Yaali ya si sho ya nu oshikundu, tashi vulika shi na uuzigo pOkamwandi

OPOLISI mOshitopolwa sha Musati otayi konaakona oshinima sheso, sho aakalimo yaali yomomukunda Okamwandi Kanghwii mOmbalantu mOshitopolwa sha Musati, ya si sho ya nu oshikundu, tashi vulika sha li shi na uuzigo.

Omupopiliko gwOpolisi mOshitopolwa sha Musati, Warranda Offisa, Linekela Shikongo ta ti oonakusa mboka yaali oyo Johannes Andowa gwoomvula 43 noshowo omonagona, Etuhole Namene Andowa. Warranda Offisa Shikongo ta ti, pauyelele mboka ye na po, oshi li ngeyi kutya, oshikundu shoka shanuwa kaakalimo mbaka osha dhungilwe ku Etuhole oku pendukila meti 29 Apilili 2012. Esiku nee ndyoka lyeti 29 Apilili, sho ya penduka manga ina ya ,ya mepya ya ka teye, Johannes na Etuhole oya nu mo tango moshikundu shawo opo ya ka longe ye na oonkondo. Oya yi mepya ya ka longe nashi ye li moka, kehe gumwe okwa lombwele mukwawo kutya, konima sho a nu oshikundu megumbo, okuuvite mela. Megumbo omwa li aanona yaali, okamati kamwe koomvula omulongonayimwe noshowo okakadhona komvula yimwe. Nawo, wo, owa nu mo moshikundu moka nowa tameke wo tau ehama mela. Oya ithana aashiinda noku ya lombwela. Johannes, Etuhole nuunona mbuka uyali meti 30 Apilili 2012,, oya falwa kOshipangelo shAutapi. Molwashoka Etuhole aniwa okwa li ta ehamenene, okwa falwa kOshipangelo shEpangelo sha Shakati, hoka meti 2 Mei 2012 a mana oondjenda dhe. Johannes ngoka a li a thigala koshipangelo shAutapi, naye okwa hulitha meti 3 Mei 2012. Uunona owa hupa moshiponga shika shenwo lyoshikundu. Oondohotola aniwa otaya ti kutya otashi vulika muusila mboka wa dhungithwa oshikundu mwali mu na uuzigo nenge wa zi niilya moshigandhi nenge poshipale. Warranda Oofisa Shikongo ota ti yo, Opolisi kumwe nAataleli yUukalinawa mUuministeli wUuhaku otaya tsikikle oku ninga omakonaakono moshinima shika.