Uutekisa mOnooli wa tindilwa otsutsa medhina lyomayala

U
UTEKISA umwe mboka wa tulwa omayala mominkulo okudhidhilika kutya wo owa uthwa okulongela koopate dhaayehe ong’iiyenditho yokututa aantu, owa li aniwa wa tindilwa okuningilwa otutsa yokuulika uukolele wohauto kOkampani ya Natis omolu omayala ngaka.

Omupopiliko gwElelo lyondoolopa yaNgwediva, hoka oko ku na Oombelewa dha Natis, Andreas Uutoni okwa ti okwa pewa olopota kaanambelewa ya Natis, kutya oya shunitha ko iiyenditho yontumba omolwashooka oyi na omayala ngaka molutu lyosheenditho ashihe.
‘Pauyelele nda pewa kaanambelewa otau ti kutya oshingima shika shokutula omayala haga adhima uusiku ga dhingoloka iiyenditho iishona, kashi li pampango notashi tula wo oonkalamwenyo dhaalongithindjila ooyakwawo moshiponga. Osheenditho shi na omaalwaalwa taga adhima olutu aluhe ihashi monika ngele otashi yi komeho, konima nenge osha thikama na shika osha nika oshiponga kaalongithindjila yalwe. Onkee iiyenditho mbika itayi ka tutswa manga’, Uutoni osho a popi ngaaka. Okwa gwedha ko kutya oyi ipyakidhila nokuninga omakwathano nOombelewa oonene dha Natis ko Venduka, okupula shoka shi na okuningwa po.
Kepulo kutya shika oshe ende nginii opo oshinima shokutula ko omayala shi ningwe pwaana ezimino lya Natis nehangano lyOopate lya Namibia, Uutoni okwa ti ye okuwete kutya ka pwa li ekwatathano lya yela pokati kEhangano lyOombesa nOotaxi mu Namibia (NABTA), Elelo lyondoolopa yaNgwediva, Natis noshowo Uuministeli wIiyenditho nOmakwatathano, omanga oporoyeka ndjika yokutula omayala kuutekisa inayi tameka.
Uutoni okwa kunkilile ooyene yuutekisa kutya naya tegelele eyamukulo lya hugunina Etitano ndika tu uka kutya oshinima shika shokutula omayala kuutekisa otashi tsikile nenge aawe.
Omupresidende gwa NABTA Magnus Nangombe okwa ti Ombelewa ye inayi tseyithilwa sha kombinga yoshinima shika, onkee ngele opu na sha shatya ngaaka, oya tegelela uuyelele mbuka. Omunashipundi gwEhangano lyOombesa nOotaxi kOnooli Helena Shiimbi ina monika opo ngeno a tye ko sha koshinima shika.