Uuvite uudhigu kombinga ye gandjo lyiilonga

PETHIMBO ta popitha oshigongi sho RDP pOhangwena mOshitopolwa sha Hangwena mOlyomakaya ga zi ko, gumwe gwomAawiliki yo RDP mOshikoto,Martin Haikali, okwa ti okuuvite nayi kEpangelo aniwa tali kutu ashike aantu yomOmusati miilonga yEpangelo noshowo mIikondo mbyoka ya yama kEpangelo, unene tuu momahala omanene giilonga.

Haikali ta ti oshigwana kashi uvitile oshinima shika ombili noshi li tashi si oshimpwininika omolwasho. Ota indile kOmuwiliki gwOkomissi yokukonaakona Omaulingilingi Paulus Noa a konaakone mo nawa oshinima shika noku shi ye moshipala. Otu na uudhigu wokatongo taka ningilwa yokIitopolwa yimwe, unene tuu uuna tashi ya komakuto gaantu miilonga.Mboka yokOmusati oyo ashike haya kutwa momawiliki mIikondo yepangelo naambyoka ya yama kEpangelo, kutya nee omoshinima shewendo lyiimuna, oto adha po ashike mboka yokOmusati,’ omusamane Haikali ta ti ngawo nokugwedha po ta ti Aamusati oyo wo haya kutwa ya wilike apehe mpoka pu na oshimaliwa shEpangelo, ano mIikondo yIimaliwa yEpangelo opo mboka yaa shi yokOmusati yaa mone oshimaliwa.