Uunona wa valelwa yekondjelomanguluko owa hala u pewa iilonga

ONGUNDU yuunona wa valelwa mekondjelomanguluko, ano woonakulwa aakulu,wu li 34 lwaampoka mboka omasiku ga zi ko wa kala wu li pomweelo gwOkamba yAakwiita mOluno mOndangwa, tau pula wu pewe iilonga, ndele tawu yi kOvenduka mehuliloshiwike lya zi ko, owa tseyithila oshifo shika kutya ngashiingeyi owa lundulukila kOmbelewa yOswapo yomOshitopolwa sha Shana pu Kandjengedi mOshakati na opo tau kala mpoka sigo aniwa tau pewa iilonga.

Omupopiliko gwaanona mbaka, John Malumbu, ota ti kutya omvula ya zi ko mu Novemba, oya shangelwe nokutulwa momisholondondo mIikundaneki moka kutya otaya pewa iilonga.
Taya ithanwa kOkamba yAakwiita yokoluno kOndangwa, ya ka pewe iilonga, ashike oya ka haluka ashike sho yo mboka 34 ya thigwa po nonando nayo ya li ya ithanwa hoka ya ka pewe iilonga.
John nayakwawo, otaya lombwele Oshifo shika kutya oya geyithwa komakuto miilonga mOkamba moka taga ningilwa koombunda. Taya ti kutya tashi vulika aantu ye li nande yahetatu nenge yahamano ya za megumbo limwe taya pewa iilonga omanga yo ye li po itaya pewa iilonga.
Taya ti wo kutya aakuti yamwe ohaya kutha aantu yamwe komagumbo kaye li momusholondondo gwaanona ya valelwa mekondjelomanguluko noku ya kuta miilonga,pamukalo gwuulingilingi.
John ota ti kutya oya kundana nawa kutya opwa kala pu na omahala ge li 1 200 ge na okukutilwa yo mboka ya shangwa. Ta ti sigo oshiwike sha zi ko, opwa li ashike pwa kutwa ye li 870 ko taku hupu omahala ge li 330, ihe nande ongawo onkee taya lombwelwa kutya aniwa kape na we omahala moka taya vulu okukutwa, naya shune aniwa komagumbo.
‘Tse komagumbo itatu yi ko, manga inatu kutwa miilonga nande, na otatu indile Epangelo li tale po nawa pomakuto mpoka opwa nika uulingilingi,’ Malumbu ta ti ngawo.
‘Ngashiingeyi otu li nee pOmbelewa yOswapo pu Kandjengedi, na itatu zi po we mpaka manga inatu pewa iilonga,’ Malumbu ta ti ngawo nokugwedha po ta yelitha kutya aanona yakwawo yalwe mboka inaya kutwa natango miilonga oye li ya ninga ontanda yawo poombelewa oonene dho Swapo kOvenduka okuza kOfaalama yOswapo popepi nOvenduka hoka ya kala omathimbo ga zi ko. Taya ti itaya zi po mpoka manga inaya pewa iilonga.