Uutoni a hogolululwa natango a ninge Meya gwa Ngwediva

KAANSELA Erastus Uutoni ngoka a kala oomvula odhindji dha zi ko Meya gwondoolopa ya Ngwediva, taku tiwa dhi li omulongo nayimwe, natango mEtine lyoshiwike sha zi ko okwa hogololwa kElelo lya Ngwediva oye a kale natango Meya gwOndoolopa ndjoka ya Ngwediva muule woomwedhi 12 tadhi landula noku kale wo Omunashipundi gwElelo lya Ngwediva.

Kaansela Patricia Kashuupulwa okwa hogolululwa a kale natango Omupehameya gwondoolopa ya Ngwediva nomunashipoundigona gwElelo lya Ngwediva omanga Kaansela Angelina Angula a hogolululwa a kale Omunashipundi gwOkomitiye tayi lelitha iilonga mOndoolopa ya Ngwediva.
Omupeha gwe oye Kaansela Jason Asino na Kaansela Maria Kavalela ta hogolululwa a kale natango oshilyo sha gwedhwa po shOmokitiye ndjoka.
Kaansela Isaak Ndokosho oku li natango oshilyo shElelo tashi kwathele apehe pamwe na Kaansela John Ya-Kanandjembo. Pethimbo ta taamba ko oshinakugwanithwa she shUumeya natango muule woomwedhi omulongonambali tadhi landula, Uutoni okwa pandula noonkondo sho Elelo lye lya Ngwediva natango li na einekelo mu ye nokwa uvaneke a tokola okulonga nuudhiginini ngashi shito.
Meya gwa Ngwediva Uutoni nguka ta ti kutya muule woomvula adhihe dha zi ko Elelo lya Ngwediva olye shi ulika kutya otali vulu okulonga iilonga yongushu noya simana mondjila yalyo yokulela ondoolopa ya Ngwediva noshigwana shamo nokutula po onkalo ombwanawa ndjoka tayi hokitha aaniimaliwa yee ya tunge nokupungula mOndoolopa ya Ngwediva, ngashi shi wetike nawa tashi inyenge mo.
‘Ngashi tu li ngeyi nena, otatu popi pombanda notatu ende twa tya omitse dhuukilila pombanda dha tenganana, tu uvite uutsa kwaashoka twa pondola po nenge twa eta po shi na ongushu onene mOngwediva yetu muka,’ Uutoni ta ti ngawo nokutsikila ko ta ti ngele tatu tala kwaashoka opo sha etwa mo mOndoolopa yetu ya Ngwediva, shEtungo lyOshitayi sha UNAM shUuwindjinia nOmuyelele gOpaunongononi, nena oto shi mono mo kutya Elelo lya Ngwediva noshigwana shamo oya eta po iinima yomupondo noyi na ongushu lela.
Uutoni ta ti kutya kakele kOshitayi shoka sha UNAM, mondoolopa omu na wo Oshitayi sha Politech shoka tashi gandja elongo lyUulongisikola kaakalimo yamwe. ‘Etaambo lyombili lyaayenda mondoolopaa ya Ngwediva kElelo nokoshigwana sha mo, oli li tali hokitha oyendji okuya okukala nokutalela po mOngwediva,’ Uutoni ta ti nokugwedha po kutya muule woomvula mbali dha pita po Elelo olya kala tali popi nokuuvitha kutya otapu tungwa omagumbo mehala etimulongonalimwe.
Shika, Uutoni ta ti, osha ningwa, omagumbo oga tungwa noyendji oya mona omagumbo koshitopolwa shoka. ‘Ongwediva otayi koko, mu na aantu oyendji ya hala omagumbo, nElelo otali kondjo mpoka tali vulu li tungile aantu yalyo omagumbo,’ Uutoni ta ti ngawo.Uutoni ta ti wo kutya pethimbo ndika, Elelo lya Ngwediva oli li moonkundathana nEhangano lyokutunga omagumbo lyedhina National Housing Enterprise (NHE) shi na sha nokutunga omagumbo mehala lyonomola14 noye wete kutya pehulilo lyomvula ndjika, NHE otaka ka kala a humitha komeho ehala ndjoka noyendji otaya ka tameka okulanda omagumbo kehala hoka.
Meya gwOndoolopa ya Ngwediva Uutoni ta ti wo kutya pethimbo olyo tuu ndika, Elelo lya Ngwediva olyi ipyakidhila okutamununa mo ehala lyomuumbangalantu wondoolopa ya Ngwediva , ano okuza lwokamwendo gondoolopa hoka okuuka momukunda Omatando moka nosho tuu opo mu tungwe omagumbo, opo mboka natango kaye na omagumbo ya mone omagumbo.
Omusamane Uutoni ta ti omahala ngoka taga opalekwa hoka ongashi nee ndyoka lyonomola 18,19,10,21. ‘Omolwiilongayakulo nee aihe mbika, otandi ka kala inandi gwanitha po oshinakugwanithwapo shandje ngele itandi pandula Ookaansela dhandje kumwe nAaniilonga mElelo lyetu lya Ngwediva, mboka taya gandja ewiliko lyongushu noshowo okuninga omathaneko ge li nawa, taga opalele nogongushu kondoolopa yetu,’ Uutoni, ngoka wo e li Omukuluntu gwoSwapo moshitopolwa sha Shana, ta ti ngawo nokugwedha po ta yelitha kutya kapu na mpoka wo kapu na omashongo.
Ta ti moshitopolwa sha Ngwediva oye na mo eshongo enene lyuundjugo womaholameno, unene tuu kiitopolwa yokomalukanda hoka, shoka tashin pula lela Elelo oshimaliwa oshindji sho u wu tula ko. Uupyakdhi wumwe ye na owo mboka wokutula omalusheno kiitopolwa mbyoka yokomalukanda.
Nande ongawo, Uutoni ota ti kutya Elelo onkee li ipyakidhila nokutula po omayakulo ge li nawa mpoka tali vulu. Uutoni ta lombwele oshigwana kutya, omvula ndjika, omvula yomahogololo nota indile omukwashigwana kehe ngoka e na oomvula dha thika okuhogolola a ka hogolole, naamboka kaye na natango uukalata womahogololo, ye kiishangithhe, ye wu mone, opo sho omahogololo taga thike ya kale ye wu na, notaya vulu okuhogolola.