Yaali ya hala epandaanda lyaGloudina

EPANDAANDA lya Gloudina momukunda gwa Ludwigsdorf, moWindhoek ota li kondjelwa koongundu mbali.

Ehilathano ndika ngashingeyi oli li miikaha ya meya gwa Windhoek , Mathew Shikongo opo eli monene eyamukulo, oshoka olya nyengana.Oshinima osha zi mpoka kutya minista Pendukeni Ivula Ithana na komufala gwopombanda gwa Zambia mo Namibia, Mavis Muyunda, ayehe polwawo oya hala epandaanda ndika lyi lukilwe omuntu gwaandjawo.Minista Ivula-Ithana ota ku tiwa okwa hala nenge okwa thaneke ndika li lukilwe nakusa omusamane gwe Joseph Mukwayu Ithana omolwa shoka a gandja mekondjelomanguluko lyoshilongo shi, na ishewe kutya ye okwa li omukalimo gwomepandaanda ndyoka sigo oosho a hulitha omumvo 2008.Muyunda kombinga ye okwa hala ndika li lukilwe Kenneth Kaunda, omuleli gwotango gwa Zambia.Oshilando osha simaneka nale omuleli nguka sho she mu lukila epandaanda momukunda gwa Freedom Square popepi nompangu ya Katutura, ndele ndika aniwa kali shi ehala lyoopalela edhina lye.Epandaanda lya Kenneth Kaunda olya tsakanena nolya Anna Kakurukave Mungunda gumwe gwomomapendafule gaali omakiintu ga fumvikwa momawendo gomapendafule. Oshinima shika osha tulwa miikaha ya Meya , Shikongo konima sho okomittee yoku luka omapandaanda ya nyengwa oku ninga etokolo kutya edhina lini li na okunyolwa kepandaanda ndyoka.Okommittee yewiliko oya tokola kutya Shikongo na popye naa indilo mbaka yaali kombinga yoshinima shika.Oshinima shika osha zi mu Juni 2009 sho Ivula Ithana a li a nyolele Shikongo kutya okuwete kutya nakusa omulume oye gumwe gwomomapendafule ngoka inaaga simanekwa mekondjelomanguluko.Okwa tothamo iilonga ayihe a longa niipundi mbyoka a kuutumbile moSwapo pethimbo lyuundjendi nokwa ulike ishewe sho a dhana onkandangala medhikopo lyiilonga yepangelo sho a li omunashipundi shokommissi yiilonga mbyoka konima yemanguluko.Sho a galuka muundjendi okwa tindi okukala moKatutura, oshoka emanguluko olye mu pe ompito a kale mpoka a hala osho Ivula Ithana a ulike.Ivula Ithana okwa ti komakankameno ngaka yo oya tula nokudhika olukalwa lwawo momukunda gwa Ludwigsdorf, ehala ewanawa nolya talika ko lyuuyamba, sigo osho a huluko mu 5 ga May 2008.Kombinga ye komufala gwopombanda gwa Zambia okwa tameke okwiindila shika mu Septemba omumvo gwa yi, okwa indile ku Shikongo ngele otashi vulika opo Kenneth Kaunda a lukilwe epandaanda, haka pandaanda okashona ngaashi hoka a lukilwa moKatutura. Muyunda okwa ti shika ngele osha ningwa otashi ulike eyalulo lyiilonga mbyoka a longa kombinga yemanguluko muumbugantu wenenevi ndika.Kaunda okwa li omunashipundi gwotango gwiilongo ya li komeho mekondjitho lyepangelo lyokatongo lya South Africa pamwe naakolonyeki ooyakwawo.Muyunda okwa li a nyolele omunashipundi shokommittee yokuluka omapandaanda, Linea Shaetonhodi nokopi yontumwafo ndjoka okwe yi tumine Shikongo, muyo okwa ti, Kenneth Kaunda keshi gwomuntu gwomepandaanda. Okwa indile elelo lyoshilando opo li dhiladhile okumupa epandaanda lithike pomuthika gwe, okuyeleka naandyoka a lukilwa eshonashona.Momushangwa ngoka Muyunda okwa tothamo kondandalunde epandaanda lya Gloudina ongo limwe lyomwaangoka Kaunda ta vulu okupewa nokulukilwa.’Olyo eindilo lyandje peha lyepangelo naantu ya Zambia kutya Gloudina mo Ludwigsdorf a lukilwe Kenneth Kaunda’ osho a nyola.Poshigongi shelelo lyoshilando oshiwike sha yi okwa tseyithwa kutya, Shikongo okwa li natango ta kundathana na Ivula-Ithana noshowo Muyunda kombinga yeshongo ndika, nelelo olya shunitha oshikundathanwa shika kokakomittee.