Yaali ya kwatwa po shi na sha neyakopo lyiikulya yoshikukuta mOkavango

RUNDU – Onkundana okuzilila ko Rundu moshitopolwa sha Kavango otayi ti kutya Opolisi oya kwata po ishewe aantu yaali shi na sha neyakopo lyiikulya mOkamba yAakwiita po Rundu.

Ngashiingeyi aantu mboka ya kwatwa po shi na sha noshinima shika oye li ya heyali.. Aafekelwa mbaka yaali oyo Muyenga Toivo (gwoomvula 44) e li omuniilonga mOombelewa dhElelo lyoshitopolwa sha Kavango na Nakambare Damian (34), ha longo mUuministeli wIinima yAakiintu nAanona.
Aafakelwa mbaka yaali oya kwatwa po momasiku 1 ga Febuluali na oya holokele mOmpangu ya Mengestrata po Rundu esiku lya landula.
Oshipotha shawo oshuundulilwa komasiku 20 ga Maalitsa, moka taya ka holoka mOmpangu pamwe nayakwawo mbeyaka yatano. Aafekelwa yatano mboka ya kwatwa po tango, mokati kawo omu na iilyo ine yEtanga lyEgameno nomukwashigwana gumwe na oya holokole mOmpangu ya Mengestrata po Rundu momasiku 30 ga Januali.
Aafekelwa mbaka oyo nee Andreas Alias, Katondo Junias (ayehe ye li oondalaiva mOkamba), Ananias Leonard (omutonateli gwOkamba), Nuukushu Kleopas ( e na oranka yUushisanda mEtanga lyEgameno) na Shikongo Kasiona, omuniilonga mOmbelewa dhElelo lyoshitopolwa sha Kavango.
Otaku fekelwa kutya aantu mbaka oya yaka po iikulya yoshhikukuta, mbyoka ya kwatela mo omagadhi gokuteleka, uushako wuusila wepungu noondooha dhoohi – ye dhi yaka mondunda yokupungula iikulya pOkamba ndjika e taye ke yi landitha po kaakwashigwana pethimbo lyefudho lya Desemba.
Ayehe yaheyali oya ningilwa oshipotha shuufuthi na kehe gumwe okwa li a pewa ombooloha yOondola/N$5 000.
– Nampa