Ya longwa okupangela oombasikela

AASILISHIMPWIYU yaanuuvu momikunda mIitopolwa ine yOpauhaku mOshitopolwa sha Musati, ye li 17 ya longwa okupangela nokulonda oombasikela, sha ningilwa pOshikuku mOshitopolwa sha Musati mewiliko lya meme Hilya Nangula Ekandjo noshowo tate Ervin Aupa ,yEhangano lya BEN Namibia.

Pa meme Ekandjo, ngoka e li omupangeli gwotango gwOombasikela omukiintumo Namibia, oombasikela ndhoka dhi li 65 dhe ya dhi li miintoko, oye dhi pewa okuzilila ko Italy, dha pewa nee Ehangano lyawo enene lyedhina Bicycling Empowerment Network Namibia (BEN). Iilyo nee yEhangano ndika, mbyoka hayi longele momikunda nokusila aanuuvu oshimpwiyu, ohayi mono nee tango omadheulo gokupangela oombasikela nokutula kumwe oombasikela ndhika opo ya vule ihe nawa okuya nadho momikunda ya ka sile aanuuvu oshimpwiyu. Meme Ekandjo ta ti omadheulo ngoka oga li ko okuza meti 19 sigo 23 Oktoba2009 pOshikuku mpoka. Ta ti oonakudheulwa mbaka ye li aasilishimpwiyu yaanuuvu momikunda dhi li mIitopolwa iinene yUuhaku mOshitopolwa sha Musati, ngashi shoka sha Shipangelo sha Kahao, shAutapi, sha Tsandi nosha Shikuku, oya mona omadheulo ge li nawa lela gokupangela Oombasikela noshowo oku dhi londa uuna ya thinda momikunda moka ya ka kwathele nokusila oshimpwiyu aanuuvu momagumbo momikunda moka.Meme Ekandjo ta ti Oonakusila oshimpwiyu aanuuvu momikunda mOshitopolwa shUuhaku sha Shikuku otaya wilikwa ku meme Elizabeth Kafula, yomOshitopolwa shUuhaku shOshipangelo shAutapi oye li mewiliko lya meme Aune Nelago Kapuka, mOshitopolwa shUuhaku sha Kahao oye li mewiliko lya meme Toini Kanana omanga mboka yomOshitopolwa shUuhaku shOshipangelo sha Tsandi ye li mewiliko lya meme Selma Ampweya na meme Sarti Festus. Meme Ekandjo ta ti konima nee sho ya mana nomadheulo ngaka, meti 23 Oktoba 2009, oya li nee ya ningi Oshituthipito shoonakudheulwa mboka 17 noya pewa oonzapo dhawo, sha ningilwa pOshikuku. Kaansela gwOshikandjohogololo sha Shikuku tate Peter Endjambi ta yambidhidhwa kOmukuluntu gwOshitopolwa shOpaundjolowele sha Shikuku Omundohotola Awe. Aanenentu yalwe yomOshitopolwa sha Shikuku mwa kwatelwa nAapolisi ya Shikuku nayo opo ya li poshituthi shegandjo lyoonzapo mpoka, noyendji oya londele oombasikela ndhoka dha pangelwa koonakudheulwa.