Uunona woonakulwa aakulu wa pewa iikulya komalenga nokaanangeshefa

AANONA ye li nhanga ethele limwe yOonakulwa aakulu yEkondjelomanguluko mboka ya ndumbala pombelewa Onene yOswapo pu Kandjengedi mOshakati moshitopolwa sha Shana, mEtitano lya zi ko oya pewa iikulya okuzilila muyamwe yomomalenga gOndonga pawiliki lyElenga enene tate Eino Shondili Johannes Amutenya noshowo kOmunangeshefa a tseyika nawa tate Hesekiel Nanyeni mwene gwoongeshefa dhedhina Spotman, ngoka wo e li Meya gwOndoolopa ya Muthiya noshowo kOmunangeshefa a tseyika nawa Paulus Shikalepo mwene gwongeshefa ya tseyika nawa pOmwandi gwa Kamanya mOndangwa yedhina Young Life.

Tate Shondili ota ti kutya ye mwene kumwe nOmalenga gamwe gomElelo lyOndonga, sho ya uvu kutya opu na uunona woonakulwa aakulu yEkondjelomanguluko, wa gongala kwali posheelo shokapamba yAakwiita pOluno mOndangwa notau sile po kondjala, oya gongela po oshimaliwa shOodola/N$350 lwaampoka noku shi pa nee Elenga enene tate Shondili, a ka lande iikulya, oomboloto e dhi faalele uunona mboka.
Elenga enene Shondili, osho lya ningi, ashike olya yi wo kaanangeshefa yootate Nanyeni nootate Shikalepo noku bya hokololela oshinima shika shuunona tau si ondjala. Aanangeshefa mbaka yaali oya gwedha po noya landa nee iinima mbika ngashi; oomboloto 150, omakende gOorosa 50, uupaketev wosopa 50, Omuti gwokomayego uunima wu li 50, uuyelekitho womayego 50, uushako uushona wosuuka wu li 50, oshako onene yuusila wepungu wo 50Kg, nIipakete iyali yoohi dhomoondooha.
Pokati mpoka, aanona yoonakulwa aakulu mbaka yEkondjelomanguluko, kOkamba yAakwiita kOluno oya zi ko noye ya pOmbelewa onene yOswapo mOshitopolwa sha Shana pOkandjengedi mOshakati.
Elenga enene Shondili noshowo Omunangeshefa tate Nanyeni, mEtitano lya zi ko oye ya nee puKandjengedi mpoka nogugandja omagano giikulya ngaka kaanona mbaka. Ya tambwa ko komupopiliko gwawo, ano gwaanona mbaka, John Malumbu na Amushanga gwawo Arma Nangolo. Amushanga gwAanyasha yoSwapo moshitopolwa sha Shana meme Esther Fillemon naye opo a li pegandjo lyiikulya mpoka, pehala lyOmukuluntu gwoSwapo moshitopolwa sha Shana tate Erastus Uutoni ngoka ka li mo mOshitopolwa omolwiilonga. Ashike nonande ka li po pegandjo lyiikulya, Omukalelipo gwe, ano gwa tet Uutoni, Kaansela Loth Kuushomwa, naye okwa kala a tseya oshinima shika shegandjo lyomagano giikulya kaanona mbaka pOmbelewa yoSwapo pu Kandjengedi mpoka.
Pethimbo nee taya gandja iikulya mbika kaanona mbaka, Elenga enene tate Shondili na tate Nanyeni, oya ti kutya egandji ndika otaye li ningi omolu ohenda onene ndjoka ye uvitile aanona mbaka yokusa ondjala na inashi talika ko nande ongehwahwameko lyoku ya hwahwameka ya kale poombelewa dhOswapo mpoka. ‘Inamu shi kutha ko nande kutya otwe mu pa iikulya mbika molwashoka tatu yambidhidha ngeno mu kale mwa dhama okukala pOmbelewa yOswapo mpaka.
Inatu ya tu mu hwahwameke mu kale mpaka nande, ashike otwe ya omulwokuuva ohenda, tu mu uvitile ohenda sho mu li mpaka kamu na sho tamu lile po, nomoku shininga nee ngeyi, otatu mu indile wo mu uve ko shoka tamu lombwelawa kaakuluntu yeni,’ taya ti ngaaka.