Yatatu ya monika ondjo medhipago lyomuhingi taxi

OSHIPOTHA shoka sha kwata ethimbo ele kombinga yedhipago neyugo lyomuhingi gwotaxi moVenduka pehulilo lyomumvo 2004 osheya pehulilo. Aatamanekwa ayehe yatatu oya li ya monika ondjo ngaashi taya tamanekwa.

Yatatu, Samuel Eixab, Naftali Eixab na Josephat Boois oya li mompangu komeho gamengestrata, Dinah Usiku mompangu yoshitopolwa yaVenduka momu 19 Februari 2009, na oya li ya ti kayena ondjo, medhipago, nomeyugo.Mengestrata Usiku okwa mono mbaka ondjo oshiwike sha yi komatamaneko agehe gaali.Mbaka oya li ya tamanenekelwa edhipago lya Fillemon Ndeshipanda Amadhila[35] mondjila yokuya ko Kupferberg muumbugantu ninginino waVenduka mom10 ga Desemba 2004. Okwa tiwa oya yugu Amadhila osheenditho she nomwaalu gwiimaliwa kaagu shiwike noshowo iikutu ye.Pethimbo lyoshipotha Samuel Eixab okwa tindi kutya okwa li pehala mpoka pwa dhipagelwa Amadhila nenge kutya okwa li pamwe naafekelwa oyakwawo mboka yaali pethimbo lyedhipago.Naftali Eixab na Boois oya zimine kutya yo opo ya li sho Amadhila a tsuwa nokusa.Nonando Eixab okwa ti Boois oye a tsu Amadhila nokusa ,Boois kombinga ye okwa ti yo ayehe oye na mo oshitopolwa medhipago lya Amadhila.Pahokololo lya shangwa komundohotola ngoka a ningi etando lyomudhimba gwa Amadhila, okwa ti nguka okwa li a tsuwa lwo 12 nomatsuwo geli ga hamano oga ziilila kombunda.Naftali Eixab na Boois oya tile yo oya li ashike aafaalelwa mosheenditho shaAmadhila sho nguka a ponokelwa nombele.Pahapu dha Boois, Samuel Eixab okwa li ta pula a pewe iimaliwa ku Amadhila omanga temu tilitha okumutsa nombele.Boois okwa hokololele ompangu kutya, Amadhila okwa li emugalikana opo nguka kee mutse ndele shika inashi kwatha sha.Pethimbo lyeponokelo ndyoka lya eta eso, Naftali Eixab oye aniwa a li a kwata Amadhila omanga Samuel Eixab te mu tsu nombele ,nopamukalo ngoka okwa tsu woo Naftali pamutsa, osho Boois a hokolola.Boois okwa zimine kutya oye a hingi osheenditho sha Amadhila okuza pehala mpoka ya dhipagele Amadhila.Okwa ti okwa longo shika palombwelo lya Samuel Eixab ngoka a ti okwa li temu tilitha na lwahugunina opa lombwelo lya Naftali Eixab.Boois na Naftali oya kwatwa esiku limwe konima sho ya kankama peyinda lyopolisi mondjila yokuya kOkahandja.Ombinzi ndjoka ya li komatako gombulukweya ya Boois oyo ya eta opolisi yi ipule kutya opena sha shapuka. Boois okwa monika ena ombinzi sho a zimo mosheenditho a konge ombapila ye yokuhinga.Uuyelele mboka Boois a gandja kopolisi owo wa kwatitha Samuel Eixab poKhorixas esiku lya landula.Eixab okwa lombwele ompangu kutya okwa zi koVenduka okuya koKhorixas esiku oshinima shika sha ningwa.Mengestrata Usiku okwa ti otashi vulika ngiini Boois a gandje uuyelele mboka wa kwatitha Eixab ngele nguka okwa ti esiku ndyoka ka li pamwe na Boois.Usiku okwa ti ishewe esiku ndyoka Eixab a thiga po oVenduka okwa li a ti ota vulu okufutila iipundi iyali mosheenditho. Shika otashi ulike kutya ye okwa li a endelela okuthiga po oshilando.Okwa ti opena uuyelele pampito okukwatakanitha, Samuel Eixab koshinignwanima shika.Sho Naftali Eixab na Josephat Boois ya thikamekwa popolisi ayehe yaali oya fundju kombinga yombinzi ndjoka mpoka ya zi.Boois okwa li ena ethimbo okwiikala ooyakwawo mbaka konima yoshiningwanima, ndele okwa ndopa okushininga. Ye ishewe okwa thigi Amadhila ngoka a li ehamekwa pehala mpoka na ina ninga nando onkambadhala okumukwatha.Mengestrata okwa ti shika otashi ulike kutya mbaka yatatu oya longele kumwe nelalakano limwe, lyokudhipaga Amadhila nokumukutha osheenditho she .Samuel Eixab okwa siikile oshipala she sho kwatiwa oku na ondjo onga afa ahala okuulika onkumwe.Nokwati Kalunga oye ta pangele.Konima sho mengestrata Usiku a gandja etokolo lye, Eixab okwa thingi nokutuka omutamaneki, OJ Lino.Aapangulwa mbaka yatatu oye li mondholongo na ota ya tegelele ya uve egeelo lyawo mo 19 ga Maalitsa.