Uuvu wa Rift valley owa mwenapo

NAMIBIA okwa pumbwa oku kala iilongekidha nawa kombinga yolwiidhi lwa rift valley ethimbo lyomuloka ta gu ya. Omundohotola guundjolowele wiimuna mUuministeli wuunamapya, Cleopas Bamhare okwa ningi eindilo ndika konima sho moshilongo mwa holokele uuvu mbuka mokati kiinamwenyo poofaalama hamano moshitopolwa sha Hardap noshowo pofaalama yimwe moshitopolwa sha Karas.

Bamhare okwa ti oshiningwanima shika ina shi hepeka unene oshilongo nonando oshikondo shuunamapya nuuniimuna osha kanitha iimaliwa oyindji pethimbo pwa li oondjindikila dheinyengo lyiimuna noshowo lyonyama okuza mo Namibia oku ya ko, South Africa.Bamhare okwa kumike aanangombe ya tuntile iinamwenyo yawo oku yi gamena komukithi nguka, oshoka pamwe, pethimbo lyomuloka gwa taalelwa uuvu mbuka otashi vulika wu galuke wa geya.Okwa ti sigo oompaka kapena we iiningwanima iipe ya tseyithilwa ombelewa ye, na ota ti ngiika mbika oya shuna pevi molwa okufu hoka kwa tameke , naashika osha shuna uuvu mbuka pevi pakathimbo.Iinamwenyo 17 oya si miitopolwa mbyoka ya gumwa kuuvu mbuka yi li iyali, meholoko lyomukithi nguka nkene gwi ihulilemo, moshilongo omumvo 1985.Mo South Africa iinamwenyo omathele naantu omilongo 20 oya dhipagwa kuuvu mbuka nuumvo.Bamhare okwa londodha kutya ngele Namibia iti ilongekidha nawa molwongula otashi vulika omukithi nguka gu ka ehameke oshikondo shuuniimuna noonkondo okuyeleka nongashingeyi.Okwa ti oshikondo she oshi na omaipulo kombinga yuuvu mbuka ethimbo lyothinge ta li ya.Sigo oompaka kapena omuntu a kwatwa komukithu nguka moshilongo.Okwa ti oshikondo shuundjolowele wiinamwenyo osha kondjitha uuvu mbuka ngaashika sha shangwa, naashika osha kwathele oku ziminitha aalandi yiimuna nonyama okuza moNamibia ya kuthe po oondjindikila ndhoka ya li ya ningile Namibia, konyala uule woshiwike shimwe ashike.Okwa ti onkalo ya fa ndjoka ota yi vulu oku kutha omasiku nenge oomwedhi ina yi etwa mepangelo, naashika otashi vulu oku teyapo oshikondo shelanditho lyonyama mbala.Okwa ti kapena omiyalu tadhi ulike kutya iinamwenyo yithike peni ya tuntilwa omolwa uuvu mbuka.Pauvathano na South Africa iinamwenyo mbyoka ta yi tuminwa hoka yina omwenyo oyi na okukala ya tuntilwa omolwa uuvu mbuka konyala uule womasiku omilongo 21 omanga inaa yi pitikilwa yi tuminwe ko shilongo hoka.Bamhare okwa popi no The Namibian pethimbo lyoshigongi shi na sha nuukolele wiinamwenyo yomomeya sha hululile molyomakaya ga piti, poSwakopmund.