Wendelinus a nyanyukilwa etaambo lyoondjokana dhomashenge moNamibia

Omukuluntu gwehangano lyomashenge moNamibia, Wendelinus Hamutenya-Jeremia okwa holola enyanyu lye kombinga yonkundana ndjoka yi ingaana oshiwike sha zi ko sho Ompangu yoPombandambanda ya yeleke kutya oondjokana dhomashenge ngoka ga hokanena pondje yoshilongo odha taambiwa ko moNamibia nodha talika ko ongoondjokana ngaashi naanaa ndhoka dhomulumentu nomukiintu.

Hamutenya-Jeremia ngoka oye gumwe gomomashenge ngoka ga hokanena pondje yoshilongo, okwa popi tati: “Sho tatu popi ngeika, oondjokana dhomashenge odha taambiwa ko moNamibia. Kwaamboka haya kala taya popyagana, ngaashi unene oongeleka, aapropheti, osho wo yalwe, ya lombweleni kutya Ompangu yoPombandalela yaNamibia oya ninga etokolo tali popile omashenge.”

Oshiwike sha zi ko aapanguli yane yomOmpangu yoPombandambanda oya popi kutya etindo lyuuministili wiikwameni okupitika pambelewa oondjokana dhomashenge ngoka ga hokana pondje yoshilongo, olya ya moshipala uuthemba wekotampango kombinga yongushu yomuntu, osho wo uuthekepamwe.

Mo2017, aahokanathani yomashenge yopaali, omuNamibia Johann Potgieter ngoka a hokanwa komuSouth Africa Daniel Digashu, osho wo omuNdowishi gweshenge Anita Seiler-Lilles ngoka a hokana nomuNamibia gweshenge Anette Seiler, oya yi kOmpangu yoPombanda okupatululila Uuministili wIikwameni nOmatembu oshipotha sho wa tindi okutaamba ko oondjokana dhawo.

Ashike muJanuali omumvo gwa zi ko, Ompangu yoPombanda okwa li ya tindi omaindilo ngoka gopaali opo oondjokana pokati kaPotgieter naDigashu osho wo Seiler-Lilles naSeiler dhi taambiwe ko moNamibia ko ku gandjwe uuthemba wuukwashigwana waNamibia kuDigashu osho wo Seiler-Lilles.

Aahokanathani mboka yopaali oya tokola oshipotha shoka yi shi fale kOmpangu yoPombandambanda yi talulule etindo lyoondjokana dhomashenge moNamibia ndyoka kwa li lya gandjwa kaapanguli yatatu mOmpangu yoPombanda, muJanuali omumvo gwa zi ko.

Metokolo lya ningwa oshiwike sha zi ko, omupanguli omukuluntu moshilongo Peter Shivute nomupanguli gwomatalululo giipotha Dave Smuts, oya popi kutya oshitya “aahokanathani” mOveta tayi Kondolola Omatembu osha kwatela mo aantu ayehe mwa kwatelwa naamboka yuukwashikekookantu wa faathana [omashenge] mboka ya hokana pondje yoshilongo.

Hamutenya-Jeremia, ngoka omathimbo gamwe hi ithana kutya oye meme Maria Omuyapuki, okwa popi kutya ngashingeyi omashenge nenge aantu mboka ye li mekwatathano lyopaihole naantu yuukwashikekookantu wa faathana oye li menyanyu lyetokolo ndyoka lya ningwa Ompangu yoPombandalela okutaamba ko oondjokana dhomashenge moNamibia.

“Tse omashenge ngashingeyi nando otatu ende [mpoka], otatu ithele molwashoka oondjokana dhetu odha tambiwa ko. Oshu uvitha ndje nawa nonda nyanyukwa. Ondu uvite etumba. Otandi yi nokuli kombelewa yuuministili wiikwameni nda humbanda onzapo yandje yondjokana ndi ke ya popithe . . . Ngame oshitenya shokoNgandjera,” osho a popi ngaaka.

Hamutenya-Jeremia, ngoka hi ithana kutya natango kutya oye ‘omunyekadhi gwaNgandjera’, molwashoka anuwa omusamane Jeremia Immanuel ogwokOngandjera, okwa lombwele onzonkundaneki ndjika kutya okwa li a tsakanene tango naImmanuel mo2014, sho e mu pula a ninge po ohonda ye, ashike okwa li e mu tindi.

“Okwa li tandi iningitha ndafa inaandi mu hala. Omuntu iho itayele owala ngaaka uuna omuntu ekuhole, owu na ngaa okwi iningitha,” osho Hamutenya-Jeremia a popi ngaaka.

Okwa popi kutya oya tameke ekwatathano lyopaihole naImmanuel mo2015 noya kala pamwe sigo omo2020 sho ya hokanene koSouth Africa.

Hamutenya-Jeremia okwa kala omupopiliko gwomashenge moshigwana nokwa kala eshiwike nawa moshilongo okuza nkene okwa li a sindana po oshishani sheshenge dhingi moNamibia, mo2011/12.