Yaali ya ehamekwa unene miiponga yiihauto

AAGUNDJUKA yaali, ayehe oomeme, oya ehamekwa nayi miiponga yopaali yiihauto momudhingoloko gwa Shakati nOngwediva mehuliloshiwike lya zi koomanga yalwe ya ehamekwa kashona ngaa nokufalwa wo nayo kOshipangelo shEpangelo sha Shakati.

Meme gumwe gwomugundjuka okwa ehamenen noonkondo sho a pumwa kohauto pokati kOngwediva nOshakati ongulohi yOsoondaha ya zi ko. Sha ningilwa pooha dhOsenda yOmaulikilo gIipindi ga Ngwediva lwopomweelo gwEndiki lyOongeshefa lya Benz Building Supplies mOngwediva moka. Edhina lya meme ngoka gwomugundjuka, katwa li twe li mona kwali pethimbo ndyoka a kuthwa po nokuya kOshipangelo shEpangelo sha Shakati meendelelo.
Meme gumwe gwomugundjuka natango okwa mono oshiponga noonkondo ongula yOmaandaha ga zi ko sho a puminwa kohauto pontopa ya Kandjengedi mOshakati. Naye edhina lye katwa li twe li mona sho a kuthwa po kOpolisi nokufalwa koshipangelo shEpangelo sha Shakati meendelelo.
Yaali ya holoka mOmpangu mo Keetmanshoop
AALUMENTU yaali ya lopotelwa omadhipago po Keetmanshoop oshiwike sha zi ko, oya holoka mOmpangu ya Mengestarata mOmaandaha. Theofilus Galant (19) na Vivian Meyer (23), kaya li ya pulwa ya tye sha na iipotha yawo oyuundulilwa komasiku 23 ga June, opo natango ku ningwe omakonakono nosho wo ya monenwe aanavetakalelipo.
Aalumentu mbaka otaya fekelelwa omadhigo gaantu, mboka ye ya tsu noombele molukanda lwa Tseiblaagte mOlyomakaya. Oonakudhipagwa, mboka ayehe ya li ye na oomvula 23, ota ku popiwa kutya oyo Edwin Claasen na Clifton van Rhyn. Otaku popiwa kutya edhipago lya Van Rhyn olya zi moontamanana.