Uuthigona ota u indjipala moSouth Africa

NONANDO South Africa okwa shonopeka uuthigona, oshilongo shika osho natango shina oshigwana kaashi thike pamwe paliko muuyuni pethimbo ndika.

Aatseyinawa oya londodha kutya omukanka ngoka gu li pokati kiilumbu naaluudhe ota gu nenepala, no ta shi vulika gu ete uupyakadhi monkalathano.Omushangwahokololo gwehumokomeho gwaSouth Africa ota gu ti iiyemo yooperesenda 10 dhaantu ya South Africa oya londo oshititatu shimwe okuza poodola dha Namibia 783 sigo oodola 1041 okuza 1993 sigo 2003.Aayamba ooperesenda 10 oya yambapala nooperesenda 38 pethimbo olyo tuu ndyoka.Manga omushangwa ta gu zimine kutya uukwaathike pamwe owa landula omuhoko, omiyalu ota dhi ulike kutya nonando iiyemo yaaluudhe ya londo sigo ooperesenda 38, mbyoka yiilumbu oya nuka sigo opooperesenda 83,5 pokati koomvula 1995 sigo 2008.Omutseyi mahupilo kounivesity ya Caapa, Haroon Bhorat okwa ti ekoko lyomahupilo lyatsikilathana sigo opo mumvo 2006 olya shonopeke oluhepo, ndele pethimbo olyo tuu ndyoka omukanka pokati kaayamba noohepele ogwa nenepala.’Okwaa thike pamwe pa iyemo oshinima oshiwinayi kekoko lyoshilongo. Ota shi nkundipaleke onkalathano osho a lombwele aatoolinkundana,’Omanga South Africa na Brazil ya li iilongo yi na okwaathike pamwe kwa londa pombanda pashiyelekitho shondjele yopokati yiiyemo yoshigwana muuyuni auhe, South Africa ngashingeyi oye ena oshigwana shi na okwaathike pamwe ta ku kenyenenke a pita po nookuli puBrazil.Nando iilongo yimwe oha yi monikwa yi na okwaathike pamwe ngele sha talikwa komiyalu dhayo, South Africa oku na okwaathike pamwe ku li pombanda, ngele ota shi talelwa momiyalu dhe ndhoka aluhe dhi li pethimbo.South Africa okwa ta lika oshilongo ta shi putuka sha ya komeho no shi iiyemo yopashigwana yoobiliona dhoodola dhaAmerika 144 no ta shi tsikile oku ulika ekoko oku za sho epangelo lyokatongotongo lya hulupo 1994.Mo 1995 ooperesenda 31 dhoshigwana odha li kohi yomusinda guuthigona ya li haya mono oodola 283 komwedhi, ndele aakwanaluhepo mbaka omwaalu gwawo ogwa shuna pevi sigo opooperesenda 22 mo 2008.Ronette Engela gomombelewa yomuperesidende ota ti aantu mboka ya thigonapala ota ya ende taya shonopala.Omushangwahokololo ota gu ti ehwepopalo monkalamwenyo yaantu ota yi zi mekoko lyomahupilo, mekalepo lyiilonga, nomoonkambadhala dhepangelo oku shonopeka oluhepo noshowo moku ambidhidha aantu oku ya pa omalukalwa.Bhorat okwa ti South Africa okwe shipondola okushonopeka oluhepo lwaantu ye sha pitile mekoko ewanawa lyegameno lyonkalathano.Konyala oomiliona 13 dhaantu ya South Africa oha ya pewa oshimaliwa shopenzela yonkalathano, omwaalu nguka ogwa ya pombanda lwaali oku yeleka nomwaalu gwo 2004.Ndele ngashingeyi egwopevi lyomahupilo ewinayi muule woomvula 17 okufuta aantu mbaka iimaliwa mbika osha ninga oshidhigu.Ominista yOmathaneko omusamane Trevor Manuel okwa ti omushangwahololo ogwa gandja oshilalo shokombinga yonkalo moSouth Africa onkene ota gu ka longithwa oku ninga po omulandu.Egwopevi lyomahupilo ota li siikile oonkambadhala dhetu adhihe ndhoka ta tu ningi.Omushangwa ogwa ulike enwethemo ewinayi ndyoka uudhigu womahupilo wa eta sha fala sigo omekanitho lyiilonga yaaniilonga 267 000 moshitine oshitiyali sha 2009.Mboka ya kanitha iilonga ya wo oyendji oyo aaluudhe mboka ya longwa kashona.Epangelo olya tameka omulandu gwo ku eta po iilonga ta shi pitile mooprograma dhiilonga yepangelo nolya thaneka ta li eta po oompito dhiilonga 500 000 pehulilo lyomvula.