Yamwe oya pumbwa natango ootenda

AANTU yamwe ya gumwa komeya gefundja moshitopolwa sha Kavango, oye li natango ya pumbwa ootenda, omakumbatha noonete dhokwiigamena koomwe.

Ndhika odha popiwa ku Ngoloneya yoshitopolwa shika John Thighuru, mOmaandaha goshiwike shika. Thighuru okwa ti moshikandjohogololo sha Mukwe omo mu na aantu oyendji ye na ompumbwe yiinima mbika.
Okwa ti Ombelewa ye oya ninga eindilo kOmbelewa yOmuprimaminista, yi ya pe natango ootenda.
Lwopokati mpoka, Oshifo shika osha kundana kutya omeya momulonga gwa Kavango nomomahala ngoka ga dhengwa komeya gefundja, oga ya pevi.
Mosoondaha, Omukuluntutseyinawa miikwameya mUuministeli, Guido van Langenhove, okwa li a popi kutya omeya momulonga gwa Kavango pu Andara oga shuna pevi.
Silvanus Uunona, naye e li Omutseyinawa miikwameya mUuministeli mbuka e li kOshakati, okwa ti kutya omeya miishana mOnooli nago oga piti po na aantu yamwe mboka ya li ya tembuka momagumbo gawo (sho ga li ga yi kohi yomeya), oya shuna komalukalwa gawo.
Ihe oolopota okuzilila koshitopolwa sha Caprivi otadhi ti kutya aantu moshitopolwa shika onkee ye li moshiponga shefundja.
Oshiwike sha zi ko, omulakanda gamwe moshikandjohogololo sha Katima Mulilo Rural ngashi ndokwa lwa Ibbu, Mutikitila na Mahundu, oga li ga dhengwa momeya gefundja etalala, lya nuka momulonga gwa Chobe nomedhiya lya Liambezi.