Etokolo longudu yoLandless People’s Movement (LPM) lokulukila omuleli wongudu Bernadus Swartbooi omapandaanda atatu koitopolwa oyo tai lelwa kongudu osha eta omapiyaano.
Omapandaanda kOranjemund, Keetmanshoop nokoMariental okwa lukilwa omunapolitika.
Omuunganeki woSwapo koshitopolwahoololo sha//Kharas, Matthew Mumbala, okwa ti okulukulula omapandaanda okwa li kwa ningwa shihe shiivike.
‘KAPU NA
EDIMININO’
“Oimaliwa okwa li ya longifwa puhe na ediminino lomondjila. Pula ngee okwa li ngaa pu na ediminino okudja koministili, kakwa li pu na ediminino,” Osho a ti ngaho.
“Oimaliwa yewiliko loshitopolwa otai longifwa ngaashi va hala, ndee kave na ko nasha,” Osho a ti ngaho.
Mumbala okwa ti oSwapo ashike tashi eta eyokomesho nelunduluko.
“Oitopolwahoolo ivali [//Kharas noHardap] otai teka po neenghono shaashi kapu na eshi shi li ko… oulingilingi ashike,” Osho a ti ngaho.
Okatendo komalelo eedoolopa oka yandja eenghono komawilikongudu eedoolopa okulundulula omadina omapandaanda nosho yo omwaalu womaumbo nomatungo.
Minista womayambulepo eedoolopa noitopolwa yokomikunda Erastus Utoni kakwa li nande a nyamula omapulo oo kwa li a tuminwa Etivali oo kwa li taa pula ngee omilandu okwa li ngaa da landulwa mokulukila omunapolitika omapandaanda.
Omundjadjukununi woikwapolitika Ben Mulongeni okwa pula efimbo nonhele opo pa ningilwa oshinima eshi.
“Eshi otashi monika sha fa omukalo wokukambaina opo ve mu shiivife molwomahoololo oo ta eya,” Osho a ti ngaho.
“Moshiwana omwa kala mu na omanyenyeto kutya omapandaanda moshilongo okwa lukilwa ashike ovaleli voSwapo omanga pu na ovaleli vopapolitika okudja keengudu dikwao dopolitika.”
Mulongeni, nande ongaho, okwa ti kapu na sha sha puka mokulukila epandaanda omunenenhu.
“Otu na omapaandaanda ahapu a lukilwa ovanapolitika, vamwe ovo pandjokonona, vamwe ovo vo opo ve ya,” Osho a ti ngaho.
Mulongeni okwa ti, ovanhu vamwe, ngaashi ovadanauki, ovashikingalo novanhu vamwe moshikondo shounongononi nomaungomba navo nava talwe nawa.
“Swartbooi omuleli a fimana oo a longele mongudu tai pangele, okwa li ngoloneya woshitopolwahoololo sha//Kharas, pauxupi omupedu minista, oshilyo shopaliamente nomupelesidente woLPM. Ota dulu okupewa efimano olo,” Osho a ti ngaho.
Omundjadjukununi woikwapolitika Johan Coetzee okwa ti onghatu otai monika ya fa ya longekidwa.
“… okutuma etumwalaka lakola kongudu tai pangele kutya oLPM otai ka kondjifa nokufindana moitopolwa ei. Osha fanekwa nawa nosha longwa mo nawa – unene ngaa pakutala kutya omahoololo oku li popepi,” Osho a ti ngaho.
Coetzee okwa ti oshinima shokulukila ovanapolitika omapandaanda oshihapu.
“Okuluka omapandaanda aa otaku popi shihapu kombinga yondodo yeyambidido olo e na keedoolopa odo nhatu,” Osho a ti ngaho.
Eshi a nyamukula kuMumbala, omunashipundi wokomitiye yewiliko loLPM lamuni koKeetmanshoop Easter Isaack Etivali okwa pula kutya oshike eedoolopa dimwe da lukila omapandaanda pelesidente mukulu Sam Nujoma.
“Koshi yelelo loSwapo okapale keedila iha ka longo vali, oshipangelo shaKeetmanshop osho kwa li shi na okukala oshipangelo oko haku tuminwa ovanhu osha shuna pedu, newilikongudu okwa li itali dulu okulelwa.
“Ashike Bernadus okwa eta oNeckrtal Dam, oUniversity of Namibia nosho yo oiputudilo imwe yopaungoba, noOld Mutual Mall moKeetmanshoop, okutumbula po ashike ishona.”
“Paushili, ondi udite kutya muni waKeetmanshoop na lukululwe a ninge Bernadus Swartbooi molwoilonga yaye oyo a longa,” Osho a ti ngaho.
Isaack okwa ti ewilikongudu ola ninga eudafano odula ei konima eshi eindilo lokulukulula epandaanda lokomitiye nosho yo oshikondo shokuninga omafaneko odoolopa opo li lukile oohandimwe ovo ve shi lilongela omapandaanda.
Ovanhu ovo kwa li va hoololwa ongaashi nee mayola waKeetmanshoop Adreas Biwa, omufita Zacheus naAlbert Thomas nosho yo nakufya omuyambididi wekondjelo manguluko mukulu Emil Appolus.
“Eshi oshinima shi li metifa. Shihapu opo tashi landula ko,” Osho a ti ngaho.
Omukwashiwana umwe Katrina Sageus wokoKeetmanshoop Etivali okwa ti Swartbooi okwe lilongela efimaneko eli.
“Otu mu shi nedina Clinton. Okwe lilongela efimaneko moKeetmanshoop. Kakwa li tu na ondjala nandenande noluhepo eshi kwa li e li omu. Itandi ti okamusela vakwao kave na eshi va ninga, ashike efimbo laye olo kwa li eputuko neyambulepo leefitola dipe da patuluka, nosho yo oinima ikwao ihapu,” Osho a ti ngaho.
Mayola woLMP koMariental Cherien Kock okwa ti ewiliko lodoolopa ola kufa onghatu yokulukulula omapandaanda momutengenekwafaneko womudo 2022/23 opo li fimaneke ovaleli, shaashi omapandaanda ahapu keena omadina.
Okwa ti kutya ewiliko lodoolopa ola hoolola ovanhu ngaashi minista mukulu wehongo Katrina Hanse Himarwa, omunafaalama akula Josef Motinga, nanakufya omunageshefa akula Piet Cronje.
“Okwa li twa ifana oshoongalele shewiliko lodoolopa momafiku 10 Oktoba eshi kwa li twa mona kutya Swartbooi ote ya koMariental koshoongalele opo a kufe etokolo ngee ota ningi oshitufi shepandaanda laye olo alukilwa omanga e li moMariental mexuliloshivike,” Kock osho a ti ngaho.
“Okwa li a pewa efimano molwewiliko laye okudja kounandjungu wovalihongi fiyo okoungoloneya, oupedu minista nokounapaliamente naashi e li omuleli wongudu yopolitika paife oyo tai lwile okwaalula efimano lOvanamibia.” Kock okwa ti oLPM oya longa nawa eshi ya yandja olusheno nomeva kovakalimo vokoumbuwanhu.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
