OMBELEWA yomupelesidente oya ti omapopyo omupelesidente wongudu yoPopular Democratic Movement McHenry Venaani kutya epiyaano lehangano ledina Namibia Central Intelligence Service (NCIS) omukalo wokweetelwa onghenda nokukonga ovayambididi. Pefimbo opo kwa li ta popi koshoongalele shongudu mutima yoPDM kOpuwo mEtitano, Venaani okwa lundila ehangano loNCIS kutya otali yandje oimaliwa noilonga kovayambididi veengudu domilameno opo li ete omakulukuto meengudu davo. Ongudu oya kanifa oshilyo shayo shimwe shopaliamente Vipua Muharukuao eshi a xulifa po oilonga molwomatomeno aye opaumwene. Venaani okwa pula opo pelesidente Nangolo Mbumba a kufe mo omaliko ehangano loNCIS mopolotika.
Hamushanga mombelewa yomupelesidente Alferdo Hengari Oshoondaxa okwa ti omapopyo aVenaani omukalo wokukonga onghenda novayambididi.
Hengari okwa ti: “Osha nafangwa nai eshi omuleli a kwatela mo pelesidente momapopyo ongaho. Pelesidente Mbumba okwa fimaneka oveta nokwa kala alushe nokudenga omufindo kefimano lokulela nelongelokumwe loshiwana shaNamibia.”
Natango, omukulunhuwiliki wehangano loNCIS Benedictus Likando okwa ti Venaani na twale oshikumungu shaye eshi kopaliamente. Venaani okwa ti oku na ashike efimbo lishona opo eshi twale kopaliamente.
“Ondi shi eshi handi popi. Oilonga yavo okupatana ashike. Swapo okwa hala okupiyaaneka omahoololo, okweeta omatopauku meengudu dopolotika yee te liningi nee a fa oye ashike ongudu i na elandulafano,” Osho a ti ngaho. Okwa ti eengudu domilameno inadi topolwa. Venaani natango okwa ti ehangno eli ola tota po ongudu yedina Action Democratic Movement (ADM) opo li kendabale okweeta omapiyaano nongudu yoPDM.
“Otu shi eengudu dopolotika odo kwa li da ndulukwa koNCIS, opo kwa li omadina ovanhu nomashaino avo a longifwa shihe li padiminino lavo,” Osho a ti ngaho.
Venaani okwa ti oNCIS oya kufa ovanhu ovo tava kala tava mono eendjabi fiyo omuMarsa odula tai ya.
“Otu shi eshi tamu ningi. Omahangano aa naa xupe nande kamu po,” Osho a ti ngaho.
Pelesidente woADM Vincent Kanyetu oshivike sha dja ko okwa ti ongudu yaye inai mona nande oshimaliwa, yoo kakwa li ya totwa koNCIS.
Kanyetu, oo kwa li hamushangandjai woPDM okudja momudo 2013 fiyo 2015, okwa ti Venaani okwe mu tumina okatumwalaka konima yoshivike sha pita kutya ongudu yaye oya futwa vati koNCIS.
“Okwa li ndi shi ota ningi omashendjo. Inatu pewa nande oshimaliwa komunhu. Venaani ita popi oshili,” Kanyetu osho a ti ngaho.
Okwa ti okwa li a fiya po ongudu yoAll People’s Party muAguste odula ya dja ko, ashike Venaani okwa li ta kendabala e mu pe oilonga moPDM.
“Okwa li a hala ndi ningi omuunganeki woPDM ndee handi ti ponhele yaasho oPDM nai fute opendjela yange. Okwa ti osho otashi kala shidjuu okuninga, ashike ota tale nawa ofuto yange.
“Okwa ti ota futu nge ondjabi iwa,” Kanyetu osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!