Yaheyali ya si moshiponga

AANTU yaheyali oya si moshiponga sheipumumomumwe lyiiyenditho pokati koVenduka nOkahandja uusiku woSoondaha ya piti.

Oshiponga shika osha thiminike omukuluntu gwopolisi, Leitenanda Ndjayi, Sebastian Ndeitunga a gandje elombwelo kutya omuhingi gwombesa ndjoka ta ku fekelwa ya eta oshiponga okuna okukwatwa nokutamanekwa konima ngele a lalekwa mo moshipangelo.Omukuluntu gwopolisi okwa tilitha woo kutya ngele iiponga yatya ngaaka itayi shuna pevi ota pa ka katukwa onkatu okwiindika uumbesa waa hinge we ethimbo lyuusiku. Oonakusa yatatu yomuyaheyali oya pipo itaa ya vulu okudhimbululwa. Oshiponga shoka sha ningilwa konyala oshinano shookilometa 10 kuumbangalantu weinda lyopolisi pondje yo Venduka, osha li pokati kombesa nohauto yobakkie yo Nissan. Moshiponga shika iiyenditho mbika oyi idhenge mumwe omutse nomutse.Ota ku tengenekwa kutya mombesa omwa li ekende lyomahooli ndyoka lya tema omulilo. Aantu mboka omidhimba dhawao dha pipo itaa dhi dhimbululwa oomboka ya li mohauto ndjoka oshona yobakkie yo Nissan. Omufaalelwa gumwe otaku hokololwa eli monkalo ombwiinayi moICU moshipangelo shimwe mo Venduka.Ndjayi Ndeitunga sho a popi poshigongi shoonkundana omaandaha okwa ulike euvo nayi lye nokwa uvaneke kutya ngele omaso gatya ngaaka niiponga yoludhi ndoka ita yi hulithwapo moondjila, uumbesa otawu ka thiminikwa wu hinge ashike pokati kotundi 004h00 notundi onti 20h00. Ndeitunga okwa ti okwa nyanyalithwa koshiningwanima shoka, oshiningwanima sha etele oshigwana oluhodhi, oshigwana ta shi lili molwa oshiponga sheetwa kuuhasha mokuhinga. Pahapu dha Ndeitunga omuhingi gwombesa okwa li ta pitilile osheenditho oshikwawo pehala lya indikwa okushininga. A ti omaso ngoka oga li taga vulu okuyandwa. Otaku lopotwa kutya onkalo yomuhingi oyi li hwepo moombete dhoshipangelo sha Katolika moVenduka. Ndeitunga okwa lombwele opolisi opo omuhingi ngoka a langelwe sigo uuna ndoka a lalekwa mo moshipangelo ye ta kwatwa nokutamanekwa. Okwa ti woo okwa hala omuhingi nguka a konakonwe nkene a mono ombapila ndjika yokuhinga. Okwa ti ooyene yuumbesa na yo woo oya pumbwa okweetwa komeho gompango, opo na yo ya uve uululu wompango. Okwa ti oku shishi kutya kapena oveta ta yi indike uumbesa kaa wu ende uusiku ndele ye okwiilongekidha okuya kohofa opo a indile ompangu yi ngambeke okweenda kuumbesa ku kale ashike pokati kotundi ontine yongula notundi ontihetatu yokungulohi. Okwa ti ye ina hala oku ya uuthemba waanangeshefa moshipala ndele ngele osha pumbiwa nena shika oshina okuningwa. Okwa pangula woo aahingi yuumbesa mboka ha ya futitha aafalelwa yawo iimaliwa oyindji, yo ta ye ke ya dhipaga mokuhinga nayi. Okwa indile woo aalongithi yiiyenditho opo ya boikote uumbesa, nenge ya longithe eshina lyokolutenda, nando oha li ende kashona, a ti oshihwepo okuthika kwatoka okuyeleka noku ya kegumbo omuntu eli miipambu nomoshiketha shomudhimba. Sigo oompaka aantu 39 oya si miiponga yiiyenditho okuza mo 28 ga November 2010. Opolisi nehangano lyuumbesa nootekisa lya Namibia ota ya ka gongala metine ndika muumbangalantu okukundathana shoka tashi ningwa po.