Yaali ya sa moshiponga shohauto

AAGUNDJUKA yaali aamwayinathana yomOshakati, Guilherme Manuel Moche gwoomvula 27 noshowo Thompson Lindoko Moche gwoomvula 25, oya si eso lyombaadhilila sho ohauto moka ya li mo yi idhenge mumwe nonkwawo omutenya gwOlyomakaya ga zi ko geti 18 Apilili 2009 mondjila onene yopokati kOndangwa nOhangwena.

Aamati mbaka yaali oyomunangeshefa a tseyika nawa mOshakati tate Matias Manuel Moche, mwene gwOongeshefa dhedhina Shitenya Bar, a tseyika wo nawa nedhina Shitenya Bar, gwomOneshila mOshakati.
Otaku tiwa kutya, aamati mbaka, ye li aapangeli yIihauto, ano oomakeninga, esiku ndyoka oya adhika taya zi kOshakati ya thinda kOshikango. Taku tiwa kutya oya li mOtekisa.
Ookilometa dhontumbantuma okuza mOndangwa ohauto yawo ndjika oyi idhenge mumwe nokwawo na Thompson otaku tiwa kutya opo a hulithila pehala mpoka ya monena oshiponga.
Guilherme nayakwawo yaheyali oya li ya mona iiponga unene meidhengomumwe lyiihauto mbika iyali noya falwa nziya koshipangelo sha Nandjokwe, hoka Guilherme a ka hulithila mEtitatu lyoshiwike shika, ano meti 22 Apilili 2009.
Shika oshikogo lela oshiluudhe kAakwaMoche, ano kaakwa tate Shitenyabar, kaakwanezimo, kookuume kawo nokoshigwana ashihe shomOneshila nomOshakati muukwaluukehe, molwashoka inapu pita ethimbo ele, sho omonakadhona gwa tate Moche, me Tita Moche na ye a mana oondjenda dhe ombaadhilila kwali moshiponga shohauto pokati kOshakati nOndangwa, natango a adhikile a thinda lwokOshikango tuu hoka nokatekisa.
Aakwa tate Moche Aakatoolika ka Roma, yomEgongalo lyawo lyaKatoolika ka Roma mOshakati notwa kundana nee kutya nakusa Thompson na Guilherme otaya fumvikwa ngula mOlyomakaya mOmawendo gElelo lya Ngwediva mOngwedivaokuzilila mOngeleka yawo ya Katoolika ka Roma mOshakati. Elongelofumviko lyawo mOngeleka ya Shakati moka, otali ka tameka pomugoyi gwongula omanga Oshituthidhimbulutho shawo tashi kala ko komatango gonena mEtitano pegumbo lyawo, pOshitenya Bar mOneshila mOshakati, tashi tameke pontano (17H00) yokomatango.
Opolisi, ndjoka tayi konaakona kutya oshiponga shika osha enda naanaa ngiini, otayi ningi eindilo lya mana mo kaahingi yiihauto, unene tuu kaahingi yOotekisa, unene tuu mboka yiinano iile, ya hinge nawa nuukeka nonoshimpwiyu oshinene shoomwenyo dhaamtu mboka ya humbata. Oshifo shetu otashi gandja omahekeleko koonakuthigwapo atuheni.