Ya ninga omaindilo opo ya longe noonzo dhomefuta

AANTU oyendji oya mbombolokele koombelewa dhuuministeli woohi noonzo dhomefuta etine lyoshiwike sha yi opo ya gandje omaindilo gawo.

Omaindilo ngoka ogo ku pewa uuthemba ya longe noonzo dhomefuta. Ethimbo lyokuninga omaindilo olya li omwedhi aguhe gwa Septemba netine lyaziko olyo lya li esiku lya hugunina okuninga omaindilo ngoka.Omupopiliko guuministeli mbuka ,Albert Mbanga okwa ti aantu yamwe oya kala ya tegelela sigo okomunute gwa hugunina opo ya ninge omaindilo gawo omanga ya kala yena ethimbo lya gwana oku shi ninga.Mbanga okwa ti nonando opwa li aantu oyendji taya ningi omaindilo ayehe mbaka oya kwathelwa nawa. Okwa ti okuza mulyotango lya Septemba sigo 29 ga Septemba omaindilo oga li omathele gane ngoka ga taambwa ndele okwa ti natango ka yena omiyalu adhihe dha gwana po. Ta ti inapa ningwa eyalulo etine oshoka aantu oyendji oya li ta ya ningi omaindilo gawo natango.Opo omwiindili a pewe uuthemba mbuka okuna oku gwanithapo iipumbiwa yimwe pamautho gompango yiikwafuta yomumvo 200, ndjoka ta yi utha kutya omwiindili oku na oku kala ta vulu okugwanitha shika pamukalo tagu nyanyudha.Iikwafuta mbyoka ya gandjwa opo yi ningilwe omaindilo oongaashi omaklaba, ogwano, oohi oontokele, oohi dhomaasbankers, nomaludhi goohi ngaashi ,monk, pilchard, omakolofishi, oombwa dhomomeya, noshowo omwiidhi gwomefuta.