Uupyakadhi ishewe moshipangelo sha Katutura

IILYO yezimo limwe lyopo Groot Aub, ota yi nyenyeta sho aniwa yina yawo a gu eta teka metundji omanga a li ta pangwa moshipangelo shepangelo sha Katutura.

Mary-Ann Pietersen[53] okwa manene oondjenda moshipangelo shoka metitano lwopotundi 04h40 koongula.Omwanakadhona gwanakusa, Pietersen, okwa ti yo oya dhiladhila oku fala oshikondo shUundjolowele kohofa omolwa eso lya yina. Pahapu dha Priscilla Maasdorp, yina aniwa okwa gu koshipundi pethimbo a li a taambelwa moombete momukunda omu 5 B, nokwa teka metundji omasiku 22 May nuumvo. Okwa li moombete omolwa uupyakadhi woku fudha. Okwa ti yina aniwa okwa gu pethimbo ali ta yamukula ongodhi sho omwanakadhona emu dhengele oku za koSouth Africa, ndele kapwa li nando ogumwe ngoka a li ta vulu oku mu kwatha. Maasdorp ngoka eli omukalimo gwomo Kuilsriver mo Western Cape , okwa ti sho a dhengele yina konima yominute 15, omukwathipangi okwa li ta yakula yina. ‘Onda pula meme a pendje ongodhi ndi popye nomupangi, ndele omupangi okwa tindi oku popya nangame’. Omupangi aniwa okwa ti ita vulu oku mu fatululila uuvu wa yina mongodhi. Maasdorp okwa tulamo efudho itaali futwa oku za kiilonga esiku lya landula noku ya a kale pu yina moVenduka momasiku 24 May. Okwa ti sho a thiki moshipangelo, yina aniwa okwa li ta longitha embonde pwaana ekwathelo lyaapangi, mboka aniwa ya kala ashike ya kuutumba, pehala mpoka hapa thikilwa nokupopya. Okwa ti yina okwa ka kwathelwa ashike konima sho ye eke mu kongela ekwatho.Omupangi gumwe aniwa okwa ti ka li eshiwo ngele Pietersen okwa li a pumbwa ekwatho opo a longithe embode.Maasdorp okwa ti yina okwa lalekwamo moshipangelo esiku olyo tuu ndyoka no inaa thanekwa nOnte ya X. Oye mu shuna ko koshipangelo esiku lya landula omolwa uuwehame uudhigu. ‘Ondi uvite aaniilonga mwakwatelwa noondohotola oya longo nuuhasha kombinga ya meme. Oshoka ando oya li popepi naye andola iinima mbyoka ye mu ningilwa ando inayi ningwa.’Maasdorp okwa ti metitno okwa dhengelwa ongodhi okuza koshipangelo ta yi mu tseyithile kutya yina okwa mana oondjenda, ndele aniwa ina tseyithilwa kutya osheeti sheso osho oshike. Metine oshiwike shayi o The Namibian oya tumine Manga Libita omapulo kombinga yoshinima shika, konima sho Maasdorp a nyenyeta kwaashika. Libita ka li gandja eyamukulo komapulo moshinima shika sigo omoSoondaha. Libita okwa ekelehi omipopyo ndhoka tadhi ti moshipangelo kamwa li Onte ya X ta yi longo.