Yamwe mOutapi taya nyenyeta egandjo lyomeya

AAKALIMO oyendji mondoolopa yAutapi mOshitopolwa sha Musati, unene tuu mboka yomoshitopolwa sha Federation na Tobias Hainyeko lwaahoka, kaye uvitile Elelo lyawo lyAutapi ombili shi na sha negandjo lyomeya mehala lyawo moka.

Aakalimo mbaka taya ti kutya Elelo lyOndoolopa yAutapi olya kutha po omukalo gwokulanda omeya nOkakalata nokutula po elando lyomeya peke, ano omuntu to futu edini oosenda omilongontano, to dhi gandja pethimbo to teke omeya goye.Gumwe gwomaakalimo meme Sophia Johannes, ta ti okuza tuu sho Elelo lya kutha po elando lyomeya nokakalata, olya tula po uupomba walyo womeya utatu lwaampoka moshitopolwa shomagumbo gOoShack Dwellers, ano sho Federation. Tali tula po aantu yalyo mboka haya pewa tango oshimaliwa manga ino teka mpoka. Elelo tali tula po kutya ofuto yomeya ngoka oosenda omilongontano mEndini. Uupomba mboka ohau egulula lwaa li mesiku. Ongula, okuza pohamano yongula sigo omugoyi gwongula. Komatango okuza pone sigo opoheyali yokomatango.Meme Sophia ota ti kutya oshinima shika oshe ya etela uudhigu uunene. Ta ti okwatya ngaa oshimaliwa shoka oshindji, oshoka haaluhe omuntu wu na oshimaliwa, omanga omuntu wa pumbwa omeya ethimbo alihe. Omeya ogo omwenyo. Oshinima shimwe oshitopolwa oshi na aantu oyendji nopuupomba mpoka ohapu kala omikweyo omileeleka. Oshinima shoka tashi tokelitha oyendji okuya kiilonga nokomaipyakidhilo galwe gi ili, omanga tashi tokelitha wo aanasikola okuya koosikola dhawo.Aakalimo otaya ti wo kutya oye na onkalo yuundjugo ya naipala nayi noonkondo. Taya ti kutya sho kwa lokwa ngeyi, uundjugo wawo owuudha omeya gomvula ge li mumwe nogohanya nosha eta lela onkalo yaa na okulinawa moshitopolwandoolopa shawo moka.Mokumonathana nOmunambelewa Omukuluntu gwOndoolopa yAutapi tate Oswin Namakalu, okwa koleke kutya opu na shili onkalo yegandjo lyomeya yatya ngawo. Ta ti sha etwa sho Okampani ndjoka ya li hayi gandja omeya pamukalo gwuukalata ya mbangolota nokuthiga po oshitopolwa. Namakalu ta ti okuza mpoka Elelo olya tula po nee omukalo gwokugandja omeya koshigwana, tali ga landitha pamukalo ngoka. ‘Elelo olya tala kutya aantu yalyo itashi vulika ya kale kaye na omeya, lyo wo Elelo itali vulu okugandja omeya oshali koshigwana. Omukalo nguka ogu li po ashike pakathimbo, notandi indile oshigwana shi idhidhimike manga tatu longekidha po sha shi li nawa shokugandja omeya kusho,’ tate Namakalu ta ti ngawo nokugwedha po ta yelitha kutya oya mona po nale Okampani yimwe yi li kOtjiwarongo ndjoka tashi vulika yi galule omukalo omukulu gwokulanda omeya nuukalata. Namakalu ta ti shampa ashike Elelo lya opaleke onkalo yOmulekeneno gwiimaliwa gwalyo, nena ayihe otayi ka enda ishewe nawa.Omeya nolusheno miilando ogo onzo yiiyemo yondoolopa.