Voigts a ethapo uunashipundi wa FNB

OMUNASHIPUNDI shewilikongundu lyombaanga yotango yopashigwana, uule womimvo 22 okwa yi mopenzela omwedhi gwayi. Dieter Voigts okwa zi mo miilonga yuunashipundi shombaanga ndjika meti 24 ga Novomba nuumvo.

Voigts okwa ti ota kala nokudhimbulukwa iinima oyindji omanga eli mefudho. Okwa ti ota kala nokudhimbulukwa aantu ya FNB nomadhidhilo omaanawa. Dieter Voigt okwa li a ulikwa omunashipundi shopashitopolwa shombaanga ya Barclays momumvo 1986 ongo oshilyo nomomumvo 1988 okwa ulikwa omunashipundi omupe gwewilikongundu lyaFNB ndjoka yaadhika opo ya tungwa po okuza mombaanga ya Barclays ndjoka ya thigipo uumbugantu wAfrika lyokatongo. Okwa ti oku uvite uuntsa okukala omuNamibia ngoka a ulikilwe mewiliko lyombaanga ndjika. Okwa ti muule womimvo ndhoka a kala nokulonga ongo omunashipundi okwa tsakanene naaniilonga oyendji yoombepo oombwaanawa noyena eitulemo miilonga yawo. Okwa ti oteke ya dhimbulukwa, na okwe ya pandula molwa eyambidhidho lyawo uule womimvo 22 ndhoka a longo pamwe nayo. Okwa halele omulanduli gwe elago miilonga ye, ati Claus Hinrichsen na yambekelwe ethimbo lyiilonga ye, ngaashi na ye a li a yambekwa. Okwa ti sho a tala monakuziwa okwa ti osha li oshinima oshaanawa notashi nyanyudha noshowo otashi muetele eiyuvo lyuunambano. Okwa pandula ayehe mboka taya kala nokumu dhimbulukitha ethimbo lye mewiliko lyombaanga yopashigwana.