Yane ya kwatwa meteyo lyOngeleki ya Meege

AAGUNDJUKA yane, taku tengenekwa yomOshakati, oya kwatwa po kOpolisi ya Shakati shi na sha neteyo lyOngeleki ya Katoolika ka Roma, ya Mege noshowo oositola noondingosho dhopOmege mpoka okupenduklila Etitano lya zi ko.

Komanda gwOpolisi mOshitopolwa sha Shana Komufala gwOpolisi Ndahangwapo Kashihakumwa, ta ti aamentu mbaka yane, yatya ondjembo yomushasho, taku tengenekwa yomOshakati, ongulohi yokupendukila etitano lya zi ko, oye ya momukunda Omege gu li muumbugatuuuzilo wOshakati nokwiiteyela mOngeleki ya Katoolika ya Mege,noshowo moositola nomuundingosho wa Mege nokumbotsotsa mo iinima nokuya.Inaku shiwika nee kutya tango oye ya kOngeleki nenge okOositola nuundingosho, ashike otaku fekelwa kutya tango oye ya kOngeleki nokuya nee nawa kuundingosho. kOngeleki oya tatula mo ekende limwe nokuya meni. Taya kutha Okalehite okanene kokOhaltali. Taye ka hwameke nokukalongitha nee mokuminikila ya mone sho ya li taya kongo. Osha fa ya li ya hala unene oshimaliwa.Omudiakoni gwEgongalo lya Katoolika ka Roma lya Mege, tate Herbert Thomas, okwa lombwele The Namibian kutya sho yi iteyele mOngeleki ngawo , oya teya po omweelo gwombelewa hayi ithanwa Osakristai moka hamu pungulwa iinima iiyapuki yOngeleka, ngashi Oonguyo dhokuzalwa kAapristeli nenge unene tuu kAadiakoni naaendithi noshowo kAafumviki, uuna takuningwa Omamisa Omayapuki noshowo Omalongelokalunga, Omafumviko nosho tuu.Taya tameke okushinagula ayihe ya li moka, mwa kwatelwa oonguyo ndhoka . Taya teyagula otelefona ndjoka ya li moka nokweekelahi Ombatili yayo. Taya hadha ‘Yoyene oya li ya hala ashike oshimaliwa, oshoka iinima ayihe ya li moka, oye yi shinagula ashike noku yi thiga mpoka yi li mehalakano,’ Omudiakoni Thomas ta ti ngawo nokutsikila ko kutya okuza mpoka, oya teya po omweelo gwOshinyanga shEgongalo, moka hamu pungulwa iinima oyindji yEgongalo. Moka oya yaka mo iinima ngashi iipundi, iiyogitho yoothewa dhuusila nosho tuu iihalaka, iikangulo nokuthiga yilwe ye yi shinagula nayi noya kala ya halakana apehe mpoka. Omudiakoni Thomas ota ti shika oshikando oshitine lwaampoka Ongeleki yawo ya Mege tayi teywa kOombotsotso. Ta ti oshikando shimwe oya teyele nokuli Oshitambernakula nokuli. Ya li taya dhilaadhila kutya ando Oshiketha shiimaliwa.Komufala Kashihakumwa, ta lombwele The Namibian kutya osha fa nee shi li ngeyi kutya aamentu mbaka sho ya zi pOngeleki mpoka, oya yi kOositola nokuundingosho wa Mege.Hoka oyuumbu muundunda moka mwa li yamwe yopuundingosho mpoka nondjembo yomushasho, ndjoka ya li ya yaka pegumbo limwe mOshakati. Aantu sho ya matuka po,na yamwe ya thiga po iinima yawo ngashii Ooselefona, aamentu mbaka oye ya nokugongolola mo yimwe yomoositola kumwe nooselefona dhawo nokuya.Mokulopotelwa nee oshiningwanima shika, Komufala Kashihakumwa ta tsikile ko, Opolisi oya endelele nomokuninga ekonaakono lya kwata miiti, oya kwata po yatatu manga yomaamentu mboka noshowo oyindji yomiinima mbyoka ya yaka mOngeleki, koositola nokuundingosho. ‘Oyindji oya galulilwa nale nokuli ooyene yayo,’ Kashihakumwa ta ti ngawo nokupandula Opolisi ye sho ya longa nuudhiginini ngawo. Ye ta pandula wo noonkondo oshigwana sho tashi longele kumwe nawa nOpolisi okweeta mpoka aafuthi, oonakuninga iimbuluma ya kwatwe meendelelo kOpolisi ngawo.’ Tu tsikileni nokulongela kumwe ngawo, shigwana, opo oonakuninga iimbuluma, nomaulingilingi agehe ga vudhwe mo moshitopowla sha Shana. Omudiakoni Thomas, okwa pandula noonkondo opolisi sho ya longa nuudhiginini ngeyi nokukwata aafuthi mbaka kumwe niinima mbyoka yoshigwana ya yakele po. Ta ti unene tuu Komufala Kashihakumwa okwa gwana okupandulwa koshigwana, oshoka kiikwata, uuna a lopoptelwa sha. Oha yi ye mwene nokuli a ka konaakone shoka sha ningwa po, nonande oku na aanambelewa ye yokukonaakona.’ Tsikila ngawo Komufala, Kashihakumwa nopolisi yoye, Kalunga ote mu yambeke noku mu pa aluhe esindano miilonga yeni. Tse aakwashigwana otwiilongekidha okulongela kumwe nOpolisi ethimbo alihe, oshoka inatu hala uulingilingi niimbuluma moshitopolwa nomoshilongo shetu,’ Omudikoni Herbert Thomas ta ti nokulombwela kOmufala gwOpolisi Kashihakumwa ngawo.