mbaka olya li lya laata noowili hamano, aantu ye li 150 lwaampoka mboka ya li ye ya okutala kutya aafekelwa mbaka oyo oole, oya li ya vulwa okutegelela.
Manga aafekelwa mbaka inaa falwa meni lyOmpangu, Inspeka omukuluntu mOpolisi, Charles Sibolile, okwa li a lombwele aantu ayehe ya kale ya ngunguma nosho wo ya gandje kehe oshilwitho ye na komaluto gawo. Ompangu oya li yu udha noonkondo na aantu yamwe oya li ya thikama. Omweetipo gwIipotha gwEpangelo, Ileni Velikoshi okwa li a lombwele Mengestrata Kholwani Mojo Mangena kutya Epangelo oli ilongekidha okutamaneka.
Nande ongaaka, Mengestrata Mangena okwa li a popi kutya Ompangu ya Mengestrata kayi na uuthemba okupangula oshipotha shika na Omutamaneki-Ndjayi oku na okuninga etokolo ngele otashi pangulwa mOmpangu yOpashitopolwa nenge mOmpangu yOpombanda.
Aafekelwa mbaka oya li ya tindilwa ombooloha molwashoka oya longo oshikulumuna oshinene. Omonamati gwoonakudhipaga, Louis Kruger, okwa lombwele The Namibian kutya gumwe gwomaafekelwa mbaka, Elazeua, okwa li e mu longele oom vula heyali dha piti po.