Opolifi otai ti oumbudi wokawe mehangano lokutuvikila nokuteta okawe ledina Namibia Desert Diamonds (Namdia) Olomakaya oilonga yomeni, odjo osho ya ti ngaho.Odjo ei Oshoondaxa oya lombwela oThe Namibian kutya ongushu yokawe oko ka vakwa po oi fike lwopobiliyona imwe.
Omupedu inspekta wopolifi komufala Elias Mutota Oshoondaxa okwa koleka kutya omufeekelwa umwe oo a mangwa po omutonateli womaliko koNamdia.
“Otwa itavela kutya omufeekelwa umwe oo a mangwa po omutonateli womaliko koNamdia nokwa li e li moilonga eshi oshiningwanima eshi sha ningwa,” Osho a ti ngaho.
Okwa ti opolifi natango otai konakona oshikumungu eshi opo i mone lela kutya ongushu yokawe oko ka vakwa po oi fike peni.
“Natango ove lipyakidila tava valula nokutula kumwe kutya ingapi ya vakwa po nomakonakono oku li metifa,” Osho a ti ngaho.
Mutota okwa ti otashi dulika pu kale pu na ovafeekelwa ve dulife puvanhe.
“Natango otwa pumbwa okukonga ovafeekelwa ovo va xupa ko,” Osho a ti ngaho.
OMUPOLIFI MUKULU
Odjo oya ti umwe womovafeekelwa ovo va mangwa po, otaku tiwa kutya omunambelewa wopolifi mukulu nokuli omunailonga waNamdia paife, otaku feekelwa vali kutya okwa fa mumwaina womufeekelwa oo e likufa omwenyo peifimbo loshiningwanima eshi, Max Endjala.
“Otaku feekelwa kutya omunailonga ou okwa eta mumwaina meni …
“Ova ya noshimaliwa shi dule pobiliyona imwe yaNamibia. Okwa li nokuli e li moilonga Oshoondaxa nokwa li a mangwa po eshi a eta omufeekelwa,” Odjo osho ya ti ngaho.
Eedjo natango oda lombwela oThe Namibian kutya omulumenhu ou vati okwa pitika ovanyeki ava va ye metungo. Nepeko lopolifi lopambelewa ola patululwa, mwa kwatelwa oibofa yomunyeka wa homata noshedipao.
Oshiningwanima eshi shomunyeka osha fiya omutonateli womaliko waNamdia Francis ‘Gosh’ Eiseb (57) a xulifa, omanga ovafeekelwa vahapu tava kongwa fiyo opapa navavali ove li modolongo.
Omukulunhuwiliki waNamdia, Alisa Amupolo, momukanda okwa ti ehangano otali longele kumwe nopolifi.
Okwa ti Eiseb okwa kanifa omwenyo waye omanga kwa li e li moilonga.
“Eiseb okwaamena nawa nokwa kendabala okutaatayelashi ovanyeki, osho sha eta ekanifa lomwenyo waye omanga e li moilonga. Ohatu yandje omayekeleko etu komukulukadi waEiseb, ounona, ovatekulu nofamili aishe koonono.
“Okwa longela Namdia okudja muFebuluali 2019,” Osho a ti ngaho.
Omufeekelwa umwe wedina Endjala okwa xulifa eshi e liyasha yeemwene, omanga mumwaina e li modolongo.
Endjala okwa li omudanauki akula moudano wedina squash mounyuni nokwa li e li pondodo oninhe moNamibia.
Omafindano aye amwe akaula omwa kwatelwa okufindana po oNashua Open momudo 2015 noFBN Coastal Open momudo 2015, nosho yo Wanderers Mixed Doubles voonaLinda-Marie Calitz noSupertronix Mixed Doubles naAdrin Lambert momudo 2017.
Natango okwa li yoo umwe wokoshikondo shomakonakono opaungoba kehangano loTrustco Group Holdings.
Eshi a pulwa kombinga yamumwaina waEndjala, omupopiliko waNamdia Bevery Coussement Oshoondaxa okwa ti ehangano otali ka popya kombinga yoshikumungu eshi koshoongalele shoikundaneki diva ngaashi tashi dulika.
“Oshoongalele shoikundaneki pamwe nopolifi yaNamibia otashi ka ningwa diva ku ka nyamukulwe keshe epulo olo mu na nokuyandja omauyelele amwe eshi oshikumungu eshi tashi ya poluheela,” Osho a ti ngaho.
OUYELELE UHE LI MONDJILA
Amupolo okwa pula Ovanamibia opo va xulife po okwaandjakaneka ouyelele uhe li mondjila kombinga yoshiningwanima.
“Namdia oku shi shi kutya opu na eelopota di na omauyelele ehe li mondjila komalungula kombinga yoshiningwanima sha nyika oshiponga konhele yetu. Oinima ei ihe li mondjila otai eta engwangwano nouyelele wa puka.
“Otwe litula mo mokulongela kumwe nopolifi yaNamibia opo tu yandje ouyelele u li mondjila koshiwana,” Osho a ti ngaho.
Nande eedjo otadi koleke okawe oko ka vakwa po, Amupolo okwa ti oshinima eshi opo tashi monika mo natango.
“Ohatu tu omukumo keshe oo e na ouyelele tau dulu okuvatela mokukwata ovafeekelwa ovo inava kwatwa natango opo e uye ndee ta dengele opolifi yaNamibia diva ngaashi tashi dulika.
“Namdia natango okwe litula mo mokwaamena ovanailonga noilonga yaye.
Ohatu longele kumwe noveta opo tu kwashilipaleke kutya oshiningwanima eshi osha mona keshe osho sha pumbiwa opo kuungaungwe noshibofa eshi,” Osho a ti ngaho.
HAMUTENYA TA DIMBULUKWA
Omukulunhuwiliki mukulu woNamdia Kennedy Hamutenya okwa dimbuluka nokutanga Eiseb komalungula.
Hamutenya, oo naye kwa li ha longo ongomukulunhu wokawe, okwa ti Eiseb okwa li omunailonga he litula mo pefimbo laye.
“Oshidjuu neenghono okuuda ko edipao linyanyaleka eli lomushamane nomudali. Omulumenhu oo a li koilonga e lipyakidila opo a longe ounona vaye, a tule oikulya poshitaafula nokuvapa olukalwa neameno lofamili yaye. Onghela omwenyo waye okwa li e u kufwa,” Osho a tula kolalungula ngaho.
“Eshi kwa li handi wilike Namdia, Francis oye kwa li a shikula Clarky McKay nokwa li omukulunhu wovaameni vomaliko manga ina fya. Okwa li umwe womovanailonga ovananghono nokwa li omunailonga e litula mo noha longo noudiinini.
“Okwa li nokuli he liyambe okutwala ovayakulwa kokapale keedila nokudja ko opo a kwashilipaleke eameno lavo. Okwa li omunambili nokwa li kaume muwa kovanailonga pamwe naye aveshe nokwa li yoo e na efimaneko,” Hamutenya osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!