WAD natango a gandja oonzapo kaakwashigwana ye li 115

EHANGANO ndyoka hali hwahwameke oshigwana shokomikunda unene tuu oomeme yi ihumithe komeho ngashi tashi vulika lyedhina Women Action for Development (WAD) mOlyomakaya ngaka ga zi ko natango lya pititha aailongi ye li ethele limwe omulongo nayatano (115) noku ya pa oonzapo sho ya piti eilongo lyawo ndika miinima yi ili noyi li yokukwatela po onkalamwenyo yomuntu.

Aakwashigwana mbaka, unene yomuyo oomeme, oyi ilongela uunongo wokompiuta wopetameko, Uutopaatopi nIilonga yOmoombelewa, Uuthigululwakalo, Okuteleka noshowo uuyogoki nEgandjo lyIikulya yOopalela, Uunangeshefa wOpetameko, Okuhondja noshowo okupainda nokukolonga oomatungo goongulu.Oshituthi shegandjo lyoonzapo shika, ngashi sha longekidhwa nawa kOmukuluntuwiliki gwa WAD meme Veronica De Klerk nongundu ye yaaniilonga, osha li sha kalwa nokupopithwa kOminista yOmauyelele nOmakwatathano gOpautekenika omusamane Joel Kaapanda. Minista Kaapanda oye wo a gandja oonzapo ndhika kaailongi mbaka 115.Aakuluntu yalwe ya li mpoka ongashi Kaansela gwOshikandjohogololo sha Nesi tate Fillemon Jatileni ngoka a li a kalele po Gavena yoshitopolwa sha Musati tate Sackey kayone ngoka ina vula kwali okuholoka omoluwehame nokugandja wo oshipopiwa she shetaambo lyaayenda pOmahenene/pOnavivi nomOmusati noshowo Elenga lya Navivi tate Elia Shipena nomukulukadhi gwe meme Beatha Shipena.Oshituthi shEgandjo lyOonzapo shika, sha li sha wilikwa nawanawa ku meme Kornelia Niingo, osha li sha kwashilipalekwa kOmahangano gIimaliwa ngashi ku Old Mutual, ngoka a li a kalelwa po kOmunambelewa Omukuluntu gwOshikondo shOmakwashilipaleko gOmafumviko, Elongo nosho tuu Omapungulo muukwaalukehe tate Trophimus Paulus, Ombanaga ya Nedbank ndjoka ya li ya kalelwa po kOmukuluntu manga gwOshitayimbaanga ndjika mOshakati tate Lemmy Murorua noshowo kOmukuluntu gwOpashitopolwa sha Mutual and Federal tate Daniel Shilongo. Oshituthi shoka sha li sha egululwa negalikano ku Seesita Vicky gwokoRuacana, osha li wo sha popithwa kOmupehakuluntuwiliki gwUuhaku mOmusati meme Helena Shifotoka, e shi ningi pehala lyomuwiliki gwUuhaku mOmusati meme Hilda Namwenyo Haipinge, ngoka ka li a vula okuholoka omolu omaimbo.Oonakupewa oonzapo mbaka ye li 115, oye li ngeyi kutya ye li 21 oya pewa oonzapo sho ya mana eilongo lyawo meshiwo lyopetameko lyOokoompiuta, ye li 19 oyi ilongela Uunambelewa nokutopaatopa, ye li 16 oyi ilongela iikwamuthigululwakalo, ye li 19 oyi ilongela okuteleka, uuyogoki niikulya tayi tungu olutu, omanga ye li10 yi ilongela Uunangeshefa wopetameko lela, ye li 20 oyi ilonga okuhondja naailongi ye li 10 oyi ilongela okupainda nokukolonga omatungo goongulu.Oshituthi shika osha li sha nyenyepekwa nomaudhano gOpamuthigululwakalo kOon gundu dhOpamuthigululwakalo ngashi, Ongundu yOpamuthigululwakalo Young Mundjele, Ongundu yOpamuthigululwakalo Omwandi, Ongundu yOpamuthigululwakalo Patrick Lungada nosho tuu dhilwe.Oongundu dhOpamuthigululwakalo ndatu dhomudho odha pewa Omakopi gesindano noshimaliwa. Ongundu ndjoka ye ya tango oyo ndjoka yaanyasha yedhina Young Mundjele Cultural Group, ndjoka nya bpewa nee Ekopi nOkapandi KooN$2500. Ndjoka ye ya ontiyali oyo Omwandi noya pewa Ekopi nOoN$1500 naandjoka ye ya ontintatu oyo Patrick Lungada noya pewa Ekopi nOoN$1000. Meme Pamela McMaster gwa WAD oye a gandja omapandulo nokupandula ayehe ya li mpoka, unene Minista Kaapanda, Ookaansela, mwene gwomukunda, aagandji yooshali, aalongwa, aavali naayehe ya li mpoka. Oshituthi, okuza mpoka, osha katyapulwa kwaayehe ya li mpoka, ano pwa ka liwa oondja nokunwa uunamunate.